ವಿಶ್ವ ಆದಿಮಸಂಜಾತರ ಹಕ್ಕುಗಳ ದಿನವಾದ ಇಂದು ಕೊಡವ ನ್ಯಾಷನಲ್ ಕೌನ್ಸಿಲ್ ಸಂಘಟನೆ ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಶಾಂತಿಯುತ ಸತ್ಯಾಗ್ರಹ ನಡೆಸಿತು.
ಮಡಿಕೇರಿ: ವಿಶ್ವ ಆದಿಮಸಂಜಾತರ ಹಕ್ಕುಗಳ ದಿನವಾದ ಇಂದು ಕೊಡವ ನ್ಯಾಷನಲ್ ಕೌನ್ಸಿಲ್ ಸಂಘಟನೆ ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಶಾಂತಿಯುತ ಸತ್ಯಾಗ್ರಹ ನಡೆಸಿತು.
ಸಿಎನ್ಸಿ ಅಧ್ಯಕ್ಷ ಎನ್.ಯು. ನಾಚಪ್ಪ ಅವರು ಕೊಡವ ಮಣ್ಣಿನ ಆದಿಮಸಂಜಾತ ಏಕ-ಜನಾಂಗೀಯ ಪ್ರಕೃತಿ ಆರಾಧಕ (ಅನಿಮಿಸ್ಟಿಕ್) ಜನಾಂಗ ಕೊಡವರ ಪರವಾದ ವಿವಿಧ ಬೇಡಿಕೆಗಳ ಮನವಿ ಪತ್ರವನ್ನು ಜಿಲ್ಲಾಡಳಿತ ಮೂಲಕ ಭಾರತ ಸರ್ಕಾರ, ಕರ್ನಾಟಕ ಸರಕಾರ ಮತ್ತು ವಿಶ್ವಸಂಸ್ಥೆಗೆ ಸಲ್ಲಿಸಿದರು.‘ಕೊಡವರ ಭೂ-ರಾಜಕೀಯ ಸ್ವಾಯತ್ತತೆಯ ಶೋಧ’ ಆದಿಮಸಂಜಾತ ಕೊಡವರಿಗೆ ಸ್ವಯಂ-ಆಡಳಿತ ಮತ್ತು ಆಂತರಿಕ ರಾಜಕೀಯ ಸ್ವಯಂ-ನಿರ್ಣಯದ ಹಕ್ಕುಗಳು, ಆದಿಮಸಂಜಾತ ಮಾನ್ಯತೆಯೊಂದಿಗೆ ವಿಶಿಷ್ಟ ಜನಾಂಗೀಯ ಸಮುದಾಯವಾಗಿ ಕೊಡವರಿಗೆ ಸಾಂವಿಧಾನಿಕ ವಿಶೇಷ ಖಾತರಿ ನೀಡಬೇಕು ಎಂದು ಒತ್ತಾಯಿಸಿದರು.ಒಮ್ಮೆ ನಮ್ಮ ಪ್ರೀತಿಯ ಮಾತೃಭೂಮಿ ಕೊಡವಲ್ಯಾಂಡ್ ಒಂದು ರಾಷ್ಟ್ರ, ರಾಜ್ಯವಾಗಿ, ಬ್ರಿಟಿಷ್ ಸಂರಕ್ಷಿತ ಪ್ರದೇಶವಾಗಿ, ಪ್ರಾಂತ್ಯವಾಗಿ ಮತ್ತು ನಂತರ 1956ರಲ್ಲಿ ರಾಜ್ಯ ಪುನಾರಚನೆ ಕಾಯ್ದೆ ಜಾರಿಗೆ ಬರುವವರೆಗೆ ‘ಸಿ’ (ಅ) ರಾಜ್ಯವಾಗಿ ಅಸ್ತಿತ್ವದಲ್ಲಿತ್ತು. ಕೊಡವರು ಜಾತಿಯೂ ಅಲ್ಲ, ಧರ್ಮವೂ ಅಲ್ಲ. ಈ ಮಹತ್ವವನ್ನು ಪರಿಗಣಿಸಿ, 1871-72 ರಿಂದ 1941ರ ರಾಷ್ಟ್ರೀಯ ಜನಗಣತಿಯವರೆಗೆ ಕೊಡವರನ್ನು ಪ್ರತ್ಯೇಕ ಜನಾಂಗೀಯ ಸಮುದಾಯ ಎಂದು ನಮೂದಿಸಲಾಗಿತ್ತು. ಅದರ ನಂತರ ಇಲ್ಲಿಯವರೆಗೆ ನಮ್ಮನ್ನು ದೊಡ್ಡ ಸಮುದಾಯದೊಂದಿಗೆ ವಿಲೀನಗೊಳಿಸಲಾಗಿದೆ. ಇದು ಕೊಡವರ ಭವಿಷ್ಯ, ಅದೃಷ್ಟ, ಅಸ್ತಿತ್ವ ಮತ್ತು ಗುರುತಿಗೆ ಮಾರಕವಾಗಿ ಪರಿಣಮಿಸಿದೆ.
