ಇಂದಿನಿಂದ ಒಂಬತ್ತು ದಿನ ಯಾದವಾಡ ಗ್ರಾಮದೇವತೆಯರ ಜಾತ್ರೆ

ಧಾರವಾಡ: ಬರೋಬ್ಬರಿ 21 ವರ್ಷಗಳ ನಂತರ ಸಮೀಪದ ಯಾದವಾಡ ಗ್ರಾಮದಲ್ಲಿ ಮೇ 1 ರಿಂದ 9ರ ವರೆಗೆ ಗ್ರಾಮದೇವಿಯರ ಜಾತ್ರಾ ಮಹೋತ್ಸವ ಅರ್ಥಪೂರ್ಣವಾಗಿ ಆಚರಿಸಲಾಗುತ್ತಿದ್ದು, 9 ದಿನಗಳ ಕಾಲ ನಿತ್ಯ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.

ಮೂರು ದಿನ ಹೊನ್ನಾಟ: ಮೇ 3ರಂದು ರೋಣದ ಶ್ರವಣಕುಮಾರ ಸ್ವಾಮೀಜಿ ಹಾಗೂ ನಯಾನಗರ ಸ್ವಾಮೀಜಿ ಸಾನಿಧ್ಯದಲ್ಲಿ ಅಭಿಷೇಕ, ಕುಂಕುಮಾರ್ಚನೆ, ಹೋಮಹವನ ಹಾಗೂ ಹೊನ್ನಾಟ, ಮೇ 4 ಮತ್ತು 5ರಂದು ಚಂಡಿಕಾಹೋಮ ಹಾಗೂ ಹೊನ್ನಾಟ ನಡೆಯಲಿದೆ. ಮೇ 6 ರಂದು ಚಂಡಿಕಾಹೋಮ ಹಾಗೂ ಪಾದಗಟ್ಟಿ ಸ್ಥಾಪನೆ, ಮೇ 7ರಂದು ಚಂಡಿಕಾಹೋಮ ಮತ್ತು ಭಕ್ತರಿಂದ ಉಡಿ ತುಂಬುವ ಕಾರ್ಯಕ್ರಮವಿದೆ. ಮೇ 8ರಂದು ಚಂಡಿಕಾಹೋಮ ಹಾಗೂ ರಾತ್ರಿ ದೇವಿಯರು ಸೀಮೆಗೆ ಹೊರಡಲಿದ್ದಾರೆ. ಮೇ 9 ಬೆಳಗ್ಗೆ ಚಂಡಿಕಾಹೋಮ, ನವಕನ್ನಿಕೆಯರ ಪೂಜೆ, ಪೂರ್ಣಾಹುತಿ ಅಂತಹ ಧಾರ್ಮಿಕ ಕಾರ್ಯಕ್ರಮಗಳು ಜರುಗಲಿವೆ. ನಿತ್ಯ ರಾತ್ರಿ 8 ರಿಂದ ಅಮ್ಮಿನಬಾವಿ, ಉಪ್ಪಿನಬೆಟಗೇರಿ ಸೇರಿದಂತೆ ವಿವಿಧ ಮಠಾಧೀಶರಿಂದ ಆಶೀರ್ವಚನ ನಡೆಯಲಿದೆ.