ಸಂಭ್ರಮ ಸಡಗರದಿಂದ ವರಮಹಾಲಕ್ಷ್ಮಿ ಹಬ್ಬಾಚರಣೆ

ಕನ್ನಡಪ್ರಭ ವಾರ್ತೆ ಚಿಕ್ಕಬಳ್ಳಾಪುರ

ಮನೆ ಹಾಗೂ ಮಂದಿರಗಳು ತಳಿರು ತೋರಣಗಳಿಂದ ಸಿಂಗಾರಗೊಂಡಿದ್ದವು. ಮನೆಯ ಅಂಗಳಕ್ಕೆ ಮೆರುಗು ನೀಡಿದ್ದ ಬಣ್ಣಬಣ್ಣದ ರಂಗೋಲಿ ಹಬ್ಬದ ಸಂಭ್ರಮಕ್ಕೆ ಸಾಕ್ಷಿಯಾಗಿತ್ತು. ಮನೆಗಳಲ್ಲಿ ಲಕ್ಷ್ಮಿಯನ್ನು ಪ್ರತಿಷ್ಠಾಪಿಸಿ ಸೀರೆ ಉಡಿಸಿ, ಬಗೆ ಬಗೆಯ ಹೂ ಹಾಗೂ ಆಭರಣಗಳಿಂದ ಅಲಂಕರಿಸಿ, ಬಗೆ ಬಗೆಯ ಹಣ್ಣುಗಳೊಂದಿಗೆ ಹೋಳಿಗೆ ಸೇರಿದಂತೆ ನಾನಾ ಭಕ್ಷ್ಯಗಳನ್ನು ತಯಾರಿಸಿ ನೈವೇದ್ಯ ಸಮರ್ಪಿಸಿದರು.

ಶುಕ್ರವಾರದ ವರಮಹಾಲಕ್ಷ್ಮಿ ಹಬ್ಬಕ್ಕೆ ನಗರ ಸಜ್ಜು ಗೊಂಡಿದ್ದು, ಹೂವು-ಹಣ್ಣುಗಳ ಬೆಲೆ ದುಪ್ಪಟ್ಟಾಗಿದ್ದರೂ ಜನತೆ ಮುಗಿಬಿದ್ದು ಖರೀದಿ ಮಾಡಿದ್ದಾರೆ. ಹಬ್ಬಕ್ಕೆ ಅಗತ್ಯವಾದ ಲಕ್ಷ್ಮಿ ಮೂರ್ತಿಗಳನ್ನು ಜನರು ಈಗಾಗಲೇ ಖರೀದಿ ಮಾಡಿದ್ದು, ಮಂಟಪಕ್ಕಾಗಿ ಬಾಳೆ ಕಂದು, ಮಾವಿನಸೊಪ್ಪು, ಅಲಂಕಾರ ಸಾಮಗ್ರಿಗಳು, ಹೂವು ಹಣ್ಣುಗಳನ್ನು ಜನತೆ ಖರೀದಿ ಮಾಡಿದರು.ಹೂವುಗಳ ಬೆಲೆ ಕಳೆದ ಬುಧವಾರಕ್ಕೆ ಹೋಲಿಸಿದರೆ ಹೆಚ್ಚಾಗಿದ್ದು, ಕನಕಾಂಬರ ಕೇಜಿಗೆರೂ4,000,ಕಾಕಡ ರೂ1000-3000 ಮಲ್ಲಿಗೆ ರೂ2500, ಗುಲಾಬಿ ರೂ300, ಸೇವಂತಿಗೆ ರೂ250-400, ಸುಗಂಧರಾಜ ರೂ 600 ಬೆಲೆಯಿತ್ತು. ಇನ್ನು, ಹಣ್ಣುಗಳು ಸೇಬು ಕೆಜಿಗೆ ರೂ250-300, ದಾಳಿಂಬೆ 150-200, ಏಲಕ್ಕಿ ಬಾಳೆರೂ 120-150, ಮರಸೇಬು ರೂ150, ಸೀತಾಫಲ ಹಾಗೂ ಸಪೋಟಾ ರೂ120, ಅನಾನಸ್ ರೂ 80-150 ಕ್ಕೆ ಎರಡು ಮಾರಾಟವಾಯಿತು. ಬಾಳೆಕಂದು ಜೋಡಿಗೆ ರೂ80, ಮಾವಿನ ತೋರಣಕ್ಕೆ ರೂ20, ವಿಳ್ಯದೆಲೆ ಕಟ್ಟಿಗೆರೂ150 ಬೆಲೆಯಿತ್ತು.