ಮಹಿಳಾ ಸಬಲೀಕರಣಕ್ಕೆ ಧರ್ಮಸ್ಥಳ ಸಂಸ್ಥೆ ಸಹಕಾರ

ಚನ್ನಪಟ್ಟಣ: ಮಹಿಳೆಯರ ಆರ್ಥಿಕ ಅಭಿವೃದ್ಧಿ ಜೊತೆಗೆ, ಮಹಿಳೆಯರ ಜ್ಞಾನ ವಿಕಾಸಕ್ಕೆ ಶ್ರಮಿಸುತ್ತಿರುವ ಧರ್ಮಸ್ಥಳ ಸಂಸ್ಥೆಯ ಸೇವೆ ಅನನ್ಯ ಎಂದು ಗೌಡಗೆರೆ ಕ್ಷೇತ್ರದ ಧರ್ಮದರ್ಶಿ ಡಾ.ಮಲ್ಲೇಶ್ ಗುರೂಜೀ ತಿಳಿಸಿದರು.

ನಿಜವಾದ ಮಹಿಳಾ ಸಬಲೀಕರಣಕ್ಕೆ ಅವಕಾಶ ಮಾಡಿಕೊಟ್ಟಿರುವ ಕೀರ್ತಿ ಧರ್ಮಸ್ಥಳ ಸಂಸ್ಥೆಗೆ ಸಲ್ಲುತ್ತದೆ. ಹೆಣ್ಣು ಮನಸ್ಸು ಮಾಡಿದರೆ ಏನು ಬೇಕಾದರೂ ಮಾಡಬಲ್ಲಳು. ಹೆಣ್ಣು ಮನೆಯ ಕಣ್ಣಾದಾಗ ಮಾತ್ರ ಸಂಸಾರ ಸುಖವಾಗಿರಲು ಸಾಧ್ಯ. ಮಹಿಳೆಯ ಅಭಿವೃದ್ಧಿಗೆ ಸರ್ಕಾರ ಹಾಗೂ ಸಂಘ ಸಂಸ್ಥೆಗಳು ಸಾಕಷ್ಟು ಸಹಕಾರ ಮಾಡುತ್ತವೆ. ಆದರೆ, ಅದನ್ನು ಉಪಯೋಗಿಸುವ ಮನಸ್ಥಿತಿ ಅತಿಮುಖ್ಯ ಎಂದು ಹೇಳಿದರು.

ಆರ್ಟ್ ಆಫ್ ಲಿವಿಂಗ್ ಸಂಯೋಜಕಿ ರಾಧಿಕಾ ರವಿಕುಮಾರ್ ಗೌಡ ಮಾತನಾಡಿ, ಈ ಸಮಾಜದಲ್ಲಿ ಮಹಿಳೆಯರಿಗೆ ಇಡೀ ಮೈಯಲ್ಲಾ ಕಣ್ಣಾಗಿರಬೇಕು. ಹೊಗಳಿಕೆ, ತೆಗಳಿಕೆ ಯಾವುದನ್ನು ಸಹ ಸ್ವೀಕರಿಸಬಾರದು. ಯಾರಿಂದ ಏನನ್ನು ಅನಾವಶ್ಯಕ ಸ್ವೀಕಾರ ಬೇಡ. ನಮ್ಮ ನೆಲದ ಸಂಸ್ಕತಿ ಉಳಿಸುವುದರಲ್ಲಿ ಮಹಿಳೆಯರ ಪಾತ್ರ ಅಪಾರ. ಒಂದು ಕುಟುಂಬದ ಅಭಿವೃದ್ಧಿ ಆ ಮನೆಯ ಮಹಿಳೆಯನ್ನು ಅವಲಂಬಿಸಿರುತ್ತದೆ. ಮಕ್ಕಳ ಭವಿಷ್ಯ ರೂಪಿಸುವುದರಲ್ಲಿ ತಾಯಿಯ ಪಾತ್ರ ಮಹತ್ತವಾದದ್ದು. ನಾವು ಹೇಗೆ ಬೆಳೆಸುತ್ತೆವೆಯೋ ಹಾಗೇ ಮಕ್ಕಳು ಸಹ ಬೆಳೆಯುತ್ತಾರೆ. ಮಕ್ಕಳಲ್ಲಿ ಕೀಳರಿಮೆ ಪ್ರಜ್ಞೆ ಬೆಳೆಸುವುದು ಬಹುದೊಡ್ಡ ತಪ್ಪು. ಕೇವಲ ಅಂಕ ಗಳಿಗೆಯೇ ಒತ್ತಡ ಹಾಕದೇ, ಅವರ ಸಂಪೂರ್ಣ ವಿಕಸನಕ್ಕೆ ಅವಕಾಶ ನೀಡಬೇಕು ಎಂದು ತಿಳಿಸಿದರು.

ಕಾರ್ಯಕ್ರಮದ ಅಂಗವಾಗಿ ರಂಗೋಲಿ ಸ್ಪರ್ಧೆ, ಪುಷ್ಪಗುಚ್ಛ ಸ್ಪರ್ಧೆ ಸೇರಿದಂತೆ ಹಲವಾರು ಸ್ಪರ್ಧೆಗಳನ್ನು ಆಯೋಜಿಸಲಾಗಿತ್ತು. ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಈ ವೇಳೆ ಜ್ಞಾನ ವಿಕಾಶ ಯೋಜನೆಯ ಪ್ರಾದೇಶಿಕ ಅಧಿಕಾರಿ ಮೂಕಾಂಬಿಕಾ, ಜಿಲ್ಲಾ ಯೋಜನಾ ನಿರ್ದೇಶಕ ಜಯಕರಶೆಟ್ಟಿ, ತಾಲೂಕು ಯೋಜನಾ ನಿರ್ದೇಶಕಿ ರೇಷ್ಮಾ ಸೇರಿದಂತೆ ಇತರರಿದ್ದರು.