ಪೂರ್ವಿಕರ ಆಶಯಕ್ಕೆ ವಿರುದ್ಧವಾಗಿರುವ ಆಡಳಿತ ಮಂಡಳಿ ವಜಾವಾಗಲಿ: ಶಾಸಕ ಎ.ಆರ್‌ ಕೃಷ್ಣಮೂರ್ತಿ

ಕನ್ನಡಪ್ರಭವಾರ್ತೆ ಚಾಮರಾಜನಗರ

ನಗರದ ಜಿಲ್ಲಾಡಳಿತ ಭವನದ ಮುಂಭಾಗ ಆದಿಕರ್ನಾಟಕ ಅಭಿವೃದ್ಧಿ ಸಂರಕ್ಷಣಾ ಸಮಿತಿ ವತಿಯಿಂದ ಸಮುದಾಯ ಮುಖಂಡರು ಚಂದಕವಾಡಿಯಿಂದ ಚಾಮರಾಜನಗರಕ್ಕೆ ನಡೆಸಿದ ಪಾದಯಾತ್ರೆ ಹಾಗೂ ಪ್ರತಿಭಟನಾ ಧರಣಿಯಲ್ಲಿ ಭಾಗವಹಿಸಿ ಮಾತನಾಡಿದರು.

ತಾಲೂಕು ಕೇಂದ್ರದ ಹೃದಯ ಭಾಗದಲ್ಲಿ ಸಮುದಾಯದ ವಿದ್ಯಾರ್ಥಿನಿಲಯವು ಅನೇಕ ಹಿರಿಯರ ಪರಿಶ್ರಮದ ಫಲದಿಂದ ನಿರ್ಮಾಣವಾಗಿದೆ. ನಮ್ಮ ತಂದೆ ದಿ. ಬಿ.ರಾಚಯ್ಯ, ದಿ. ಆರ್. ಧ್ರುವನಾರಾಯಣ, ಆರ್. ರಂಗಸ್ವಾಮಿ ಸೇರಿದಂತೆ ಅನೇಕ ಪೂರ್ವಿಕರ ಚಿಂತನೆ ಮತ್ತು ಹೋರಾಟದ ಫಲವಾಗಿ ಈ ಆಸ್ತಿ ನಮ್ಮದಾಗಿದೆ. ಕೆ.ಸಿ. ರಂಗಯ್ಯ ಉತ್ತಮವಾಗಿ ನಿರ್ವಹಣೆ ಮಾಡಿ, ಹೆಸರುವಾಸಿಯಗಿದ್ದರು ಸಹ ಅವರ ಹಿಂದೆ ಇದ್ದ ಅನೇಕ ಪೂರ್ವಿಕರನ್ನು ಸ್ಮರಿಸೋಣ. ಆದರೆ, ನಂತರ ಬಂದ ಅಡಕ್ ಸಮಿತಿಯ ಅಧ್ಯಕ್ಷ ನಂಜುಂಡಸ್ವಾಮಿ ಸಮಾಜದ ಹಿತವನ್ನು ಕಾಯುವ ಬದಲು ಸ್ವಾರ್ಥಕ್ಕಾಗಿ ಬಳಕೆ ಮಾಡಿಕೊಂಡಿದ್ದಾರೆ. ತಮ್ಮ ಮಾತು ಕೇಳುವವರನ್ನು ಕಮಿಟಿಯಲ್ಲಿ ಸೇರಿಸಿಕೊಂಡಿರುವುದೇ ಇಷ್ಟೇಲ್ಲಾ ರದ್ದಾಂತಗಳಿಗೆ ಕಾರಣವಾಗಿದೆ. ಅಲ್ಲಿ ಇರುವ ಒಬ್ಬ ನಿರ್ದೇಶಕರು ಸಹ ಇದರ ವಿರುದ್ಧ ಧ್ವನಿ ಎತ್ತಿಲ್ಲ. ಅವರು ನಿಜವಾಗಿಯೂ ಅಂಬೇಡ್ಕರ್ ಅನುಯಾಯಿಗಳಾಗಿದ್ದರೆ, ರಾಜೀನಾಮೆ ಕೊಟ್ಟು ಹೊರ ಬರಬೇಕಾಗಿತ್ತು. ಇಲ್ಲ ಪ್ರಶ್ನೆ ಮಾಡಬಹುದಾಗಿತ್ತು ಎಂದು ಕೃಷ್ಣಮೂರ್ತಿ ಪ್ರಶ್ನೆ ಮಾಡಿದರು.

ಸಮಿತಿಯ ಜಿಪಂ ಮಾಜಿ ಉಪಾಧ್ಯಕ್ಷ ಅಯ್ಯನಪುರ ಶಿವಕುಮಾರ್, ತಾಪಂ ಮಾಜಿ ಅಧ್ಯಕ್ಷ ಆರ್. ಮಹದೇವ್ ಸಂಘ ಅಧ್ಯಕ್ಷರು ತಮ್ಮ ಅಣ್ಣ ಮಕ್ಕಳಿಗೆ ಸಂಘದ ಆಸ್ತಿಯನ್ನು ಪರಾಭಾರೆ ಮಾಡಿರುವ ಎಲ್ಲಾ ದಾಖಲಾತಿಗಳನ್ನು ಪ್ರದರ್ಶನ ಮಾಡಿ, ಆಕ್ರೋಶ ವ್ಯಕ್ತಪಡಿಸಿದರು.

