ಕಾಮನ್ವೆಲ್ತ್ ಗೇಮ್ಸ್: ರಾಜಾ ಮುತ್ತುಪಾಂಡಿ, ಜ್ಞಾನೇಶ್ವರಿಗೆ 2ನೇ ಸ್ಥಾನ । ಬಿಂದ್ಯಾರಾಣಿಗೆ ಕಂಚಿನ ಗರಿ । ಪದಕ ಗಳಿಕೆ 6ಕ್ಕೆ ಏರಿಕೆ
ಗ್ಲಾಸ್ಗೋ: ಕಾಮನ್ವೆಲ್ತ್ ಗೇಮ್ಸ್ನ ವೇಟ್ಲಿಫ್ಟಿಂಗ್(ಭಾರ ಎತ್ತುವ ಸ್ಪರ್ಧೆ) ವಿಭಾಗದಲ್ಲಿ ಭಾರತ ಪದಕ ಬೇಟೆ ಮುಂದುವರಿಸಿದೆ. ಭಾನುವಾರ ರಾತ್ರಿ ಹಾಗೂ ಸೋಮವಾರ ಈ ಸ್ಪರ್ಧೆಯಲ್ಲಿ ಭಾರತಕ್ಕೆ 2 ಬೆಳ್ಳಿ, 1 ಕಂಚಿನ ಪದಕಗಳು ಲಭಿಸಿದವು. ಇದು ವೇಟ್ಲಿಫ್ಟಿಂಗ್ನಲ್ಲಿ ಭಾರತಕ್ಕೆ ಬಂದ 5ನೇ ಪದಕ. ಒಟ್ಟಾರೆ ದೇಶ ಈಗ 1 ಚಿನ್ನ, 3 ಬೆಳ್ಳಿ, 2 ಕಂಚು ಸೇರಿ 6ಪದಕ ತನ್ನದಾಗಿಸಿಕೊಂಡಿದೆ.
ಭಾನುವಾರ ರಾತ್ರಿ ಪುರುಷರ 65 ಕೆ.ಜಿ. ವಿಭಾಗದಲ್ಲಿ ರಾಜಾ ಮುತ್ತುಪಾಂಡಿ ಒಟ್ಟು 286 ಕೆ.ಜಿ. ಭಾರ ಎತ್ತಿ ಬೆಳ್ಳಿ ಪಡೆದರು. ಸ್ನ್ಯಾಚ್ನಲ್ಲಿ 126 ಕೆ.ಜಿ. ಭಾರ ಎತ್ತಿದ ಅವರು, ಕ್ಲೀನ್ ಆ್ಯಂಡ್ ಜರ್ಕ್ನಲ್ಲಿ 160 ಕೆ.ಜಿ. ಲಿಫ್ಟ್ ಮಾಡುವ ಮೂಲಕ 2ನೇ ಸ್ಥಾನ ಪಡೆದುಕೊಂಡರು. ಮಲೇಷ್ಯಾದ ಮುಹಮ್ಮದ್ ಅಜ್ನಿಲ್(299 ಕೆ.ಜಿ.) ಚಿನ್ನ, ಪಪುವಾ ನ್ಯೂ ಗಿನಿ ದೇಶದ ಮೊರಿಯಾ ಬಾರು(282 ಕೆ.ಜಿ.) ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರು.
Related Articles
ಕೈತಪ್ಪಿದ ಚಿನ್ನ:
ಸೋಮವಾರ ಸಂಜೆ ಮಹಿಳೆಯರ 53 ಕೆ.ಜಿ. ವಿಭಾಗದಲ್ಲಿ ಜ್ಞಾನೇಶ್ವರಿ ಯಾದವ್ ಒಟ್ಟು 199 ಕೆ.ಜಿ. ಭಾರ ಎತ್ತಿ ಬೆಳ್ಳಿ ಪದಕ ಗೆದ್ದರು. 23 ವರ್ಷದ ಜ್ಞಾನೇಶ್ವರಿ ಸ್ನ್ಯಾಚ್ನಲ್ಲಿ 88 ಕೆ.ಜಿ. ಹಾಗೂ ಕ್ಲೀನ್ ಆ್ಯಂಡ್ ಜರ್ಕ್ನಲ್ಲಿ 111 ಕೆ.ಜಿ. ಭಾರ ಎತ್ತಿದರು. ಅವರು ಚಿನ್ನದ ನಿರೀಕ್ಷೆಯಲ್ಲಿದ್ದರೂ ಅದಕ್ಕೆ ನೈಜೀರಿಯಾದ ಒನೊಮೆ ಒಮೊಲೊಲಾ ಅವಕಾಶ ನೀಡಲಿಲ್ಲ. ಒನೊಮೆ ಒಟ್ಟು 206 ಕೆ.ಜಿ. ಭಾರ ಎತ್ತಿ, ಗೇಮ್ಸ್ನಲ್ಲಿ ಹೊಸ ದಾಖಲೆಯೊಂದಿಗೆ ಚಾಂಪಿಯನ್ ಆದರು.
ಬಿಂದ್ಯಾರಾಣಿಗೆ ಕಂಚು:
ಮಹಿಳೆಯರ 58 ಕೆ.ಜಿ. ವಿಭಾಗದಲ್ಲಿ ಬಿಂದ್ಯಾರಾಣಿ ಒಟ್ಟು 199 ಕೆ.ಜಿ. ಭಾರ ಎತ್ತಿ ಕಂಚು ತಮ್ಮದಾಗಿಸಿಕೊಂಡರು. ಅವರು ಸ್ನ್ಯಾಚ್ನಲ್ಲಿ 87 ಕೆ.ಜಿ., ಕ್ಲೀನ್ ಆ್ಯಂಡ್ ಜರ್ಕ್ನಲ್ಲಿ 112 ಕೆ.ಜಿ. ಭಾರ ಎತ್ತಿದರು.