ನರಕ ದರ್ಶನ ಎಚ್ಚರಿಕೆ ಬೆನ್ನಲ್ಲೇ ಟ್ರಂಪ್‌ ಸೂತ್ರಕ್ಕೆ ಹಮಾಸ್‌ ಅಸ್ತು

- ಟ್ರಂಪ್‌ ಮಧ್ಯಸ್ಥಿಕೆ: 2 ವರ್ಷದ ಗಾಜಾ ಯುದ್ಧ ಅಂತ್ಯದತ್ತ- ಇಸ್ರೇಲಿ ಒತ್ತೆಯಾಳುಗಳ ಬಿಡುಗಡೆಗೆ ಉಗ್ರರ ಒಪ್ಪಿಗೆ

- 2 ವರ್ಷಗಳಿಂದ 67 ಸಾವಿರ ಜನರ ಸಾವಿಗೆ ಕಾರಣವಾಗಿರುವ ಇಸ್ರೇಲ್‌- ಹಮಾಸ್‌ ಕದನ

- ಇಸ್ರೇಲ್‌ನಿಂದ ಒಪ್ಪಿಗೆ. ಆದರೆ ಹಮಾಸ್‌ನಿಂದ ಯಾವುದೇ ಪ್ರತಿಕ್ರಿಯೆ ಬಾರದ್ದರಿಂದ ಗೊಂದಲ

- ಇದರ ಬೆನ್ನಲ್ಲೇ ಟ್ರಂಪ್‌ ಸೂತ್ರಕ್ಕೆ ಹಮಾಸ್‌ ಒಪ್ಪಿಗೆ. ಒತ್ತೆಯಾಳುಗಳ ಬಿಡುಗಡೆ ಬಗ್ಗೆ ಘೋಷಣೆ

--

‘ವಿಶ್ವಾದ್ಯಂತ ಹಲವು ಯುದ್ಧಗಳನ್ನು ನಿಲ್ಲಿಸಿದೆ’ ಎಂದು ಹೇಳುತ್ತಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಇದೀಗ, ಸತತ 2 ವರ್ಷಗಳಿಂದ ನಡೆಯುತ್ತಿರುವ ಹಾಗೂ 67 ಸಾವಿರ ಜನರ ಸಾವಿಗೆ ಕಾರಣವಾಗಿರುವ ‘ಗಾಜಾ ಸಮರ’ಕ್ಕೆ ಬ್ರೇಕ್‌ ಹಾಕುವಲ್ಲಿ ಯಶಸ್ವಿಯಾದಂತೆ ಕಾಣುತ್ತಿದೆ. ಟ್ರಂಪ್ ಅವರ ಗಾಜಾ ಶಾಂತಿ ಸೂತ್ರಕ್ಕೆ ಹಮಾಸ್‌ ಉಗ್ರರು ಭಾಗಶಃ ಒಪ್ಪಿಗೆ ನೀಡಿದ್ದು, ಬಾಕಿ ಇರುವ ಎಲ್ಲ 48 ಇಸ್ರೇಲಿ ಒತ್ತೆಯಾಳುಗಳ ಬಿಡುಗಡೆಗೆ ಸಮ್ಮತಿ ಸೂಚಿಸಿದ್ದಾರೆ. ಇದರ ಬೆನ್ನಲ್ಲೇ ಗಾಜಾ ಮೇಲಿನ ದಾಳಿ ನಿಲ್ಲಿಸುವಂತೆ ಇಸ್ರೇಲ್‌ಗೆ ಟ್ರಂಪ್‌ ತಾಕೀತು ಮಾಡಿದ್ದಾರೆ. ಇಸ್ರೇಲ್‌ ಕೂಡ ಹಂತ ಹಂತವಾಗಿ ಶಾಂತಿ ಯೋಜನೆ ಜಾರಿ ಮಾಡುವುದಾಗಿ ಘೋಷಿಸಿದೆ.

ಈ ಶಾಂತಿ ಯತ್ನಕ್ಕೆ ಭಾರತ ಸೇರಿ ಜಗತ್ತಿನ ದೇಶಗಳಿಂದ ಸ್ವಾಗತ ವ್ಯಕ್ತವಾಗಿದೆ. ಭಾರತದ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್‌ ಮಾಡಿ, ‘ಗಾಜಾ ಶಾಂತಿ ಯತ್ನಗಳು ನಿರ್ಣಾಯಕ ಪ್ರಗತಿ ಸಾಧಿಸುತ್ತಿವೆ. ಇದನ್ನು ಸ್ವಾಗತಿಸುತ್ತೇವೆ. ಒತ್ತೆಯಾಳುಗಳ ಬಿಡುಗಡೆ ಸೂಚನೆಗಳು ಮಹತ್ವದ ಪ್ರಗತಿಯ ಸಂಕೇತ. ಶಾಶ್ವತ ಮತ್ತು ನ್ಯಾಯಯುತ ಶಾಂತಿಯ ಎಲ್ಲ ಯತ್ನಗಳನ್ನು ಭಾರತ ಸದಾ ಬೆಂಬಲಿಸುತ್ತದೆ’ ಎಂದಿದ್ದಾರೆ.

