ಬಮ್ಮಿಗಟ್ಟಿ ಸರ್ಕಾರಿ ಶಾಲೆ ಮಕ್ಕಳಿಗೆ ವಕ್ಫ್ ಭಯ!

ಮಲ್ಲಿಕಾರ್ಜುನ ಸಿದ್ದಣ್ಣವರ

ಮಳೆಗಾಲ ಶುರುವಾದರೆ ಈ ಮಕ್ಕಳು ಶಾಲೆಗೆ ಹೋಗಲು ಹಿಂದೇಟು ಹಾಕುತ್ತಾರೆ. ಕಾರಣ ತಮ್ಮ ಶಾಲೆ ಎದುರಿಗಿರುವ ಕೆಸರು, ಕಸ, ಪೊದೆಯಂಥ ಕಂಟಿಗಳಲ್ಲಿ ವಾಸವಾಗಿರುವ ವಿಷ ಸರ್ಪಗಳು ಆಗಾಗ ಶಾಲೆಗೆ ನುಗ್ಗುತ್ತಿರುವುದು!

ವಕ್ಫ್ ಆಸ್ತಿ ಕಿರಿಕಿರಿ: ಈ ಶಾಲಾ ಮೈದಾನಕ್ಕೆ ಅಂಟಿಕೊಂಡು ವಕ್ಫ್ ಬೋರ್ಡ್‌ಗೆ ಸೇರಿದ ರಿಸನಂ-6ರ 13 ಗುಂಟೆಯ ಕೋಲು ಪಟ್ಟಿ ಇದೆ. ಸರಿಯಾದ ನಿರ್ವಹಣೆ ಇಲ್ಲದೇ ಅಲ್ಲಿ ನೀರು ನಿಂತು ಅಕ್ಷರಶಃ ಕೊಳಚೆಯಾಗಿದೆ. ಕಸ, ಕಂಟಿಗಳು ಅಪಾರವಾಗಿ ಬೆಳೆದಿವೆ. ಅದೀಗ ವಿಷಜಂತುಗಳ ಆವಾಸ ಸ್ಥಾನವಾಗಿ ಮಾರ್ಪಟ್ಟಿದೆ. ಸದಾ ಕೊಳಚೆ ನಿಲ್ಲುವುದರಿಂದ ರೋಗರುಜಿನಗಳ ತಾಣವಾಗಿದೆ.

ಈ ಶಾಲೆಯಲ್ಲಿ ಹಿಂದೂ-ಮುಸ್ಲಿಂ ಸೇರಿದಂತೆ ಎಲ್ಲ ಧರ್ಮೀಯ, ಎಲ್ಲ ಸಮುದಾಯಗಳ ಮಕ್ಕಳು ಓದುತ್ತಿದ್ದಾರೆ. ಹಾಗಾಗಿ ಶಾಲೆ ಮಕ್ಕಳ ಹಿತದೃಷ್ಟಿಯಿಂದ ಮುಸ್ಲಿಂ ಸಮುದಾಯದವರು ಈ ಕೋಲುಪಟ್ಟಿಯಲ್ಲಿ ಸುಮಾರು ವರ್ಷಗಳಿಂದ ಶವಗಳನ್ನು ಹೂಳುತ್ತಿಲ್ಲ. ಆದರೆ, ಅದರ ಸರಿಯಾದ ನಿರ್ವಹಣೆಯನ್ನೂ ಯಾರೂ ಮಾಡುತ್ತಿಲ್ಲ. ಹಾಗಾಗಿ ವಿಷಜಂತುಗಳ ಆವಾಸಸ್ಥಾನವಾಗಿ ಅದು ಮಕ್ಕಳಲ್ಲಿ ಭಯ ಹುಟ್ಟಿಸಿದೆ.

ಈ ಮನವಿಗೆ ಸ್ಪಂದಿಸಿದ ವಕ್ಫ್ ಬೋರ್ಡ್ ಅಧಿಕಾರಿ ಗ್ರಾಮದಲ್ಲಿನ ಉಭಯ ಧರ್ಮೀಯರ ಸಮ್ಮತವಿದ್ದರೆ, ಸೌಹಾರ್ದಯುತವಾಗಿ ಸರ್ಕಾರಿ ಶಾಲೆಗೆ ಈ ಜಾಗೆ ಬಳಸಿಕೊಳ್ಳುವುದಾದರೆ ನಮ್ಮದೇನೂ ಅಭ್ಯಂತರವಿಲ್ಲ ಎಂದು ಸಮ್ಮತಿ ಸೂಚಿಸಿದ್ದಾರೆ.

ಶಾಲೆಗೆ 5 ಎಕರೆ ದಾನ: ಊರಲ್ಲಿನ ಸರ್ಕಾರಿ ಶಾಲಾ ಕಟ್ಟಡಕ್ಕೆ ಜಾಗೆಯ ಕೊರತೆ ಎದುರಾದಾಗ ಗ್ರಾಮದ ಗಣ್ಯರಾಗ ಗುರುಪಾದಪ್ಪ ಮೆಣಸಿನಕಾಯಿ ಅವರು ರಿಸಂ-2/5 ರಲ್ಲಿನ ತಮ್ಮ ಬರೋಬ್ಬರಿ 5 ಎಕರೆ ಭೂಮಿಯನ್ನು ದಾನವಾಗಿ ನೀಡಿದ್ದಾರೆ.

ಮಳೆಗಾಲ ಬಂತೆಂದರೆ ಮಕ್ಕಳು ಶಾಲೆಗೆ ಬರಲು ಹಿಂದೇಟು ಹಾಕುತ್ತಾರೆ. ಬಂದರೂ ಸದಾ ಭಯದಲ್ಲಿ ಇರುತ್ತಾರೆ. ಊರಿನ ಮುಸ್ಲಿಂ ಬಂಧುಗಳು, ಜಿಲ್ಲಾ ವಕ್ಫ್ ಬೋರ್ಡ್ ಅಧಿಕಾರಿಗಳೂ ಸಮ್ಮತಿಸಿದ್ದಾರೆ. ಸರ್ಕಾರ ಬೇಗನೇ ಈ ಜಾಗೆಯನ್ನು ಸರ್ಕಾರಿ ಶಾಲೆಗೆ ಒಪ್ಪಿಸಬೇಕು ಎಂದು ಬಮ್ಮಿಗಟ್ಟಿ ಗ್ರಾಮದ ಗಣ್ಯರಾದ ಬಿ.ಎಂ. ಟವಳಿ ಹೇಳಿದರು.