ರಾಜ್ಯದಲ್ಲಿ ಮೇವಿಗೂ ಬರ: ಬೆಲೆ 3 ಪಟ್ಟು ಹೆಚ್ಚಳ

*ಸಿದ್ದು ಚಿಕ್ಕಬಳ್ಳೇಕೆರೆ

ಕಳೆದ ಎರಡು ವರ್ಷದಿಂದೀಚೆಗೆ ರಾಜ್ಯದಲ್ಲಿ ಸಂಭವಿಸಿದ ಅತಿವೃಷ್ಟಿ-ಅನಾವೃಷ್ಟಿಯಿಂದಾಗಿ ಬೆಳೆಹಾನಿ ಉಂಟಾಗಿ ಮೇವಿನ ಬೆಲೆ ಮೂರುಪಟ್ಟು ಹೆಚ್ಚಳವಾಗಿದ್ದು, ಜಾನುವಾರು ಇರುವವರು ಸಂಕಷ್ಟ ಅನುಭವಿಸುವಂತಾಗಿದೆ.

ಪಿಂಡಿ ಕಟ್ಟಿಸುವುದರಿಂದ ಶೇಖರಿಸಿಟ್ಟುಕೊಳ್ಳಲು, ಮಾರಾಟ ಮಾಡಲು ಅನುಕೂಲವಾಗಿದ್ದು, ಸಾಗಾಣಿಕೆಗೂ ಸುಲಭವಾಗಿದೆ. 2021ರಲ್ಲಿ ಎಲ್ಲೆಡೆಯೂ ಉತ್ತಮ ಮೇವು ಉತ್ಪಾದನೆ ಆಗಿದ್ದರಿಂದ 80ರಿಂದ 100 ರುಪಾಯಿಗೊಂದು ಪಿಂಡಿಯಂತೆ ರಾಗಿ ಹುಲ್ಲು ಮಾರಾಟವಾಗಿತ್ತು. 2022ರಲ್ಲಿ ಮಳೆಯಿಂದ ಬೆಳೆ ಹಾನಿ ಉಂಟಾಗಿ ಈ ಬೆಲೆ 150 ರಿಂದ 200 ರುಪಾಯಿಗೆ ಬಂದು ತಲುಪಿತ್ತು.ಆದರೆ ಪ್ರಸಕ್ತ ಸಾಲಿನಲ್ಲಿ ಬರಗಾಲದಿಂದಾಗಿ ಮೇವಿಗೆ ಭಾರೀ ಬೇಡಿಕೆ ಉಂಟಾಗಿದ್ದು, ಒಂದು ಪಿಂಡಿ ರಾಗಿ ಹುಲ್ಲು 500 ರಿಂದ 600 ರುಪಾಯಿವರೆಗೂ ಮಾರಾಟವಾಗುತ್ತಿದೆ. ಮಳೆಗೆ ಸಿಲುಕಿ ರಾಗಿಯು ಕಪ್ಪುಬಣ್ಣಕ್ಕೆ ತಿರುಗದೇ ಉತ್ತಮ ಗುಣಮಟ್ಟ ಹೊಂದಿದೆ. ಆದ್ದರಿಂದ ಮುಂದಿನ ದಿನಗಳಲ್ಲಿ ಇದು 800 ರುಪಾಯಿಗೆ ತಲುಪಿದರೂ ಆಶ್ಚರ್ಯವಿಲ್ಲ ಎನ್ನುತ್ತಾರೆ ವಹಿವಾಟಿನ ಅನುಭವ ಇರುವ ರೈತರು.

‘2022ರ ಬೇಸಿಗೆಯಲ್ಲಿ ಒಂದು ಕಟ್ಟು(ಸಣ್ಣ ಪಿಂಡಿ) ಬೇಸಿಗೆ ಜೋಳದ ಮೇವಿಗೆ 10ರಿಂದ 12 ರುಪಾಯಿ ಬೆಲೆಯಿತ್ತು. ಆದರೆ ಪ್ರಸಕ್ತ ಸಾಲಿನ ಬೇಸಿಗೆಯಲ್ಲಿ ಒಂದು ಕಟ್ಟಿಗೆ 32 ರುಪಾಯಿಗೆ ಈಗಾಗಲೇ ನಾನೇ ಮಾರಾಟ ಮಾಡಿದ್ದೇನೆ. ಮುಂಬರುವ ಬೇಸಿಗೆಯಲ್ಲಿ ಇದು 50 ರುಪಾಯಿ ತಲುಪಿದರೂ ಆಶ್ಚರ್ಯವಿಲ್ಲ ಎನ್ನುತ್ತಾರೆ ತರೀಕೆರೆ ತಾಲೂಕಿನ ರೈತರೊಬ್ಬರು.

ರಾಜ್ಯದಲ್ಲಿ ಸುಮಾರು 1.05 ಕೋಟಿ ಜನುವಾರುಗಳಿದ್ದು, ಅಧಿಕ ಮೇವಿನ ಅಗತ್ಯವಿದೆ. ಆದರೆ ಪ್ರಸಕ್ತ ಸಾಲಿನಲ್ಲಿ ಬರಗಾಲದಿಂದ 46.11 ಲಕ್ಷ ಹೆಕ್ಟೇರ್‌ನಲ್ಲಿದ್ದ ಕೃಷಿ ಬೆಳೆಗಳು ಹಾನಿಗೊಳಗಾಗಿವೆ. ಪ್ರಾರಂಭದಲ್ಲಿ ಹಸಿರು ಬರ ಎಂದು ಪರಿಗಣನೆಯಾಗಿದ್ದರೂ ನಂತರ ಬಿರುಬಿಸಿಲಿನಿಂದ ಭಾರೀ ಪ್ರಮಾಣದಲ್ಲಿ ಬೆಳವಣಿಗೆ ಕುಂಠಿತವಾಗಿದ್ದು, ಮೇವಿಗೆ ಬೇಡಿಕೆ ಹೆಚ್ಚಾಗಲು ಪ್ರಮುಖ ಕಾರಣವಾಗಿದೆ.

‘ಮೂರು ವರ್ಷದಿಂದೀಚೆಗೆ ರೈತರು ಅಡಿಕೆ ಮತ್ತು ತೆಂಗು ಬೆಳೆಗೆ ಪ್ರಾಮುಖ್ಯತೆ ನೀಡುತ್ತಿರುವುದರಿಂದ ಮೇವಿಗೆ ಬೇಡಿಕೆ ಹೆಚ್ಚಾಗುತ್ತಿದೆ’ ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಪಶುಸಂಗೋಪನೆ ಇಲಾಖೆಯ ಉನ್ನತ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ‘ಅಡಿಕೆ, ತೆಂಗು ಬೆಳೆಗಳಿಗೆ ರೈತರು ಪ್ರಾಮುಖ್ಯತೆ ನೀಡುತ್ತಿದ್ದು, ಹೊಲಗಳೆಲ್ಲಾ ತೋಟಗಳಾಗಿ ಮಾರ್ಪಾಡು ಆಗುತ್ತಿವೆ. ಅಗತ್ಯವಿರುವ ಮೇವನ್ನು ಖರೀದಿಸಿದರಾಯಿತು ಎಂಬ ಮನೋಭಾವವೂ ಮೇವು ದುಬಾರಿಯಾಗಲು ಒಂದು ಕಾರಣವಾಗಿದೆ’ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.