ಒಂದು ರೀತಿಯಲ್ಲಿ ನಾವು 1956ರಲ್ಲಿ ನಮ್ಮ ಮಾತೃಭೂಮಿಯನ್ನು ಕಳೆದುಕೊಂಡೆವು. ಇನ್ನೊಂದು ರೀತಿಯಲ್ಲಿ 1941ರ ಜನಗಣತಿಯಲ್ಲಿ ನಮ್ಮ ಜನಾಂಗೀಯ ಗುರುತನ್ನು ಕಳೆದುಕೊಂಡೆವು. ಇದು ನಮಗೆ ಆದ ‘ದ್ವಿಮುಖ ಗುರುತಿನ ನಷ್ಟ’ ಎಂದು ನಾಚಪ್ಪ ಪ್ರತಿಪಾದಿಸಿದರು.ವಿಶ್ವವಿದ್ಯಾಲಯವೊಂದರ ವಿವಾದಾತ್ಮಕ ಇತಿಹಾಸಕಾರರೊಬ್ಬರು ಕೊಡವರ ಬಗ್ಗೆ ಕೀಳು ಮಟ್ಟದ ನಿರೂಪಣೆಗಳೊಂದಿಗೆ ಇತಿಹಾಸದ ವಿಕೃತ ಆವೃತ್ತಿಯನ್ನು ಸೃಷ್ಟಿಸಿದ್ದಾರೆ. ಅದನ್ನು ರದ್ದುಗೊಳಿಸಬೇಕು ಮತ್ತು ಅಂತಹವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದರು.ಸತ್ಯಾಗ್ರಹದಲ್ಲಿ ಚೋಳಪಂಡ ಜ್ಯೋತಿ ನಾಣಯ್ಯ, ಅಳಮಂಡ ಜೈ ಗಣಪತಿ, ಪಟ್ಟಮಾಡ ಕುಶ, ಅಜ್ಜಿಕುಟ್ಟೀರ ಲೋಕೇಶ್, ಮಂದಪಂಡ ಮನೋಜ್ ಮಂದಣ್ಣ, ಕಿರಿಯಮಾಡ ಶೆರಿನ್, ಅರೆಯಡ ಗಿರೀಶ್, ಅರೆಯಡ ಸಾವನ್ ಕೊಡವ, ಚೋಳಪಂಡ ನಾಣಯ್ಯ, ತೋಲಂಡ ಸೋಮಯ್ಯ, ನಂದಿನೆರವಂಡ ವಿಜು, ಮಣವಟ್ಟಿರ ಚಿಣ್ಣಪ್ಪ, ನಂದಿನೆರವಂಡ ಅಪ್ಪಯ್ಯ, ಮಣವಟ್ಟಿರ ಸ್ವರೂಪ್, ನಂದಿನೆರವಂಡ ಅಯ್ಯಣ್ಣ, ಮಣವಟ್ಟಿರ ನಂದ, ಪಾಲೆಕಂಡ ಪ್ರಧಾನ್ ಪೂಣಚ್ಚ, ಐತಿಚಂಡ ಪೂವಣ್ಣ, ಅಚ್ಚಕಾಳೇರ ನವೀನ್ ಮೊಣ್ಣಪ್ಪ ಹಾಗೂ ಕೂಪದಿರ ಸಾಬು ಪಾಲ್ಗೊಂಡಿದ್ದರು.