ಬಳ್ಳಾರಿ ಜೀನ್ಸ್‌ ಅಪರೆಲ್ ಪಾರ್ಕ್‌ಗೆ ಸಿಗುವುದೇ ಅನುದಾನ?

ಕೆ.ಎಂ. ಮಂಜುನಾಥ್

ಕಳೆದ ಬಾರಿ ಬಜೆಟ್‌ನಲ್ಲಿ ಜಿಲ್ಲೆಯನ್ನು ಕಡೆಗಣಿಸಲಾಗಿದೆ. ಯಾವುದೇ ಮಹತ್ವದ ಯೋಜನೆಗಳಿಗೆ ಅನುದಾನ ಘೋಷಣೆಯಾಗಿಲ್ಲ ಎಂಬ ಕೂಗು ಕೇಳಿ ಬಂದಿತ್ತು.

ನೂರಾರು ಕೋಟಿಗಳ ವಹಿವಾಟಿನ ಉದ್ಯಮ: ಗುಣಮಟ್ಟದ ಜೀನ್ಸ್ ಉತ್ಪಾದನೆ ಹಾಗೂ ಸಿದ್ಧ ಉಡುಪುಗಳ ಮೂಲಕ ಹೆಚ್ಚಿನ ಬೇಡಿಕೆ ಕುದುರಿಸಿಕೊಂಡಿರುವ ಬಳ್ಳಾರಿ ಜೀನ್ಸ್‌ ಉದ್ಯಮ ಹಾಗೂ ಉದ್ಯಮಿಗಳಿಗೆ ಸರ್ಕಾರದ ಪೂರಕ ಪ್ರೋತ್ಸಾಹ ಅಗತ್ವವಿದೆ. ನಗರವೊಂದರಲ್ಲಿ 83 ಜೀನ್ಸ್ ತಯಾರಿಕಾ ಘಟಕಗಳು ಕಾರ್ಯನಿರ್ವಹಿಸುತ್ತಿದ್ದು, ಜೀನ್ಸ್ ಉದ್ಯಮವೊಂದರಿಂದಲೇ ವಾರ್ಷಿಕ ನೂರಾರು ಕೋಟಿ ರು. ವಹಿವಾಟು ನಡೆಯುತ್ತದೆ. ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಸುಮಾರು 15 ಸಾವಿರ ಜನರಿಗೆ ಉದ್ಯೋಗ ಸೃಷ್ಟಿಸಿದೆ.

₹5 ಸಾವಿರ ಕೋಟಿ ನೀಡಲಿಲ್ಲ: ಭಾರತ ಜೋಡೋ ಯಾತ್ರೆ ವೇಳೆ ಬಳ್ಳಾರಿಯ ಜೀನ್ಸ್ ಉದ್ಯಮ ಹಾಗೂ ಕಾರ್ಮಿಕರನ್ನು ಭೇಟಿ ಮಾಡಿದ್ದ ಕಾಂಗ್ರೆಸ್ ನಾಯಕ ರಾಹುಲ್‌ಗಾಂಧಿ ಅವರು, ರಾಜ್ಯ ವಿಧಾನಸಭಾ ಚುನಾವಣೆ ಮುನ್ನದ ಪ್ರಚಾರ ವೇಳೆ ಬಳ್ಳಾರಿಯನ್ನು ಜೀನ್ಸ್ ರಾಜಧಾನಿಯನ್ನಾಗಿ ಮಾಡಲಾಗುವುದು. ಅಪರೆಲ್ ಪಾರ್ಕ್‌ಗಾಗಿ ₹5 ಸಾವಿರ ಕೋಟಿ ನೀಡಲಾಗುವುದು ಎಂದು ಭರವಸೆ ನೀಡಿದ್ದರು. ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರ ಅಧಿಕಾರ ಬಂದ ಬಳಿಕದ ಮೊದಲ ಬಜೆಟ್‌ನಲ್ಲಿ ಜೀನ್ಸ್‌ ಅಪರೆಲ್ ಪಾರ್ಕ್ ಬಗ್ಗೆ ಚಕಾರ ಎತ್ತಲಿಲ್ಲ. ಪಾರ್ಕ್ ನಿರ್ಮಾಣಕ್ಕೆ ಸೂಕ್ತ ಸ್ಥಳ ಹುಡುಕುವಂತೆ ಜವಳಿ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದು ಬಿಟ್ಟರೆ, ಈವರೆಗೆ ಯಾವುದೇ ಪ್ರಾಥಮಿಕ ಪ್ರಕ್ರಿಯೆಗಳು ಸಹ ನಡೆದಿಲ್ಲ.

ಜೀನ್ಸ್ ರಾಜಧಾನಿ ಎಂದು ಕರೆಸಿಕೊಳ್ಳುತ್ತಿರುವ ಬಳ್ಳಾರಿಗೆ ಜೀನ್ಸ್‌ ಅಪರೆಲ್ ಪಾರ್ಕ್ ನಿರ್ಮಾಣದಿಂದ ಬೇಡಿಕೆಯಷ್ಟು ಕಚ್ಚಾವಸ್ತುಗಳ ಲಭ್ಯತೆ, ಅತ್ಯಾಧುನಿಕ ಉತ್ಪಾದನಾ ಘಟಕಗಳ ಸ್ಥಾಪನೆ, ನೀರು, ವಿದ್ಯುತ್ ಸೇರಿದಂತೆ ಉದ್ಯಮಿಗಳಿಗೆ ಪೂರಕ ಸೌಕರ್ಯಗಳು, ಸಿದ್ಧ ಉಡುಪಿನಲ್ಲಿ ಮತ್ತಷ್ಟೂ ಗುಣಮಟ್ಟದ ಸಾಧ್ಯತೆ, ಸಿದ್ಧ ಉಡುಪುಗಳ ರಫ್ತಿಗೆ ಬೇಕಾದ ಪೂರಕ ಕ್ರಮಗಳಾಗಲಿವೆ. ಈ ಎಲ್ಲಕ್ಕಿಂತ ಪ್ರಮುಖವಾಗಿ ಉದ್ಯೋಗ ಸೃಷ್ಟಿಗೆ ಹೆಚ್ಚಿನ ಆಸ್ಪದವಾಗುತ್ತದೆ. ಸಣ್ಣಪುಟ್ಟ ಜೀನ್ಸ್ ವ್ಯಾಪಾರಿಗಳು ಹಾಗೂ ಜೀನ್ಸ್ ಸಿದ್ಧ ಉಡುಪುಗಳ ತಯಾರಿಕರಿಗೂ ಹೆಚ್ಚಿನ ಉತ್ತೇಜನ ಸಿಗುತ್ತದೆ. ಅಪರೆಲ್ ಪಾರ್ಕ್ ನಿರ್ಮಾಣದಿಂದ ಜೀನ್ಸ್‌ ಉಡುಪುಗಳ ಕಟ್ ಟು ಪ್ಯಾಕ್ ಒಂದೇ ಸೂರಿನಡಿನಲ್ಲಾಗುತ್ತದೆ.