ಶ್ರದ್ಧಾ ಭಕ್ತಿಯೊಂದಿಗೆ ಯೋಗಿರಾಜ ಮಹಾರಾಜರ ಆರಾಧನೆ ಸಂಪನ್ನ

ಗದಗ: ತಾಲೂಕಿನ ಲಕ್ಕುಂಡಿ ಗ್ರಾಮದ ಶಂಕರ ದೇವಸ್ಥಾನದಲ್ಲಿ ಕಳೆದ ಮೂರು ದಿನಗಳಿಂದ ವಿಧಿ ವಿಧಾನಗಳೊಂದಿಗೆ ಹಲವಾರು ಧಾರ್ಮಿಕ ಕಾರ್ಯಕ್ರಮಗಳು ಹಾಗೂ ಭಕ್ತಿ ಸಂಗೀತದೊಂದಿಗೆ ಜರುಗಿದ ಯೋಗಿರಾಜ ಮಹಾರಾಜರ ಆರಾಧನೆ ಮಹೋತ್ಸವ ಸಂಪನ್ನಗೊಂಡಿತು.

ಆ ನಂತರ ನಡೆದ ಅವಭೃತ ಸ್ನಾನದ ಕಾರ್ಯಕ್ರಮ ಅತ್ಯಂತ ಸಂಭ್ರಮ ಹಾಗೂ ಶ್ರದ್ಧಾ ಭಕ್ತಿಯಿಂದ ನಡೆಯಿತು. ಕನ್ಯೆಯರ ಬಾವಿಯಲ್ಲಿಯ ಹನುಮಂತ ದೇವರಿಗೆ ಪೂಜೆ ಸಲ್ಲಿಸಿ ಪಲ್ಲಕ್ಕಿಯಲ್ಲಿ ಯೋಗಿರಾಜರ ಪಾದುಕೆಯನ್ನು ಮೆರವಣಿಗೆಯಲ್ಲಿ ತರುವುದರ ಮೂಲಕ ಶಂಕರ ದೇವಸ್ಥಾನದಲ್ಲಿ ಭಕ್ತಾಧಿಗಳು ಪಲ್ಲಕ್ಕಿಯ ಕೆಳಗೆ ಮಲಗಿಕೊಳ್ಳುವುದರ ಮೂಲಕ ತಮ್ಮ ಭಕ್ತಿ ಸಮರ್ಪಿಸಿದರು. ಈ ಸಂದರ್ಭದಲ್ಲಿ ಯೋಗಿರಾಜ ಮಹಾರಾಜ ಕೀ ಜೈ ಘೋಷಗಳು ಮೊಳಗಿದವು.

ಗಮನ ಸೆಳೆದ ಗಮಕ ವಾಚನ:

ಕೀರ್ತನ ಕೇಸರಿ ಕುರ್ತುಕೋಟಿಯ ದಿಗಂಬರ ಶಾಸ್ತ್ರೀ ಮಹಾಭಾರತದ ಕಥನದ ಕೀರ್ತನೆ ಗಮನ ಸೆಳೆಯಿತು. ರಾಜ್ಯ ಮಟ್ಟದ ಕಲಾವಿದರಾದ ಬೆಂಗಳೂರಿನ ಗೌರಿ ಕುಲಕರ್ಣಿ, ನರೇಗಲ್ಲದ ವೆಂಕಟೇಶ ಕುಲಕರ್ಣಿ, ಶ್ರೀಕಾಂತ ಹೂಲಿ, ಧಾರಾವಾಯಿ ನಟಿ ಹುಬ್ಬಳ್ಳಿಯ ಅರ್ಪಿತಾ ಜಹಗೀರದಾರ ಹಾಗೂ ರಾಜೇಶ್ವರಿ ಕುಲಕರ್ಣಿ ಭಕ್ತಿ ಸಂಗೀತವು ಮಂತ್ರ ಮುಗ್ಧರನ್ನಾಗಿಸಿತು. ಗದಗ ಹುಡ್ಕೋ ಕಾಲನಿಯ ಮಹಾಲಕ್ಷ್ಮೀ ಭಜನಾ ಮಂಡಳದ ಭಕ್ತಿಯ ಭಜನಾ ಹಾಡುಗಳು ಹಾಗೂ ಶಿಕ್ಷಕಿ ಭಾಗ್ಯಶ್ರೀ ಘಳಗಿ ಅವರು ರಚಿಸಿದ ದಾಸ ಶ್ರೇಷ್ಠ ಪುರಂದರ ದಾಸರು ನಾಟಕವು ಜನಮನ ಸೆಳೆಯಿತು.