ಬ್ಯಾಡಗಿಯ ಮುಖ್ಯರಸ್ತೆ ಅಗಲೀಕರಣ ಮೂಲಕ ಅಭಿವೃದ್ಧಿ ಪರ್ವ

ಬ್ಯಾಡಗಿ: ಮುಖ್ಯರಸ್ತೆ ಅಗಲೀಕರಣ ವಿಚಾರದಲ್ಲಿ ರಾಜ್ಯ ಉಚ್ಚ ನ್ಯಾಯಾಲಯದಲ್ಲಿದ್ದ ಪ್ರಕರಣವನ್ನು ಯಾವುದೇ ಷರತ್ತುಗಳಿಲ್ಲದೇ ಅಲ್ಲಿನ ಮಾಲೀಕರು ಹಿಂಪಡೆದುಕೊಂಡಿದ್ದು, ಪಟ್ಟಣದ ಅಭಿವೃದ್ಧಿ ವಿಚಾರವಾಗಿ ಅವರು ತೆಗೆದುಕೊಂಡ ಐತಿಹಾಸಿಕ ನಿಲುವಿಗೆ ತಾಲೂಕಿನ ಜನತೆಯ ಪರವಾಗಿ ಅಭಿನಂದಿಸುತ್ತೇನೆ ಎಂದು ಶಾಸಕ ಬಸವರಾಜ ಶಿವಣ್ಣನವರ ತಿಳಿಸಿದರು.

ಮುಖ್ಯರಸ್ತೆಯಲ್ಲಿನ ಜನರ ಹಠಮಾರಿ ಧೋರಣೆ ಎಲ್ಲರಿಗೂ ಬೇಸರ ವ್ಯಕ್ತವಾಗಿತ್ತು. ಕಳೆದ 14 ವರ್ಷದಿಂದ ಕೋರ್ಟ್‌ನಲ್ಲೇ ಕಾಲ ಕಳೆಯಲಾಗಿತ್ತು. ಅದರೆ ಹೋರಾಟ ತಾರ್ಕಿಕ ಅಂತ್ಯವನ್ನು ಕಂಡಿದ್ದು ಬ್ಯಾಡಗಿ ತಾಲೂಕಿನ ಮಟ್ಟಿಗೆ ಇದೊಂದು ಐತಿಹಾಸಿಕ ದಿನವಾಗಿದೆ. ಕಳೆದ 14 ವರ್ಷದಿಂದ ಬ್ಯಾಡಗಿ ಸಮಗ್ರ ಜನತೆ ಯಾವುದನ್ನು ಇಚ್ಛೆಪಟ್ಟಿದ್ದರೋ ಅದು ಕೈಗೂಡಿದೆ. ಇಂದಾದರೂ ಅವರೆಲ್ಲರೂ ಸೇರಿ ಸದಿಚ್ಛೆಯಿಂದ ಕೋರ್ಟ್‌ನಲ್ಲಿ ಹೂಡಿದ್ದ ದಾವೆಯನ್ನು ಹಿಂಪಡೆಯಲು(ಜಾಯಿಂಟ್ ಮೆಮೋ) ಸಹಿ ಹಾಕಿದ್ದು, ಐತಿಹಾಸಿಕ ನಿರ್ಣಯಕ್ಕೆ ಸಾಕ್ಷಿಯಾಗಿದೆ ಎಂದರು.

ಅಭಿವೃದ್ಧಿ ಪರ್ವ ಶುರುವಾಗಲಿ: ಮಾಜಿ ಶಾಸಕ ಸುರೇಶಗೌಡ ಪಾಟೀಲ ಮಾತನಾಡಿ, ಮುಖ್ಯರಸ್ತೆಯಲ್ಲಿನ ವರ್ತಕರು ಮನಪರಿವರ್ತನೆ ಮಾಡಿಕೊಂಡಿದ್ದರಿಂದ ಮುಖ್ಯರಸ್ತೆ ಅಗಲೀಕರಣವಾಗುವ ಮೂಲಕ ಅಭಿವೃದ್ಧಿಯ ಪರ್ವ ಆರಂಭವಾಗಲಿದೆ. ಇದಕ್ಕೆ ಸಾಕ್ಷಿಯಾಗಿ ಪ್ರಸ್ತುತ ಸರ್ಕಾರ ಸಂಪೂರ್ಣವಾಗಿ ತಮ್ಮ ಜತೆಗಿರಲಿದೆ ಎಂದರು.

ಮುಖ್ತರಸ್ತೆ ಅಗಲೀಕರಣ ಎರಡೂ ಬದಿ ಅಗಲೀಕರಣಕ್ಕೆ ನ್ಯಾಯಾಲಯದಿಂದ 66 ಮೀಟರ್‌ಗೆ ಸಮ್ಮತಿ ಸಿಗಬಹುದು. ಬಳಿಕ 6 ಮೀ. ಸೆಟ್ ಬ್ಯಾಕ್ ವಿಚಾರದಲ್ಲಿ ಕಾನೂನು ತೊಡಕುಗಳಿದ್ದು, ನಂತರದ ದಿನಗಳಲ್ಲಿ ಸರ್ಕಾರದ ಜತೆ ಮಾತುಕತೆ ನಡೆಸುವ ಮೂಲಕ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲಿದ್ದೇನೆ ಎನ್ನುವ ಮೂಲಕ ಮುಖ್ಯರಸ್ತೆ ಮಾಲೀಕರಲ್ಲಿದ್ದ ಗೊಂದಲಕ್ಕೆ ಶಾಸಕ ಬಸವರಾಜ ಶಿವಣ್ಣನವರ ತೆರೆ ಎಳೆದರು.