ಸಿಗದ ಮೇವು: ರೈತರಿಗೆ ತಲೆನೋವು

ವಿಶೇಷ ವರದಿ

ರಾಜ್ಯದಲ್ಲಿ ಮುಂಗಾರು ಹಾಗೂ ಹಿಂಗಾರು ಕೈಕೊಟ್ಟಿದ್ದರಿಂದ ರೈತರ ಬೆಳೆ ನಾಶವಾಯಿತು. ತೀವ್ರ ಬರ ಆವರಿಸಿದ್ದರಿಂದ ರೈತರು ಸಂಕಷ್ಟ ಎದುರಿಸಿದರು. ಬರಗಾಲದ ಪರಿಣಾಮದಿಂದ ಈಗ ಜಾನುವಾರುಗಳಿಗೆ ಮೇವಿನ ಕೊರತೆ ಎದುರಾಗಿದೆ.

ಆದರೆ, ಈ ಬಾರಿ ಸರಿಯಾಗಿ ಮಳೆ ಕೂಡ ಆಗಿಲ್ಲ. ಇದರಿಂದಾಗಿ ಸಹಜವಾಗಿ ಬೆಳೆಗಳು ಕೂಡ ನಾಶವಾಗಿವೆ. ಇದು ಕೂಡ ಜಾನುವಾರುಗಳಿಗೆ ಮೇವಿನ ಸಮಸ್ಯೆ ಎದುರಾಗಲು ಪ್ರಮುಖ ಕಾರಣವಾಗಿದೆ. ಇನ್ನು ಮೂರು ತಿಂಗಳು ಬೇಸಿಗೆ ಇರಲಿದೆ. ಈ ವೇಳೆ ಜಾನುವಾರುಗಳ ಗತಿ ಏನು ಎಂಬ ಚಿಂತೆ ಕೃಷಿಕರನ್ನು ಕಾಡುತ್ತಿದೆ. ಅಷ್ಟಿಷ್ಟು ಕಣಿಕೆ ಇದ್ದವರು ಮಾರಲು ಮುಂದೆ ಬರುತ್ತಿಲ್ಲ. ಕಾರಣ ಮೇವಿನ ಸಮಸ್ಯೆ ಮತ್ತಷ್ಟು ಹೆಚ್ಚಿದೆ. ಎಮ್ಮೆ, ಆಕಳು, ಎತ್ತು ಹೊಂದಿರುವ ರೈತರು ಕಣಿಕೆ ಖರೀದಿಗಾಗಿ ಎಲ್ಲೆಡೆ ಅಲೆದಾಟ ನಡೆಸಿದ್ದಾರೆ. ಸದ್ಯ ₹3800 ರಿಂದ ₹4000 ವರೆಗೆ ಜೋಳದ ಇದೆ. ಒಂದು ಸೂಡ ಕಣಿಕೆಗೆ ₹8 ರಿಂದ ₹10 ದರ ಇದ್ದು 1000 ಕಣಿಕೆ ಸೂಡಿಗೆ ₹8 ರಿಂದ ₹ 10 ಸಾವಿರದ ವರೆಗೆ ಇದೆ. ಆದರೂ ದನಕರುಗಳಿಗೆ ಮೇವು ಸಿಗುತ್ತಿಲ್ಲ.

ಜೋಳದ ಕಣಿಕೆಯೇ ಮುಖ್ಯ ಆಹಾರ: ಜೋಳದ ಕಣಿಕೆ ಜಾನುವಾರುಗಳಿಗೆ ಮುಖ್ಯವಾದ ಆಹಾರ. ಇದರಿಂದಾಗಿ ರೈತರು ಜಾನುವಾರುಗಳಿಗೆ ವರ್ಷ ಪೂರ್ತಿ ಬೇಕಾಗುವಷ್ಟು ಅಗತ್ಯ ಪ್ರಮಾಣದಲ್ಲಿ ಮೇವುಗಳನ್ನು ಖರೀದಿಸಿ ಬಣವೆಗಳನ್ನು ಕಟ್ಟುತ್ತಾರೆ. ಕಳೆದ ವರ್ಷದ ಜೋಳದ ಕಣಿಕೆಯ ಬಣವೆಯನ್ನು ಈ ವರ್ಷ ಉಪಯೋಗಿಸಿದರೆ, ಈ ವರ್ಷದ ಕಣಿಕೆಯ ಬಣವೆಯನ್ನು ಮುಂದಿನ ವರ್ಷ ಉಪಯೋಗಿಸುತ್ತಾರೆ. ಹೀಗೆ ದನಕರುಗಳಿಗೆ ಮೇವು ಸಂಗ್ರಹಿಸಿಟ್ಟು ರೈತರು ಉಪಯೋಗಿಸುತ್ತಾರೆ.ಭೂಮಿಯನ್ನೇ ನಂಬಿ ಬದುಕುವ ರೈತರಿಗೆ ಬರಗಾಲದ ಕರಿಮೋಡ ಆವರಿಸಿದೆ. ಮಳೆ ಇಲ್ಲದೆ ಹಸಿರು ಹುಲ್ಲು ಸಿಗುತ್ತಿಲ್ಲ. ದನಕರುಗಳ ಹೊಟ್ಟೆಗೆ ಆಹಾರ ಮೇವಿಗಾಗಿ ಅಲೆದಾಟ ಹೆಚ್ಚಾಗಿದೆ. ಈ ಭಾಗದಲ್ಲಿ ಮೇವಿನ ಕೊರತೆ ಉಂಟಾಗಿದೆ. ಕೂಲಿ ಮಾಡಿ ಜೀವನ ಸಾಗಿಸುವ ರೈತರ ಬದುಕು ದುಸ್ತರವಾಗಿದೆ. ಸರ್ಕಾರ ರೈತರಿಗೆ ನೆರವಾಗಬೇಕು.