ಹಾನಗಲ್ಲ ಆನಿಕೆರೆ ಕಾಲುವೆ ಕಾಮಗಾರಿ ಅವೈಜ್ಞಾನಿಕ?

ಮಾರುತಿ ಶಿಡ್ಲಾಪೂರ

ಪಟ್ಟಣಕ್ಕೆ ಕುಡಿಯುವ ನೀರಿನ ಜಲಮೂಲವಾದ ಆನಿಕೆರೆ ಹಿನ್ನೀರಿನ ಬಯಲಿನಿಂದ ಅಚಗೇರಿ ಕೆರೆವರೆಗೆ ರಾಜ್ಯ ವಿಪತ್ತು ನಿರ್ವಹಣಾ ಯೋಜನೆಯಡಿಯಲ್ಲಿ ₹೫ ಕೋಟಿ ವೆಚ್ಚದಲ್ಲಿ ನಡೆದಿರುವ ಕಾಮಗಾರಿಯಲ್ಲಿ ಕಾಲುವೆಗಳನ್ನು ಎತ್ತರಿಸುವುದು ಹಾಗೂ ಮನೆಗಳ ಹಿಂಭಾಗದ ಕಾಲುವೆಗಳಿಗೆ ಸ್ಲ್ಯಾಬ್ ಅಳವಡಿಸುವ ಅಗತ್ಯವಿದ್ದು, ಯೋಜನೆ ಪರಿಷ್ಕರಿಸಲು ಆಗ್ರಹ ಕೇಳಿಬಂದಿದೆ.

ಆನಿಕೆರೆ ಹಿನ್ನೀರಿನ ಪ್ರದೇಶದಲ್ಲಿ ಕಾಲುವೆಯ ಎತ್ತರ ೫ ಅಡಿ ಎನ್ನಲಾಗಿದೆ. ಆದರೆ ಭಾರೀ ಮಳೆ ಸಂದರ್ಭದಲ್ಲಿ ಆನಿಕೆರೆಯ ಹಿನ್ನೀರು ಈ ಕಾಂಕ್ರಿಟ್‌ ಕಾಲುವೆಯ ಎತ್ತರಕ್ಕಿಂತ ಹೆಚ್ಚು ಎತ್ತರಕ್ಕೆ ಬಂದು ನಿಲ್ಲುವ ಸಂದರ್ಭಗಳಿವೆ. ಈ ಕಾರಣಕ್ಕಾಗಿ ಇದೇ ಪಟ್ಟಣದಿಂದ ಬರುವ ಕೊಳಚೆ ನೀರು ಮತ್ತೆ ಆನಿಕೆರೆ ಸೇರುವುದೆಂಬ ಆತಂಕವಿದೆ.

ಕಾಲುವೆಯ ಒಂದು ಗೋಡೆ ಇನ್ನೆರಡು ಅಡಿ ಎತ್ತರಿಸಿದರೆ ಮಾತ್ರ ಇದು ಶಾಶ್ವತ ಪರಿಹಾರವಾಗಬಲ್ಲದು. ಈಗ ಯೋಜನೆ ಪರಿಷ್ಕರಿಸಿ ಕಾಮಗಾರಿ ಪೂರ್ಣಗೊಳಿಸಬೇಕು ಎಂಬ ಒತ್ತಾಯ ಕೇಳಿ ಬಂದಿದೆ.

ಈ ಕಾಮಗಾರಿ ಸರ್ವೇ ಸಂದರ್ಭದಲ್ಲಿಯೇ ಈ ಕಾಂಕ್ರಿಟ್‌ ಕಾಲುವೆ ಎತ್ತರದ ಬಗೆಗೆ ಇಲ್ಲಿನ ರೈತರು ಸಾರ್ವಜನಿಕರು ಅಧಿಕಾರಿಗಳ ಗಮನ ಸೆಳೆದಿದ್ದೆವು. ಅಧಿಕಾರಿಗಳು ಹೇಳುವುದಕ್ಕೂ ವಾಸ್ತವಕ್ಕೂ ಹೊಂದಾಣಿಕೆ ಆಗುತ್ತಿಲ್ಲ. ಆದ್ದರಿಂದ ಈ ಕಾಲುವೆಯ ಎತ್ತರವನ್ನು ಈಗಿರುವ ೫ ಅಡಿಗಿಂತ ಆರೇಳು ಅಡಿವರೆಗೆ ವಿಸ್ತರಿಸಬೇಕು. ಅಂದಾಗ ಮಾತ್ರ ಇದು ಪೂರ್ಣ ಪ್ರಮಾಣದ ಕೊಳಚೆ ಮುಕ್ತ ಆಗಲು ಸಾಧ್ಯ ಎಂದು ಹಾನಗಲ್ಲ ನಾಗರಿಕ ಸುನೀಲ ಬಂಕನಾಳ ಹೇಳಿದರು.