ಕ್ರೀಡೆಯಿಂದ ಒಗ್ಗಟ್ಟು, ಧೈರ್ಯ: ವಿಜಯಕುಮಾರ್

ಸುಂಟಿಕೊಪ್ಪ: ಕ್ರೈಸ್ತ ಸಮಾಜದ ಕ್ರಿಕೆಟ್‌ ಟೂರ್ನಿ

ಕ್ರೀಡೆಯ ಮೂಲಕ ಕ್ರೈಸ್ತರನ್ನು ಒಂದೆಡೆ ಸೇರಿಸುವ ಕೆಲಸ ನಡೆದಿದೆ. ಇದರಿಂದಾಗಿ ಸಮಾಜದಲ್ಲಿ ಏನನ್ನಾದರೂ ಸಾಧಿಸಬಹುದು ಎಂಬ ಧೈರ್ಯ ಬಂದಿದೆ ಎಂದು ಸುಂಟಿಕೊಪ್ಪ ಸಂತ ಅಂತೋಣಿ ದೇವಾಲಯದ ಧರ್ಮಗುರು ವಿಜಯಕುಮಾರ್ ಹೇಳಿದರು.

ಕ್ರೀಡೆಯ ಮೂಲಕ ನಾವೆಲ್ಲರೂ ಒಂದೆಡೆ ಸೇರಿ ಒಂದೇ ಮನೆಯ ಮಕ್ಕಳಂತೆ ಸೌಹಾರ್ದತೆ, ಪರಸ್ಪರ ಪ್ರೀತಿ, ವಿಶ್ವಾಸವನ್ನು ಹಂಚಿಕೊಳ್ಳಲು ಇದು ಸುಂದರ ವೇದಿಕೆಯಾಗಿದೆ. ಕ್ರೀಡೆ ನಮ್ಮಲ್ಲಿ ಒಗ್ಗಟ್ಟು ಮೂಡಿಸುತ್ತದೆ. ಒಂದೆಡೆ ಸೇರಿದಾಗ ನಮ್ಮ ಕಷ್ಟ ಸುಖಗಳನ್ನು ಹಂಚಿಕೊಳ್ಳಲು ಸಾಧ್ಯವಾಗುತ್ತದೆ, ಭಾಂದವ್ಯ ಇನ್ನಷ್ಟು ಬೆಸೆದುಕೊಳ್ಳುತ್ತದೆ ಎಂದರು.

ಗ್ರಾಮ ಪಂಚಾಯಿತಿ ಅಧ್ಯಕ್ಷ ಪಿ.ಆರ್ .ಸುನಿಲ್ ಕುಮಾರ್ ಮಾತನಾಡಿ, ಕೊಡಗು ಜಿಲ್ಲೆ ಕ್ರೀಡೆಗೆ ಹೆಸರುವಾಸಿಯಾಗಿದ್ದು, ಇಂತಹ ಸಮುದಾಯಗಳು ಆಯೋಜಿಸಿದ ಕ್ರೀಡೆಗಳಲ್ಲಿ ಭಾಗವಹಿಸಿ ತಮ್ಮಲ್ಲಿರುವ ಕಲೆಯನ್ನು ಪ್ರದರ್ಶಿಸುವ ಮೂಲಕ ಸಮಾಜದಲ್ಲಿ ಗುರುತಿಸಿಕೊಳ್ಳಬೇಕು. ಅಲ್ಲದೇ ಪಹಲ್ಗಾಂನಲ್ಲಿ ನಡೆದ ೨೬ ಮಂದಿಯ ಹತ್ಯಾಕಾಂಡವನ್ನು ಖಂಡಿಸಿ ಭಾರತೀಯ ಯೋಧರೊಂದಿಗೆ ನಾವೆಲ್ಲರೂ ಇದ್ದು, ಅವರಿಗೆ ಧೈರ್ಯ, ಸ್ಥೈರ್ಯವನ್ನು ತುಂಬಬೇಕಾಗಿದೆ ಎಂದು ಕಿವಿಮಾತು ಹೇಳಿದರು.

ಇದೇ ವೇಳೆ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರನ್ನು ಗುರುತಿಸಿ ಗೌರವಿಸಿ ಸನ್ಮಾನಿಸಲಾಯಿತು. ಹಾಗೆಯೇ ಅತಿ ಹೆಚ್ಚು ಅಂಕಗಳಿಸಿದ ಕ್ರೈಸ್ತ ವಿದ್ಯಾರ್ಥಿಗಳನ್ನು ಸಹ ಸನ್ಮಾನಿಸಲಾಯಿತು.

ನಂತರ ನಡೆದ ಜಿಲ್ಲಾ ಮಟ್ಟದ ಕೆಥೋಲಿಕ್ ಕ್ರಿಕೆಟ್ ಟೂರ್ನಿಗೆ ಟಿಂಬರ್ ವ್ಯಾಪಾರಿಹಾಗೂ ಸಿಎಸ್‌ಐ ದೇವಾಲಯದ ವಿಲಿಯಂ ಚಾಲನೆ ನೀಡಿದರು.

ಮೊದಲ ದಿನದ ಫಲಿತಾಂಶ:

೫ನೇ ಪಂದ್ಯಾವಳಿಯು ಗೋಪಾಲಪೂರದ ಸಂತ ಅಂತೋಣಿ ದೇವಾಲಯದ ತಂಡ ಹಾಗೂ ಸೋಮವಾರಪೇಟೆ ಓಎಲ್‌ವಿ ತಂಡಗಳ ನಡುವೆ ನಡೆದು ಗೋಪಾಲಪುರ ತಂಡವು ಗೆದ್ದುಕೊಂಡಿತು. ಪಾಲಿಬೆಟ್ಟ ದೇವಾಲಯದ ತಂಡ ಅತಿಥೇಯ ಸಂತ ಅಂತೋಣಿ ದೇವಾಲಯದ ಎ ತಂಡಗಳ ನಡುವೆ ನಡೆದು ಪಾಲಿಬೆಟ್ಟ ತಂಡವು ಗೆಲುವು ಸಾಧಿಸುವುದರೊಂದಿಗೆ ಮುಂದಿನ ಸುತ್ತಿಗೆ ಆರ್ಹತೆಯನ್ನು ಪಡೆಯಿತು.