48 ಒತ್ತೆಯಾಳು ಬಿಡುಗಡೆ:

ಇದಕ್ಕೆ ಒಪ್ಪಿಕೊಂಡಿರುವ ಹಮಾಸ್‌, ‘ಈಗ ಜೀವಂತ ಇರುವ 20 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುತ್ತೇವೆ. ಜತೆಗೆ ಮೃತರಾಗಿರುವ ಇನ್ನೂ 28 ಜನರ ಮೃತದೇಹ ನೀಡುತ್ತೇವೆ. ಹೀಗೆ ಒಟ್ಟು 48 ಒತ್ತೆಯಾಳುಗಳನ್ನು (20 ಜೀವಂತ+28 ಮೃತ) 3 ದಿನಗಳಲ್ಲಿ ಹಸ್ತಾಂತರಿಸುತ್ತೇವೆ’ ಎಂದು ಹೇಳಿಕೆ ನೀಡಿದೆ. ಆದರೆ, ಶಸ್ತ್ರಾಸ್ತ್ರ ನಾಶ ಸೇರಿದಂತೆ ಟ್ರಂಪ್‌ ಅವರ ಇತರ ಸೂತ್ರಗಳ ಬಗ್ಗೆ ಹಮಾಸ್‌ ಇನ್ನೂ ಸಮ್ಮತಿಸಿಲ್ಲ. ಈ ಬಗ್ಗೆ ಮಾತುಕತೆಯ ಅಗತ್ಯವಿದೆ ಎಂದಷ್ಟೇ ಹೇಳಿದೆ.

ಇದಾದ ನಂತರ ಹಮಾಸ್‌, ಈವರೆಗೆ 148 ಜನರನ್ನು ಇಸ್ರೇಲ್‌ಗೆ ಒಪ್ಪಿಸಿದೆ. 51 ಜನರ ಶವಗಳನ್ನು ವಶಪಡಿಸಿಕೊಂಡಿದ್ದ ಇಸ್ರೇಲ್‌ ಸೇನೆ, 8 ಮಂದಿಯನ್ನು ಜೀವಂತವಾಗಿ ಕಾಪಾಡಿತ್ತು. ಸದ್ಯ 48 ಜನರು ಇನ್ನೂ ಹಮಾಸ್‌ ಒತ್ತೆ ಸೆರೆಯಲ್ಲಿದ್ದಾರೆ.

ಹಮಾಸ್‌ಗಳ ನಿರ್ಧಾರ ಸ್ವಾಗತಿಸಿರುವ ಟ್ರಂಪ್‌, ‘ಅವರು ಶಾಶ್ವತ ಶಾಂತಿಗೆ ಸಿದ್ಧರಾಗಿದ್ದಾರೆ ಎಂದು ಭಾವಿಸಿದ್ದೇನೆ’ ಎಂದಿದ್ದಾರೆ. ‘ಗಾಜಾ ಮೇಲೆ ದಾಳಿ ಮಾಡಬೇಡಿ’ ಎಂದು ಇಸ್ರೇಲ್‌ಗೆ ತಾಕೀತು ಮಾಡಿದ್ದಾರೆ. ‘ಇಸ್ರೇಲ್‌ ದಾಳಿ ನಿಲ್ಲಿಸಿದರೆ ಒತ್ತೆಯಾಳುಗಳನ್ನು ಆದಷ್ಟು ಬೇಗ ಸುರಕ್ಷಿತವಾಗಿ ಬಿಡುಗಡೆ ಮಾಡಬಹುದು. ಆ ಬಗ್ಗೆ ಈಗಾಗಲೇ ಚರ್ಚೆಯಲ್ಲಿ ತೊಡಗಿದ್ದೇವೆ. ಇದು ಗಾಜಾ ಮಾತ್ರವಲ್ಲ/ ಇಡೀ ಮಧ್ಯಪ್ರಾಚ್ಯದಲ್ಲಿ ಶಾಂತಿ ಸ್ಥಾಪನೆಗೆ ಅಗತ್ಯ’ ಎಂದು ಟ್ರಂಪ್‌, ‘ಟ್ರುಥ್‌ ಸೋಷಿಯಲ್‌ ಮೀಡಿಯಾ’ದಲ್ಲಿ ಹೇಳಿದ್ದಾರೆ.

ಟ್ರಂಪ್‌ ಆದೇಶಕ್ಕೆ ಒಪ್ಪಿಗೆ ಸೂಚಿಸಿರುವ ಇಸ್ರೇಲ್‌ ಪ್ರಧಾನಿ ನೆತನ್ಯಾಹು, ‘ನಾವು ಟ್ರಂಪ್‌ರ ಯೋಜನೆಯನ್ನು ಮೊದಲ ಹಂತದಲ್ಲಿ ಜಾರಿಗೊಳಿಸಲು ಸಿದ್ಧತೆಯಲ್ಲಿ ತೊಡಗಿದ್ದೇವೆ’ ಎಂದು ಹೇಳಿದ್ದಾರೆ. ಇದರ ಬೆನ್ನಲ್ಲೇ ಇಸ್ರೇಲಿ ಸೇನೆ ಕೂಡ ದಾಳಿ ನಿಲ್ಲಿಸಲು ಸಿದ್ಧತೆ ಮಾಡಿಕೊಳ್ಳುವಂತೆ ತನ್ನೆಲ್ಲ ಪಡೆಗಳಿಗೆ ಸೂಚನೆ ನೀಡಿದೆ. ಮೂಲಗಳ ಪ್ರಕಾರ ಶನಿವಾರದಿಂದ ಗಾಜಾ ಗಡಿಯಲ್ಲಿ ಇಸ್ರೇಲಿ ಸೇನೆ ಕೇವಲ ದೇಶರಕ್ಷಣೆಗೆ ಕಾವಲು ಕಾಯಲು ಆರಂಭಿಸಿದೆ ಹಾಗೂ ದಾಳಿಯಿಂದ ಹಿಂದೆ ಸರಿದಿದೆ.