ತಹಸೀಲ್ದಾರ್‌ ವರ್ತನೆ ಖಂಡಿಸಿ ದಲಿತ ಮುಖಂಡರ ಪ್ರತಿಭಟನೆ

ರೋಣ: ನೆರೆ ಹಾವಳಿಯಿಂದ ಸ್ಥಳಾಂತರಗೊಂಡ ಗ್ರಾಮಗಳ ಮನೆ ಹಂಚಿಕೆಯಲ್ಲಿನ ತಾರತಮ್ಯ ಕುರಿತು ಮಾಹಿತಿ ಕೇಳಲು ತೆರಳಿದ್ದ ದಲಿತ ಮುಖಂಡರಿಗೆ ಸಮರ್ಪಕ ಮಾಹಿತಿ ನೀಡದೇ ಕಚೇರಿಯಿಂದ ಹೊರ ಹೋಗಿ ಎಂದು ಬೆದರಿಕೆ ಹಾಕಿ ಕುಳಿತುಕೊಳ್ಳಲು ಕುರ್ಚಿ ನೀಡದೇ ಅಪಮಾನ ಮಾಡಿದ್ದಾರೆ ಎಂದು ಆರೋಪಿಸಿ ತಹಸೀಲ್ದಾರ್‌ ಕಚೇರಿಯಲ್ಲಿ ಪ್ರತಿಭಟನೆ ನಡೆಸಿ ತಹಸೀಲ್ದಾರರನ್ನು ತರಾಟೆಗೆ ತೆಗೆದುಕೊಂಡ ಘಟನೆ ಶುಕ್ರವಾರ ನಡೆದಿದೆ.

ಅಲ್ಲದೇ ಪಿಎಸ್‌ಐ ಪ್ರಕಾಶ ಬಣಕಾರ ಅವರನ್ನು ಕಚೇರಿಗೆ ಕರೆಯಿಸಿ,ಅನಗತ್ಯವಾಗಿ ಕರ್ತವ್ಯಕ್ಕೆ ಅಡ್ಡಿಪಡಿಸುತ್ತಿದ್ದಾರೆ. ಇವರನ್ನು ಹೊರ ಹಾಕಿ ಎಂದು ಆದೇಶಿಸುತ್ತಿದ್ದಾರೆ. ನ್ಯಾಯಯುತ ಮಾಹಿತಿ ಕೇಳಲು ಹೋದರೆ ಸರಿಯಾದ ಮಾಹಿತಿ ನೀಡದೇ ನಮ್ಮ ಮೇಲೆ ಏರುಧ್ವನಿಯಲ್ಲಿ ಬೆದರಿಕೆ ಹಾಕುವುದು ಸಮಂಜಸವಲ್ಲ, ದಲಿತರನ್ನು ಅಸ್ಪೃಶ್ಯತೆಯಿಂದ ಕಂಡಿರುವ ತಹಸೀಲ್ದಾರರ ನಡೆ ಖಂಡನೀಯವಾಗಿದೆ ಎಂದು ದಲಿತ ಮುಖಂಡ ಪ್ರಕಾಶ ಹೊಸಳ್ಳಿ ಆರೋಪಿಸಿದರು.

ಮಾತಿನ ಚಕಮಕಿ: ಈ ವೇಳೆ ಕೆಲಕಾಲ ತಹಸೀಲ್ದಾರ್‌ ನಾಗರಾಜ.ಕೆ. ಹಾಗೂ ದಲಿತ ಮುಖಂಡರ ನಡುವೆ ವಾಗ್ವಾದ, ಮಾತಿನ ಚಕಮಕಿ ನಡೆಯಿತು. ಆಸರೆ ಮನೆಗಳ ಹಂಚಿಕೆ ಕುರಿತು ಮೇಲಾಧಿಕಾರಿಗಳ ಗಮನಕ್ಕೆ ತರುತ್ತೇನೆ. ಸೋಮವಾರದ ವರೆಗೆ ಕಾಲಾವಕಾಶ ನೀಡಿ ಎಂದು ತಹಸೀಲ್ದಾರ್‌ ನಾಗರಾಜ ಕೆ.ಹೇಳಿದರು. ಬಳಿಕ ಸೋಮವಾರ ಸಮರ್ಪಕ ಮಾಹಿತಿ ನೀಡಿ ಇಲ್ಲದಿದ್ದರೆ ಉಗ್ರ ಹೋರಾಟ ಮಾಡಲಾಗುವುದು ಎಂದು ದಲಿತ ಮುಖಂಡರು ತಹಸೀಲ್ದಾರ್‌ಗೆ ಎಚ್ಚರಿಕೆ ನೀಡಿ ಪ್ರತಿಭಟನೆ ಹಿಂಪಡೆದರು.