ನರಸಿಂಹರಾಜಪುರ ತಾಲೂಕಲ್ಲಿ 20 ಡೆಂಘೀ ಪ್ರಕರಣ: ಡಾ.ವಿಜಯಕುಮಾರ್

ತಾಲೂಕು ಪಂಚಾಯಿತಿಯ ಸಾಮಾನ್ಯ ಸಭೆ

ತಾಲೂಕಿನಲ್ಲಿ 20 ಡೆಂಘೀ ಜ್ವರ ಕಾಣಿಸಿಕೊಂಡಿದ್ದು ಇವರಲ್ಲಿ 19 ಜನರು ಗುಣಮುಖರಾಗಿದ್ದು ಒಬ್ಬರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ತಾಲೂಕು ವೈದ್ಯಾಧಿಕಾರಿ ಡಾ.ವಿಜಯಕುಮಾರ್‌ ತಿಳಿಸಿದರು.

ಕುಡಿಯುವ ನೀರಿನ ವಿಭಾಗದ ಎಂಜಿನಿಯರ್‌ ರಕ್ಷಿತ್‌ ಸಭೆಗೆ ಮಾಹಿತಿ ನೀಡಿ, ಒಟ್ಟು 42 ಬೋರ್ವೆಲ್‌ ಮಂಜೂರಾಗಿತ್ತು. ಇದರಲ್ಲಿ 34 ಕಾಮಗಾರಿ ಮುಗಿದಿದೆ. ವಿದ್ಯುತ್‌ ಸಮಸ್ಯೆಯಿಂದ 8 ಕಾಮಗಾರಿ ಉಳಿದಿದೆ ಎಂದರು. ಈ ಸಂದರ್ಭದಲ್ಲಿ ತಾಲೂಕು ಪಂಚಾಯಿತಿ ಇ.ಒ. ನವೀನ್ ಕುಮಾರ್ ಮಾತನಾಡಿ, ಜೆಜೆಎಂ ಯೋಜನೆಯಡಿ ಸರಿಯಾದ ಕಾಮಗಾರಿ ಆಗಿಲ್ಲ. ಜನರಿಂದ ದೂರು ಬರುತ್ತಿದೆ. ಕೆಲವು ಕಡೆ ನೀರಿನ ಮೂಲ ಇಲ್ಲದಿದ್ದರೂ ಬರೀ ಪೈಪ್ ಲೈನ್ ಮಾಡಿದ್ದಾರೆ. ಹಳೇ ಪೈಪ್‌ ಲೈನ್ ಕಿತ್ತು ಹಾಕಿ ಹೊಸ ಪೈಪ್‌ ಲೈನ್ ಮಾಡಿದ್ದಾರೆ. ಆದರೆ, ಹೊಸ ಪೈಪ್ ಲೈನಿಗೆ ನೀರಿನ ಸಂಪರ್ಕ ಕೊಟ್ಟಿಲ್ಲ. ಪೈಪ್‌ ಲೈನಿನ ಕಾಲುವೆ ಮುಚ್ಚಿಲ್ಲ. ಜೆಜೆಎಂ ನಲ್ಲಿ 88 ಕಾಮಗಾರಿ ಮುಗಿದಿದೆ ಎಂದು ವರದಿ ನೀಡಿದ್ದಾರೆ. ಇದರಲ್ಲಿ ಶೇ 90 ರಷ್ಟು ಕಾಮಗಾರಿ ಬಗ್ಗೆ ಸಾರ್ವಜನಿಕರಿಂದ ದೂರು ಬಂದಿದೆ. ಪ್ರತಿ ದಿನ ನನಗೆ 2 ರಿಂದ 3 ದೂರುಗಳು ಬರುತ್ತಿದೆ. ಈ ಬಗ್ಗೆ ತುರ್ತಾಗಿ ಸಭೆ ಕರೆಯಬೇಕು ಎಂದು ಸೂಚಿಸಿದರು.

ದೀಪ್ತಿ ಪ್ರೌಢ ಶಾಲೆ ಸಮೀಪದ ಹಾಸ್ಟೆಲ್ ನ ಹತ್ತಿರ ಇದ್ದ ದೊಡ್ಡ ಮರದಿಂದ ಅಪಾಯ ಎದುರಾಗಿದೆ. ಮರ ತೆಗೆಯಲು ಅನುಮತಿ ನೀಡಬೇಕು ಎಂದು ಈ ಸಂದರ್ಭದಲ್ಲಿ ಮನವಿ ಮಾಡಿದರು.

ಗ್ರಾಮ ಪಂಚಾಯಿತಿಗಳು ಕಸ ವಿಲೇವಾರಿ ಮಾಡುವಾಗ ಹಸಿ ಕಸ, ಒಣ ಕಸ ಬೇರೆ ಮಾಡುವಂತೆ ಜನರಿಗೆ ಸೂಚನೆ ನೀಡಬೇಕು. ಪ್ಲಾಸ್ಟಿಕ್ ಮುಂದಿನ ದಿನಗಳಲ್ಲಿ ಮನುಷ್ಯರಿಗೆ ಗಂಭೀರ ಪರಿಣಾಮ ಉಂಟು ಮಾಡುತ್ತದೆ ಎಂದರು.

ಸಾಮಾನ್ಯ ಸಭೆಯಲ್ಲಿ ತಾಲೂಕಿನ ವಿವಿಧ ಇಲಾಖೆ ಅಧಿಕಾರಿಗಳು, ಎಲ್ಲಾ ಗ್ರಾಮ ಪಂಚಾಯಿತಿ ಪಿಡಿಒಗಳು ಉಪಸ್ಥಿತರಿದ್ದರು.