ಉಪಕಾಲುವೆಗೆ ದುರಸ್ತಿ ಭಾಗ್ಯ ಯಾವಾಗ?

ಬಸವರಾಜ ಹಿರೇಮಠ

ಜಿಲ್ಲೆಯ ಅಣ್ಣಿಗೇರಿ ತಾಲೂಕಿನ ಶೆಲವಡಿ-ತುಪ್ಪದ ಕುರಹಟ್ಟಿ ಗ್ರಾಮಗಳ ಮಧ್ಯೆ ಇರುವ ಉಪ ಕಾಲುವೆಯ ಸ್ಥಿತಿ ಇದು. ನೀರಿಲ್ಲದೇ ರೈತರ ಬದುಕೇ ಇಲ್ಲ. ಆದರೆ, ರೈತರ ಜಮೀನಿಗೆ ನೀರು ಒದಗಿಸುವ ಮೂಲಗಳಿಗೆ ತೊಂದರೆಯಾದಾಗ ಅವರ ಸ್ಥಿತಿ ಅಯೋಮಯ. ಧಾರವಾಡದ ಕೆಲವು ಗ್ರಾಮಗಳ ರೈತರ ಜಮೀನಿಗೆ ನೀರು ಸಿಗುವ ಭಾಗ್ಯವಿದ್ದರೂ ಕಾಲುವೆಗಳ ಸಮಸ್ಯೆಯಿಂದಾಗಿ ನೀರು ತಲುಪುತ್ತಿಲ್ಲ ಎಂಬುದಕ್ಕೆ ಈ ಉಪ ಕಾಲುವೆಯೇ ಸಾಕ್ಷಿ. ಕಳೆದ ಐದಾರು ವರ್ಷಗಳಿಂದ ರೈತರು ಉಪ ಕಾಲುವೆಯ ದುರಸ್ತಿ ಬಗ್ಗೆ ಮನವಿ ಮಾಡಿದರೂ ಹೇಳಿಕೊಳ್ಳುವ ಸ್ಪಂದನೆ ಸಿಕ್ಕಿಲ್ಲ ಎನ್ನುವುದೇ ಬೇಸರದ ಸಂಗತಿ.ಬೆಳಗಾವಿ ಜಿಲ್ಲೆಯ ಸವದತ್ತಿ ತಾಲೂಕಿನ ನವಿಲುತೀರ್ಥ ಅಣೆಕಟ್ಟೆಯಿಂದ ಬರುವ ಮಲಪ್ರಭಾ ಬಲದಂಡೆ ಕಾಲುವೆಯ ಉಪ ಕಾಲುವೆಯು ಈ ಎರಡೂ ಗ್ರಾಮಗಳ ನಡುವೆ ಹಾದು ಹೋಗುತ್ತದೆ. ಆದರೆ, ಐದಾರು ವರ್ಷಗಳ ಹಿಂದೆ ಈ ಉಪಕಾಲುವೆ ಕಿತ್ತು ಹೋಗಿದೆ. ಇದರಿಂದ ಮಲಪ್ರಭಾ ನಾಲೆಯಲ್ಲಿ ನೀರು ಹರಿಯುತ್ತಿದ್ದರೂ ಅದು ಈ ರೈತರ ಹೊಲಗಳನ್ನು ತಲುಪದಂತಾಗಿದೆ. ನೀರು ರೈತರ ಹೊಲ ಮುಟ್ಟುವ ಮುನ್ನವೇ ಒಡೆದು ಹೋಗಿರುವ ಕಾಲುವೆಗಳಲ್ಲಿ ಸೋರಿ ಅಕ್ಕಪಕ್ಕದ ಹಳ್ಳಕ್ಕೆ ಸೇರುತ್ತಿದೆ. ಇದರಿಂದಾಗಿ ರೈತರ ಪಾಲಿಗೆ ಈ ನೀರು ಕನ್ನಡಿಯಲ್ಲಿನ ಗಂಟಾಗಿ ಪರಿಣಮಿಸಿದೆ.

ಉಪ ಕಾಲುವೆ ದುರಸ್ತಿ ಬಗ್ಗೆ ನಮ್ಮ ಗಮನಕ್ಕೆ ಬಂದ ಕೂಡಲೇ ಕಾಲುವೆಯ ದುರಸ್ತಿಗೆ ₹14 ಲಕ್ಷ ಬಿಡುಗಡೆ ಮಾಡಿಸಿ, ಟೆಂಡರ್ ಕೂಡ ಕರೆಯಲಾಗಿದೆ. ಇನ್ನೇನು ಕೆಲವೇ ದಿನಗಳಲ್ಲಿ ದುರಸ್ತಿ ಕಾರ್ಯ ಆರಂಭವಾಗಲಿದ್ದು, ಮುಂದಿನ ದಿನಗಳಲ್ಲಿ ಅಲ್ಲಿನ ಎಲ್ಲ ಭೂಮಿಗೆ ನೀರು ಸಿಗುತ್ತದೆ. ರೈತರು ಆತಂಕ ಪಡುವ ಅಗತ್ಯವಿಲ್ಲ ಎಂದು ಶಾಸಕ ಎನ್. ಎಚ್. ಕೋನರೆಡ್ಡಿ ಇದ್ದರು.