ರೋಣದಲ್ಲೊಂದು ಅಪರೂಪದ ಅರಸು ಬೇವಿನಮರ ಪತ್ತೆ !

ಪಿ.ಎಸ್.ಪಾಟೀಲ ರೋಣ

ಅರಸು ಮನೆತನದರು ಈ ಬೇವಿನ ಮರವನ್ನು ಶಕ್ತಿ ದೇವತೆ ಪ್ರತೀಕವಾಗಿ ಬೆಳೆಸಿ ಪೂಜಿಸುತ್ತಿದ್ದರು ಎನ್ನುವ ಕಾರಣಕ್ಕೆ ಇದಕ್ಕೆ "ಅರಸು ಬೇವಿನ ಮರ " ಎನ್ನುವ ಹೆಸರು ಚಾಲ್ತಿಯಲ್ಲಿದೆ.

ಅರಸು ಕುಟುಂಬ ಪೂಜೆ: ಈ ಹಿಂದೆ ರಾಜ್ಯ, ಪ್ರಾಂತ, ಪರಗಣಗಳಾಗಿ ವಿಂಗಡಿಸಿಕೊಂಡು ಆಳ್ವಿಕೆ ನಡೆಸಿದ ರಾಜಮನೆತನದವರು ತಮ್ಮ ವಾಡೆ, ಕೋಟೆ, ಅರಮನೆ ಆವರಣದಲ್ಲಿ ಈ ಬೇವಿನಮರ ಬೆಳೆಸುತ್ತಿದ್ದರು ಎನ್ನಲಾಗಿದೆ. ಈ ಮರ ರಾಜಮನೆತನದವರಿಗೆ ಪೂಜ್ಯನೀಯ ಮತ್ತು ಶಕ್ತಿ ದೇವತೆ ಸ್ವರೂಪವಾಗಿತ್ತು. ನವ ದುರ್ಗೆಯರು ನೆಲೆಸಿದ ದೈವಿಕ ಮರವಿದು. ಮಹಾನವಮಿಯಲ್ಲಿ ಈ ಮರಕ್ಕೆ ವಿಶೇಷ ಪೂಜೆ ಸಲ್ಲಿಸುತ್ತಿದ್ದರು. ಯುದ್ದಕ್ಕೆ ತೆರಳುವ ಸಂದರ್ಭದಲ್ಲಿ ತಾಯಿ ಅಥವಾ ಪತ್ನಿ ಈ ಮರದಲ್ಲಿ ನೆಲೆಸಿದ ನವ ದುರ್ಗೆಯರಿಗೆ ಪೂಜಿಸಿ, ಆರತಿ ಬೆಳಗಿ, ಯುದ್ದದಲ್ಲಿ ವಿಜಯಶಾಲಿಯಾಗುವಂತೆ ಬೇಡಿಕೊಳ್ಳುತ್ತಿದ್ದರು. ರಾಜಮನೆತನದವರು ಪ್ರತಿಯೊಂದು ಶುಭ ಕಾರ್ಯಕ್ಕೂ ಮುಂಚೆ ಪೂಜೆ ಮಾಡುವ ಈ ಮರ ಇದು. ಉತ್ತರ ಮತ್ತು ದಕ್ಷಿಣ ಭಾರತದಲ್ಲಿ ಸದ್ಯಕ್ಕೆ ಈ ರೀತಿಯ ಮರ ಕಾಣುವುದು ಅತೀ ವಿರಳ.

ಅರಸು ಬೇವಿನಮರ ಅತ್ಯಂತ ಅಪರೂಪ, ವಿಶಿಷ್ಟವಾಗಿದ್ದು, ರಾಜಮನೆತನದವರು ಶಕ್ತಿದೇವತೆ ನವದುರ್ಗೆಯರ ಪ್ರತೀಕವಾಗಿ ಈ ಬೇವಿನಮರ ಪೂಜಿಸುತ್ತಿದ್ದರು. ಸದ್ಯ‌ ಎಲ್ಲಿಯೂ ಸಿಗದಿರುವ ಈ ಬೇವಿನಮರದ ಸಂತತಿ ಉಳಿಯಬೇಕಿದೆ. ಈ ದಿಶೆಯಲ್ಲಿ ಅರಣ್ಯ ಇಲಾಖೆ, ಪರಿಸರ ಪ್ರೇಮಿಗಳು, ಪರಿಸರ ತಜ್ಞರು ಗಮನ ಹರಿಸಬೇಕಿದೆ ಎಂದು ಪುರಸಭೆ ಸದಸ್ಯ ಮಲ್ಲಯ್ಯ ಗುರಬಸಪ್ಪನಮಠ ತಿಳಿಸಿದ್ದಾರೆ.