ಎಂಡೋ ಪೀಡಿತ ಮಹಿಳೆಯರಿಗೆ ‘ಹೊಸಬೆಳಕು’

ರಾಂ ಅಜೆಕಾರು

ಕರಾವಳಿ ಜಿಲ್ಲೆಗಳಲ್ಲಿನ ಎಂಡೋಸಲ್ಫಾನ್ ಪೀಡಿತ ಮಹಿಳೆಯರನ್ನು ಕಾರ್ಕಳ ತಾಲೂಕಿನ ಬೈಲೂರಿನಲ್ಲಿ ‘ಹೊಸಬೆಳಕು’ ಆಶ್ರಮದಲ್ಲಿ ಸೇರಿಸಿಕೊಳ್ಳಲು ಯೋಜನೆ ರೂಪಿಸಿಕೊಳ್ಳಲಾಗಿದೆ. ಈಗಾಗಲೇ ಜಾಗ ಖರೀದಿಸಿದ್ದು, ಜೂನ್‌ ಮೊದಲ ವಾರದಲ್ಲಿ ಸಂತ್ರಸ್ತ ಮಹಿಳೆಯರು ಸೇರಬಹುದಾಗಿದೆ.

ಭಾನುವಾರ ಕಟ್ಟಡ ನಿರ್ಮಾಣಕ್ಕೆ ಶಂಕುಸ್ಥಾಪನೆ ನೆರವೇರಿದ್ದು, ಉಡುಪಿ ಜಿಲ್ಲಾಧಿಕಾರಿ ಡಾ. ಕೆ. ವಿದ್ಯಾಕುಮಾರಿ, ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ. ರವೀಂದ್ರನಾಥ್ ಶಾನು ಭೋಗ್ ಹಾಗೂ ಮನೋವೈದ್ಯ ಡಾ.ಪಿ.ವಿ. ಭಂಡಾರಿ ಇದ್ದರು.

ಎಂಡೋಸಲ್ಫಾನ್ ದುರಂತದಲ್ಲಿ ಸುಮಾರು ೩೦೦೦ ಮಂದಿ ಸಂತ್ರಸ್ತರು ಈಗಾಗಲೇ ಕ್ಯಾನ್ಸರ್, ಎಪಿಲೆಪ್ಸಿ ಮುಂತಾದ ರೋಗಗಳಿಂದ ನರಳಿ ಮೃತಪಟ್ಟಿದ್ದಾರೆ. ಬದುಕುಳಿದ ೮೬೦೦ ಪೀಡಿತರಲ್ಲಿ ನಾಲ್ಕು ಸಾವಿರಕ್ಕೂ ಅಧಿಕ ಬಾಧಿತರು ಹೆಣ್ಣು ಮಕ್ಕಳಾಗಿದ್ದು, ಸುಮಾರು ೯೦೦ ಮಂದಿಯಷ್ಟು ಶೇ.೮೦ಕ್ಕೂ ಅಧಿಕ ಅಂಗವಿಕಲತೆಯುಳ್ಳವರಾಗಿದ್ದಾರೆ. ಇದರಲ್ಲಿ ಹೆಚ್ಚಿನ ಹೆಣ್ಣುಮಕ್ಕಳು ಸುಮಾರು ೧೦ ರಿಂದ ೪೦ ವರ್ಷದೊಳಗಿನವರಾಗಿದ್ದಾರೆ.

ಎಂಡೋಸಸಲ್ಪಾನ್ ಕ್ರಿಮಿನಾಶಕವಾಗಿದ್ದು, ಬಿಳಿ ನೊಣಗಳು, ಗಿಡ ಹೇನುಗಳು, ಜೀರುಂಡೆಗಳು ಮತ್ತು ಎಲೆಕೋಸು ಹುಳುಗಳು ಸೇರಿದಂತೆ ಕೀಟಗಳನ್ನು ನಿಯಂತ್ರಿಸಲು ಬಳಸಲಾಗುತ್ತದೆ. ಇದನ್ನು ಜೇನುನೊಣಗಳಿಗೆ ಮಾನವಕುಲಕ್ಕೆ ವಿಷಕಾರಿ ಎಂದು ಪರಿಗಣಿಸಲಾಗಿದೆ. ೧೯೮೦ರಿಂದ ಸುಮಾರು ೨೦ ವರ್ಷ ಕರ್ನಾಟಕ ಗೇರು ಅಭಿವೃದ್ಧಿ ನಿಗಮವು ಕರಾವಳಿಯ ಗೇರು ತೋಟಗಳಿಗೆ ಟನ್‌ಗಟ್ಟಲೆ ಎಂಡೋಸಲ್ಫಾನ್ ಕೀಟನಾಶಕ ಸುರಿದಿದ್ದರು.

