ಒಡೆದ ತುಂಗಭದ್ರಾ ಎಡದಂಡೆ ನಾಲೆ, ಅಪಾರ ನೀರು ಪೋಲು

ಮುನಿರಾಬಾದ್: ತುಂಗಭದ್ರಾ ಜಲಾಶಯದಿಂದ ರಾಯಚೂರು, ಕೊಪ್ಪಳ ಜಿಲ್ಲೆಯ ಕೆಲ ನಗರ, ಗ್ರಾಮಗಳಿಗೆ ಕುಡಿಯವ ನೀರು ಕಾಲುವೆ ಮೂಲಕ ಬಿಡುತ್ತಿದ್ದ ವೇಳೆ ಬುಧವಾರ ಬೆಳಗಿನಜಾವ ಕೊಪ್ಪಳ ತಾಲೂಕಿನ ಬಸಾಪುರ ಗ್ರಾಮದ ಬಳಿ ಎಡದಂತೆ ನಾಲೆ ಒಡೆದು, ನೀರು ಪೋಲಾಗಿದ್ದು, ಅಲ್ಲದೆ, ರೈತರ ಭೂಮಿ ಕೊಚ್ಚಿಕೊಂಡು ಹೋಗಿ, ಕೋಟ್ಯಂತರ ಹಾನಿಯಾಗಿದೆ.

ರಂಧ್ರ ಬಿದ್ದಿರುವ ಬಗ್ಗೆ ಸ್ಥಳೀಯರು ಮಾಹಿತಿ ನೀಡಿದ್ದರೂ ಲೆಕ್ಕಿಸಿದೆ, ಅದನ್ನು ದುರಸ್ತಿ ಸಹ ಮಾಡದೆ ವಿವಿಧ ನಗರಗಳಿಗೆ ಕುಡಿಯುವ ನೀರಿಗಾಗಿ ಕಾಲುವೆಯಲ್ಲಿ 200 ಕ್ಯೂಸೆಕ್‌ನಿಂದ 2 ಸಾವಿರ ಕ್ಯುಸೆಕ್ ನೀರು ಬಿಟ್ಟಿದ್ದರಿಂದ ಕಾಲುವೆಗೆ ಬೋಂಗಾ ಬಿದ್ದಿದ್ದು, ನಂತರ ಸುಮಾರು 100 ಅಡಿಯಷ್ಟು ಅಗಲ ಒಡೆದಿದೆ. ಹೀಗೆ ಒಡೆದಿದ್ದರಿಂದ ಕಾಲುವೆಯಲ್ಲಿನ ನೀರು ನುಗ್ಗಿ ಅಪಾರ ಪ್ರಮಾಣದ ಭೂಮಿ ಕೊಚ್ಚಿಕೊಂಡು ಹೋಗಿದ್ದು, ರೈತರು ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಅಷ್ಟೇ ಅಲ್ಲ, ಬೇಸಿಗೆಯ ವೇಳೆಯಲ್ಲಿ ಕುಡಿಯುವ ನೀರಿಗೆ ತತ್ವಾರ ಉಂಟಾಗುವ ಭೀತಿ ಎದುರಾಗಿದೆ.

ಕಾಲುವೆಯ ಗೋಡೆ ಒಡೆದ ಕಾರಣ ಭಾರೀ ಪ್ರಮಾಣದಲ್ಲಿ ನೀರು ಪೋಲಾಗಿದ್ದು, ಸುಮಾರು 200 ಎಕರೆಗೂ ಅಧಿಕ ಪ್ರದೇಶದಲ್ಲಿ ಬೆಳೆದು ನಿಂತ ಭತ್ತ ಸಂಪೂರ್ಣ ನಾಶವಾಗಿದೆ. ಇನ್ನೇನು ವಾರದಲ್ಲಿ ಕಟಾವಿಗೆ ಬರಬೇಕಾಗಿದ್ದ ಭತ್ತವು ನೀರು ಪಾಲಾಗಿದ್ದು ರೈತರ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ. ಕೋಟ್ಯಂತರ ಬೆಲೆಯ ಬೆಳೆದು ನಿಂತ ಭತ್ತ ನಾಶವಾಗಿದೆ ಎಂದು ಅಂದಾಜಿಸಲಾಗಿದೆ.

ಬಸಾಪುರ ಗ್ರಾಮದಲ್ಲಿರುವ ಐದು ರೆಸಾರ್ಟ್‌ಗಳಿಗೆ ನೀರು ನುಗ್ಗಿದೆ. ಅದರಲ್ಲಿ ಮೂರು ರೆಸಾರ್ಟ್‌ಗಳಿಗೆ ಭಾರೀ ಪ್ರಮಾಣದಲ್ಲಿ ಹಾನಿಯಾಗಿದೆ. ಅದೃಷ್ಟವಶಾತ್ ಎರಡು ವಾರಗಳ ಹಿಂದೆ ರೆಸಾರ್ಟ್ ಗಳಿಗೆ ಪರವಾನಗಿ ಇಲ್ಲ ಎಂದು ಜಿಲ್ಲಾಡಳಿತವು ಬಂದ್‌ ಮಾಡಿದ ಹಿನ್ನೆಲೆ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ.

ವಿಷಯ ತಿಳಿದು ಸ್ಥಳಕ್ಕೆ ಭೇಟಿ ನೀಡಿದ ಬಿಜೆಪಿ ಮುಖಂಡ ಬಸವರಾಜ್ ಕ್ಯಾವಟರ್ ನೀರಾವರಿ ಇಲಾಖೆ ಅಧಿಕಾರಿಗಳ ಬೇಜವಾಬ್ದಾರಿಯಿಂದ ಈ ಘಟನೆ ನಡೆದಿದೆ ಎಂದು ಆರೋಪಿಸಿದರು.

ವಾರದಲ್ಲಿ ಕಾಲುವೆ ದುರಸ್ತಿ: ಬಿರುಕು ಬಿಟ್ಟ ಕಾಲುವೆಯನ್ನು ವಾರದಲ್ಲಿ ದುರಸ್ತಿಗೊಳಿಸಲಾಗುವುದು ಎಂದು ನೀರಾವರಿ ಇಲಾಖೆಯ ವಡ್ಡರಹಟ್ಟಿ ವಿಭಾಗದ ಕಾರ್ಯ ಪಾಲಕ ಅಭಿಯಂತರ ಗೋಡೆಕರ್ ತಿಳಿಸಿದ್ದಾರೆ.

ಎಡದಂಡೆ ಮುಖ್ಯ ಕಾಲುವೆಯಲ್ಲಿ ಜ. 10ಕ್ಕೆ ನೀರು ಹರಿಸುವುದನ್ನು ನಿಲ್ಲಿಸಲಾಯಿತು. ಮಾ.17ಕ್ಕೆ ರಾಯಚೂರು ಹಾಗೂ ಕೊಪ್ಪಳ ಜಿಲ್ಲೆಯ ಪ್ರಮುಖ ನಗರಗಳಿಗೆ ಕುಡಿಯುವ ನೀರಿಗಾಗಿ ಕಾಲುವೆಯಲ್ಲಿ 2,000 ಕ್ಯೂ ಸೆಕ್‌ ನೀರು ಹರಿಸಲಾಯಿತು. ನೀರು 104 ಮೈಲಿನವರೆಗೆ ತಲುಪಿತ್ತು. ಕಾಲುವೆ ಬಿರುಕು ಬಿಟ್ಟ ಕಾರಣ ನೀರು ಹರಿಸುವದನ್ನು ಸ್ಥಗಿತಗೊಳಿಸಲಾಗಿದೆ ಎಂದರು.