ನೀರಿನ ಸೆಲೆ ಬತ್ತಿ ಜನ- ಜಾನುವಾರಿಗೆ ಎದುರಾಗಿದೆ ಸಂಕಷ್ಟ

ಕಡೂರು ಕೃಷ್ಣಮೂರ್ತಿ.

ಬರಗಾಲದ ಸೆರಗನ್ನು ಹೊದ್ದಿರುವ ಕಡೂರು ತಾಲೂಕಿನ ಅನೇಕ ಗ್ರಾಮಗಳಲ್ಲಿ ನೀರಿನ ಸೆಲೆ ಬತ್ತಿ ಕೆರೆಕಟ್ಟೆಗಳು ಬರಿದಾಗಿ ಜನ- ಜಾನುವಾರುಗಳಿಗೆ ಕುಡಿವ ನೀರಿನ ಸಂಕಷ್ಟ ಎದುರಾಗಿದೆ.

ಕಳೆದ 2014ರಲ್ಲಿ ತಾಲೂಕಿನಲ್ಲಿ ಬರದ ಗಂಭೀರ ಸ್ಥಿತಿ ತಲೆದೋರುವ ಮೂಲಕ ಗ್ರಾಮೀಣ ಭಾಗದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಿಗಡಾಯಿಸಿ ದನಕರುಗಳಿಗೆ ನೀರು- ಮೇವಿನ ಅಭಾವವೂ ಉಂಟಾಗಿತ್ತು.

ಆದರೆ ಈ ಬಾರಿ ಬಿರು ಬೇಸಿಗೆ ಉಷ್ಣತೆ ಹೆಚ್ಚಳವಾಗುವ ಮೂಲಕ ಕೆರೆಕಟ್ಟೆಗಳು ಬರಿದಾಗಿದ್ದು ಕುಡಿಯುವ ನೀರಿಗೆ ಮತ್ತಷ್ಟು ಸಂಕಷ್ಟ ತಂದೊಡ್ಡಿದೆ. ಕಡೂರು ತಾಲೂಕಿನ 60 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯ ಗ್ರಾಮಗಳ ಅಂತರ್ಜಲ ಮಟ್ಟ 600 ರಿಂದ 1 ಸಾವಿರ ಅಡಿ ತಲುಪುತ್ತಿದ್ದು, ನೀರು ಸಿಗದ ಸ್ಥಿತಿ ಕಂಡು ಬರುತ್ತಿದೆ.

ಅಂತರ್ಜಲ ಕಡಿಮೆಯಾಗಿರುವ ಕಾರಣ ಇನ್ನಷ್ಟು ಆಳಕ್ಕೆ ಕೊರೆದು ನೀರು ಕೊಡುವ ಕಾರ್ಯ ನಡೆಯುತ್ತಿದೆ. ತಾಲೂಕಿನ ಜೋಡಿ ತಿಮ್ಮಾಪುರ ಗ್ರಾಮದಲ್ಲಿ ಅಂತರ್ಜಲ ಮಟ್ಟ ಸಾವಿರ ಅಡಿಗೆ ಕುಸಿದು ಕೊಳವೆ ಬಾವಿ ವಿಫಲಗೊಂಡಿರುವ ಕಾರಣ ಟ್ಯಾಂಕರ್ ಗಳಲ್ಲಿ ಕುಡಿಯುವ ನೀರು ನೀಡಲಾಗುತ್ತಿದೆ. ತಾಲೂಕು ಆಡಳಿತದಿಂದ ಅಗತ್ಯ ಕ್ರಮಕ್ಕೆ ಮುಂದಾಗಿದ್ದು, ನೀರಿಲ್ಲದೆ ಗಂಭೀರ ಸ್ಥಿತಿ ತಲೆ ದೋರಿರುವ ಕಡೆ ಹೊಸ ಕೊಳವೆ ಭಾವಿ ಕೊರೆಸಲು ಮುಂದಾಗುತ್ತಿದೆ.