ಕಾರ್ಕಳ ತಾಲೂಕಿನ ಕಾಂತಾವರ-13, ಇರ್ವತ್ತೂರು-6, ಸಾಣೂರು-17, ಮಿಯ್ಯಾರ್ -23, ಕೌಡೂರು-21, ಅಂಡಾರು-9, ಕಡ್ತಲ-7, ಎಳ್ತಾರೆ-5, ಕೆರ್ವಾಶೆ-25, ಶಿರ್ಲಾಲು-8, ಈದು-28, ಮುಲ್ಲಡ್ಕ-1, ಕಾರ್ಕಳ ಪುರಸಭೆ-1, ಹೆಬ್ರಿ ತಾಲೂಕಿನ ಶಿವಪುರ-14 ಎಂಡೋಸಂತ್ರಸ್ತರಿದ್ದಾರೆ. ಅವರಲ್ಲಿ ಅಂಗವೈಕಲ್ಯತೆಯಲ್ಲಿ ಶೇ.25ಕ್ಕಿಂತ ಕಡಿಮೆ-12 ಜನ, ಶೇ.60ಕ್ಕಿಂತ ಕಡಿಮೆ-38 ಜನ, ಶೇ.60ಕ್ಕಿಂತ ಹೆಚ್ಚು-128 ಜನ ಇದ್ದಾರೆ.

ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳ ೪೫೦ಕ್ಕೂ ಹೆಚ್ಚಿನ ಹಳ್ಳಿಗಳಲ್ಲಿ ೧೨,೦೦೦ಕ್ಕಿಂತಲೂ ಅಧಿಕ ಮಂದಿ ಎಂಡೋಬಾಧಿತರಾಗಿದ್ದಾರೆ. ಗರ್ಭದಲ್ಲಿರುವ ಶಿಶುಗಳ ಮೇಲೆ ಎಂಡೋಸಲ್ಫಾನ್ ಬೀರಿದ ದುಷ್ಪರಿಣಾಮಗಳಿಂದಾಗಿ ಸಹಸ್ರಾರು ಮಕ್ಕಳು ಹುಟ್ಟಿನಿಂದಲೇ ಅಂಗವಿಕಲರಾಗಿ, ವಿಕಲಚೇತನರಾಗಿ ಬಳಲುತ್ತಿದ್ದು, ಹಿರಿಯರು ಕ್ಯಾನ್ಸರ್, ಅಸ್ತಮಾ, ಮೂರ್ಚೆರೋಗ, ಖಿನ್ನತೆ ಹಾಗೂ ಹಾರ್ಮೋನ್ ಸಂಬಂಧಿತ ರೋಗಗಳಿಂದ ಬಳಲುತ್ತಿದ್ದಾರೆ. ಈಗಾಗಲೇ ಈ ದುರಂತದಲ್ಲಿ ಸುಮಾರು ಮೂರು ಸಾವಿರಕ್ಕಿಂತಲೂ ಅಧಿಕ ಮಂದಿ ಸಾವಿಗೀಡಾಗಿದ್ದಾರೆ.

ಎಂಡೋ ಸಂತ್ರಸ್ತರಿಗೆ ನೆರವು ನೀಡುವ ಸಲುವಾಗಿ ಉಡುಪಿಯ ಮಾನವಹಕ್ಕುಗಳ ರಕ್ಷಣಾ ಪ್ರತಿಷ್ಠಾನ ಹಾಗೂ ಇತರರು ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಿದ ದೂರು ಅರ್ಜಿ ಅನುಸರಿಸಿ ೨೦೧೧ರಲ್ಲಿ ನ್ಯಾಯಾಲಯ ಇಡೀ ದೇಶದಲ್ಲಿ ಎಂಡೋಸಲ್ಫಾನ್ ಉಪಯೋಗ ಹಾಗೂ ಮಾರಾಟವನ್ನು ನಿಷೇಧಿಸಿತು. ಆ ಬಳಿಕ ೨೦೧೩ರಲ್ಲಿ ಉಚ್ಚ ನ್ಯಾಯಾಲಯವನ್ನು ಆಶ್ರಯಿಸಿದ ಪ್ರತಿಷ್ಠಾನವು ಈ ದುರಂತದಲ್ಲಿ ಜೀವಂತವಾಗಿ ಉಳಿದಿರುವ ಸುಮಾರು ೮,೬೦೦ಮಂದಿ ಸಂತ್ರಸ್ತರಿಗೆ ಮಾಸಾಶನ ದೊರಕಿಸುವಲ್ಲಿ ಸಫಲವಾಯಿತು.

...........................