ಕೇಳೋರಿಲ್ಲ ಬಾಳೆಹಣ್ಣು, ಸಂಕಷ್ಟದಲ್ಲಿ ಬೆಳೆಗಾರರು

ಸೋಮರಡ್ಡಿ ಅಳವಂಡಿ

ಹೊಲದಲ್ಲಿ ಕಟಾವಿಗೆ ಬಂದಿರುವ ಬಾಳೆ ಬೆಳೆ ಅಲ್ಲಿಯೇ ಹಣ್ಣಾಗಿ ಉದುರುತ್ತಿದೆ. ಹೀಗಾಗಿ, ಎಷ್ಟಕ್ಕಾದರೂ ಸರಿ ಕಡಿದುಕೊಂಡು ಹೋಗಿ ಎಂದು ರೈತರೇ ವ್ಯಾಪಾರಸ್ಥರ ಬಳಿ ದುಂಬಾಲು ಬೀಳುತ್ತಿದ್ದಾರೆ. ಆದರೂ ಬಾಳೆಯನ್ನು ತೆಗೆದುಕೊಂಡು ಹೋಗುವವರು ಮಾತ್ರ ಬರುತ್ತಿಲ್ಲ.

ತಗ್ಗದ ದರ: ಆದರೆ, ಮಾರುಕಟ್ಟೆಯಲ್ಲಿ ಮಾತ್ರ ಬಾಳೆ ಹಣ್ಣಿನ ದರ ತಗ್ಗಿಯೇ ಇಲ್ಲ. ಗ್ರಾಹಕರಿಗೆ ಈಗಲೂ ₹50-60ಕ್ಕೆ ಡಜನ್ ನಂತೆಯೇ ಬಾಳೆಹಣ್ಣು ಮಾರಾಟ ಮಾಡುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ತಗ್ಗದಿದ್ದರೂ ರೈತರಿಂದ ಖರೀದಿಸುವಲ್ಲಿ ಮಾತ್ರ ದರ ಪಾತಳಕ್ಕೆ ಕುಸಿದಿರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ.

ರೈತರೇ ಮಾರಾಟ ಮಾಡಲು ಚಿಂತನೆ: ಮಾರುಕಟ್ಟೆಯಲ್ಲಿ ಈಗಲೂ ₹50-60ಕ್ಕೆ ಡಜನ್ ಬಾಳೆಹಣ್ಣು ಮಾರಾಟ ಆಗುತ್ತಿರುವುದರಿಂದ ರೈತರು ತಾವೇ ಹಣ್ಣು ಮಾಡಿ, ಬಿಡಿಯಾಗಿಯೇ ಮಾರಾಟ ಮಾಡಲು ಚಿಂತನೆ ನಡೆಸಿದ್ದಾರೆ.

ಸರ್ಕಾರ ಖರೀದಿಸಲಿ: ಸರ್ಕಾರ ಶಾಲೆಗಳಲ್ಲಿ ಮಕ್ಕಳಿಗೆ ಬಾಳೆಹಣ್ಣನ್ನು ಸಹ ವಿತರಣೆ ಮಾಡುತ್ತದೆ. ಪ್ರತಿ ಬಾಳೆ ಹಣ್ಣಿಗೆ ₹5ರಂತೆ ನೀಡುತ್ತದೆ. ಇದನ್ನು ರೈತರಿಂದಲೇ ಖರೀದಿ ಮಾಡಿದರೆ ರೈತರಿಗೂ ಅನುಕೂಲವಾಗುತ್ತದೆ. ಆಗ ರೈತರಿಗೆ ದೊಡ್ಡ ಲಾಭವಾಗುತ್ತದೆ. ಹೀಗಾಗಿ, ಸರ್ಕಾರ ಶಾಲೆಗಳಲ್ಲಿ ವಿತರಣೆ ಮಾಡುವ ಬಾಳೆ ಹಣ್ಣನ್ನು ನೇರವಾಗಿ ರೈತರಿಂದಲೇ ಖರೀದಿ ಮಾಡುವಂತೆ ರೈತರು ಆಗ್ರಹಿಸಿದ್ದಾರೆ.

ಮಾರುಕಟ್ಟೆಯಲ್ಲಿ ಬಾಳೆಹಣ್ಣಿನ ದರ ಪಾತಳಕ್ಕೆ ಕುಸಿದಿದ್ದರಿಂದ ರೈತರೇ ಮಾರಾಟ ಮಾಡಲು ಚಿಂತನೆ ನಡೆಸಿದ್ದಾರೆ. ಈ ಕುರಿತು ಎಲ್ಲರೂ ಚರ್ಚೆ ಮಾಡಿದ್ದೇವೆ ಎಂದು ರೈತ ಹನುಮರಡ್ಡಿ ಕರಡ್ಡಿ ಹೇಳಿದರು.