ಹಿಂದೆ ಮುಂಗಾರು ಮಳೆ ಕೈಕೊಟ್ಟಿದ್ದು ಯಾವುದೇ ಬೆಳೆಗಳನ್ನು ಮಾಡಲಾಗದೆ ರೈತರು ಕೈಚೆಲ್ಲಿ ಕುಳಿತಿದ್ದಾರೆ. ಒಟ್ಟಾರೆ ಬರ ಪರಿಸ್ಥಿತಿ ಜೊತೆ ಕುಡಿಯುವ ನೀರಿನ ಸಮಸ್ಯೆ ದಿನ ಕಳೆದಂತೆ ಹೆಚ್ಚಾಗುತ್ತಿದೆ. .

ಕುಡಿಯುವ ನೀರಿನ ಸಮಸ್ಯೆ ಕುರಿತಂತೆ ಜಿಲ್ಲಾಧಿಕಾರಿ ಕಡೂರು ತಾಲೂಕಿಗೆ ಭೇಟಿ ನೀಡಿ ಅಗತ್ಯ ಮಾರ್ಗದರ್ಶನ ನೀಡಿದ್ದು ನೀರಿನ ತೀವ್ರತೆ ಇರುವ ಕಡೆ ಪರ್ಯಾಯ ಕ್ರಮಗಳನ್ನು ಕೈಗೊಂಡು ನೀರು ಕೊಡುವ ಕ್ರಮಕ್ಕೆ ಮುಂದಾಗಿದ್ದೇವೆ. ತಾಲೂಕಿನ 64 ಗ್ರಾಮಗಳಲ್ಲಿ ಸಮಸ್ಯೆ ಇರುವುದನ್ನು ಪಟ್ಟಿ ಮಾಡಿದ್ದು, 60 ಪಂಚಾಯತಿ ವ್ಯಾಪ್ತಿಗಳಲ್ಲಿ ಗಂಭೀರ ಸ್ಥಿತಿ ತಲೆದೋರಿರುವ ಕಡೆ ಹೆಚ್ಚಿನ ಗಮನ ಹರಿಸಲಾಗುತ್ತಿದೆ. ನೀರಿನ ತೀವ್ರತೆ ಇರುವ ಜೋಡಿ ತಿಮ್ಮಾಪುರ ಗ್ರಾಮಕ್ಕೆ ಟ್ಯಾಂಕರ್ ಮೂಲಕ ನೀರು ನೀಡಲಾಗುತ್ತಿದೆ. ಸರಸ್ವತಿಪುರ ಗ್ರಾಮಕ್ಕೆ ಹುಲಿಗೊಂದಿರಾಯ ಕೆರೆಯಿಂದ ಪೈಪ್ ಲೈನ್ ಮೂಲಕ ನೀರು ನೀಡಲು ಪೈಪ್‌ ಅಳ‍ವಡಿಕೆ ಕಾರ್ಯ ನಡೆಯುತ್ತಿದೆ. ನೀರು ಸಿಗದೆ ವಿಫಲವಾಗಿರುವ ಕಡೆ ಹೊಸ ಬೋರ್ವೆಲ್ ಕೊರೆಸಲಾಗುವುದು.

ಹೇಳಿಕೆ---ಬಳಸುವುದಕ್ಕಿಂತ ಕುಡಿಯಲು ನೀರು ಸಿಕ್ಕಿದರೆ ಸಾಕು ಎನ್ನುವಂತಾಗಿದೆ. ನಮ್ಮ ಈ ದೊಡ್ಡ ಗ್ರಾಮದಲ್ಲಿ ನೀರಿನ ಸೆಲೆ ಕಡಿಮೆಯಾಗಿ ಕೊಳವೆ ಬಾವಿಗಳಲ್ಲಿ ನೀರಿಲ್ಲ ಕರೆಂಟ್ ಇದ್ದರೆ ಮಾತ್ರ ನೀರು. ಇಲ್ಲದೇ ಹೋದಲ್ಲಿ ಅದೂ ಸಿಗುವುದಿಲ್ಲ.

ಸರಸ್ವತಿಪುರ.