ಪುಸ್ತಕ ಬರೆಯುವವರು ಮಾತ್ರ ಸಾಹಿತಿಗಳಲ್ಲ: ರಾಮಕೃಷ್ಣ ಭಟ್ಟ ಧುಂಡಿ

ಯಲ್ಲಾಪುರ: ಸಮಾಜದಲ್ಲಿ ಆಧುನಿಕತೆಯ ಬಿರುಗಾಳಿ ಪ್ರಾರಂಭವಾಗಿದೆ. ಶಿಕ್ಷಣ, ಜೀವನಕ್ರಮ ನಮ್ಮೆಲ್ಲ ಚಿಂತನೆಯನ್ನೇ ಬದಲಾಯಿಸಿದೆ. ನಾವು ಸಂತೋಷದಲ್ಲಿರುವಂತೆ ತೋರಿಸಿಕೊಳ್ಳುವ ಸ್ಥಿತಿಗೆ ತಲುಪಿದ್ದೇವೆ. ಸಾವಿರಾರು ವರ್ಷಗಳಿಂದ ಕಾಪಾಡಿಕೊಂಡ ಬಂದ ಸಾಂಸ್ಕೃತಿಕ ಬದುಕಿನ ಅವಿಚ್ಛಿನ್ನ ಪರಂಪರೆಯೊಂದು ಕಡಿದು ಬೀಳಬಹುದಾದ ಅವ್ಯಕ್ತ ಭಯ ನಮ್ಮನ್ನು ಕಾಡಲಾರಂಭಿಸಿದೆ ಎಂದು ಕನ್ನಡ ಸಾಹಿತ್ಯ ಪರಿಷತ್ತಿನ ಸಮ್ಮೇಳನಾಧ್ಯಕ್ಷ ರಾಮಕೃಷ್ಣ ಭಟ್ಟ ಧುಂಡಿ ಆತಂಕ ವ್ಯಕ್ತಪಡಿಸಿದರು.

ಇಂದು ಹಳ್ಳಿಗಳು ಬರಿದಾಗುತ್ತಿವೆ. ವೃದ್ಧ ತಂದೆ- ತಾಯಿಗಳನ್ನು ತೊರೆದು, ದೇಶ- ವಿದೇಶಗಳಿಗೆ ಯುವಜನಾಂಗ ಬದುಕಿಗಾಗಿ ಹೋಗುತ್ತಿರುವುದು ಆತಂಕ ನಮ್ಮನ್ನು ಕಾಡುತ್ತಿದೆ. ತಾಲೂಕಿನಲ್ಲಿ ಕೆಲವೇ ಕೆಲವು ಆಂಗ್ಲ ಶಾಲೆಗಳಿವೆ. ಉಳಿದೆಲ್ಲವೂ ಕನ್ನಡ ಮಾಧ್ಯಮದಲ್ಲೇ ಇರುವುದು ಸಮಾಧಾನ ಎಂದರು.

ಸ್ವರ್ಣವಲ್ಲೀ ಶ್ರೀಗಳು, ಡಾ. ಶಿವರಾಮ ಕಾರಂತರ ಮುಂದಾಳತ್ವದಲ್ಲಿ ಬೇಡ್ತಿ, ಕೈಗಾ ಯೋಜನೆ ಹೋರಾಟ ನಡೆಸಿದ್ದು ಇತಿಹಾಸ. ಇಲ್ಲಿನ ಯುವಕರಿಗೆ ಉದ್ಯೋಗಕ್ಕೆ ಉದ್ಯಮವಿಲ್ಲ. ಆದರೆ ನಮ್ಮ ಶಾಸಕರು ಅತ್ಯಂತ ಕ್ರಿಯಾಶೀಲರಾಗಿ ಕಾರ್ಪೋರೇಟ್ ವ್ಯವಸ್ಥೆಯ ಆರೋಗ್ಯ ಕೇಂದ್ರ ಸೇರಿದಂತೆ ಹಲವು ಅಭಿವೃದ್ಧಿ ಕಾರ್ಯಕ್ಕೆ ಒತ್ತು ನೀಡಿದ್ದಾರೆ. ಅಭಿವೃದ್ಧಿ ಸರಿಯಾಗಿ ಆಗಬೇಕಾದರೆ ಜನಪರ ಕಾಳಜಿಯುಳ್ಳ ರಾಜಕಾರಣಿಗಳು, ಅಧಿಕಾರಿಗಳು ಕಾರ್ಯ ನಿರ್ವಹಿಸಬೇಕು ಎಂದರು.ಸಮ್ಮೇಳನ ಉದ್ಘಾಟಿಸಿದ ಹಿರಿಯ ಸಾಹಿತಿ, ವಿಮರ್ಶಕ ಶ್ಯಾಮಸುಂದರ ಬಿದ್ರಕುಂದಿ ಮಾತನಾಡಿ, ಪಂಪ, ದಿನಕರ ದೇಸಾಯಿ, ಯಶವಂತ ಚಿತ್ತಾಲ ಸೇರಿದಂತೆ ಅನೇಕ ಹಿರಿಯ ಕವಿಗಳ ಭೂಮಿ ಇದು. ಭಾರತ ಸಣ್ಣ ಕಥೆಗಳ ಕಣಜ ಎಂದ ಅವರು, ಸಮ್ಮೇಳನದಲ್ಲಿ ೪ ರೀತಿಯ ಪ್ರೇಕ್ಷಕರಿರುತ್ತಾರೆ. ಕನ್ನಡದ ಬಗ್ಗೆ ಪ್ರೀತಿ ಇರುವವರು, ಸಾಹಿತ್ಯ ಓದಿ ಅಧ್ಯಯನ ಮಾಡುವವರು, ಆರ್ಥಿಕ ನೆರವು ನೀಡುವ ಶಾಸಕರಾದ ಹೆಬ್ಬಾರರಂತಹ ವ್ಯಕ್ತಿಗಳು, ಇನ್ನೊಂದು, ಸಾಹಿತ್ಯವನ್ನು ವಿಶಿಷ್ಟವಾಗಿ ಓದಿ ತಿಳಿದು, ವಿಮರ್ಶಿಸುವವರು. ಹೀಗೆ ವಿಭಿನ್ನ ನೆಲೆಯಲ್ಲಿ ಗುರುತಿಸಬಹುದು ಎಂದರು.