ಚಂದಕವಾಡಿಯಿಂದ ಪಾದಯಾತ್ರೆ: ತಾಲೂಕಿನ ಚಂದಕವಾಡಿ ಅಂಬೇಡ್ಕರ್ ಭವನದಿಂದ ನೂರಾರು ಸಂಖ್ಯೆಯಲ್ಲಿ ಪಾದಯಾತ್ರೆ ಹೊರಟು ರಾಮಸಮುದ್ರದ ಡಾ. ಬಿ.ಆರ್. ಅಂಬೇಡ್ಕರ್ ಪುತ್ಥಳಿಗೆ ಮಾಲಾರ್ಪಣೆ ಮಾಡಿ, ಅಲ್ಲಿಂದ ಪಾದಯಾತ್ರೆ ಜಿಲ್ಲಾಡಳಿತ ಭವನಕ್ಕೆ ತಲುಪಿತು. ಯಾತ್ರೆಯಲ್ಲಿ ಅಂಬೇಡ್ಕರ್, ಬಿ. ರಾಚಯ್ಯ, ಕೆ.ಸಿ. ರಂಗಯ್ಯ ಭಾವಚಿತ್ರಗಳು ರಾರಾಜಿಸಿದವು. ಪ್ರತಿಭಟನೆಯಲ್ಲಿ ನಲ್ಲೂರು ಸೋಮೇಶ್ವರ್, ನಾಗವಳ್ಳಿ ನಾಗಯ್ಯ, ನಲ್ಲೂರು ಮಹದೇವಸ್ವಾಮಿ, ಯಜಮಾನರಾದ ಮಂಗಲ ರಂಗಸ್ವಾಮಿ, ಹೊಂಗನೂರು ವೀರಣ್ಣ, ಹೊಸೂರು ಸೋಮಣ್ಣ, ಚನ್ನಂಜಯ್ಯ, ಯ. ಪಾಪಯ್ಯ, ಹೊಂಗನೂರು ಪುಟ್ಟಸ್ವಾಮಿ, ಸಿ.ಎಂ. ಕೃಷ್ಣಮೂರ್ತಿ, ಗೋವಿಂದರಾಜು, ನಲ್ಲೂರು ಪರಮೇಶ್, ಬ್ಯಾಡಮೂಡ್ಲು ಬಸವಣ್ಣ, ಮೋಹನ್ ನಗು, ಅಕ್ಷಯ್, ಸೇರಿದಂತೆ ನೂರಾರು ಸಂಖ್ಯೆಯಲ್ಲಿ ಹಾಜರಿದ್ದರು.ಶಾಸಕರು ಮೂಗು ತೂರಿಸುವುದು ಸರಿಯಲ್ಲ: ಎಆರ್‌ಕೆ ಚಾಮರಾಜನಗರ: ಸ್ಥಳಿಯ ಶಾಸಕರು ಸಮುದಾಯ ವಿಚಾರದಲ್ಲಿ ಮೂಗು ತೂರಿಸುವುದನ್ನು ಸಹಿಸುವುದಿಲ್ಲ. ಈಗ ನಾಲ್ಕು ಬಾರಿ ತಾವು ಶಾಸಕರಾಗಲು ಸಮುದಾಯವರು ಕಾರಣ ಎಂಬುದನ್ನು ಅರ್ಥೈಯಿಸಿಕೊಂಡು ನ್ಯಾಯದ ಪರವಾಗಿ ನಿಲ್ಲಬೇಕು ಎಂದು ಶಾಸಕ ಎ.ಆರ್.ಕೃಷ್ಣಮೂರ್ತಿ ಪರೋಕ್ಷವಾಗಿ ಪುಟ್ಟರಂಗಶೆಟ್ಟರನ್ನು ತರಾಟೆಗೆ ತೆಗೆದು ಕೊಂಡರು. ಪ್ರತಿಭಟನಾ ಸಭೆಯಲ್ಲಿ ಮಾತನಾಡಿ, ಆದಿ ಕರ್ನಾಟಕ ಸಮಾಜಕ್ಕೆ ಸೇರಿದ ಆಸ್ತಿ ಪರಾಭಾರೆಯಾಗಿರುವ ವಿಚಾರದಲ್ಲಿ ತಹಸೀಲ್ದಾರ್ ಬಸವರಾಜು ದಿಟ್ಟ ನಿರ್ಧಾರ ತೆಗೆದುಕೊಂಡಿದ್ದಾರೆ. ಅಂಥ ಅಧಿಕಾರಿಯನ್ನೇ ಒಂದಲ್ಲ, ಎರಡು ಬಾರಿ ವರ್ಗಾವಣೆಗೆ ಶಿಫಾರಸ್ಸು ಮಾಡಿದ್ದಾರೆ. ಅಲ್ಲದೇ ನಮ್ಮ ಸಮುದಾಯದ ವಿಚಾರದಲ್ಲಿ ಏಕಪಕ್ಷೀಯವಾಗಿ ನಡೆದುಕೊಳ್ಳುತ್ತಿರುವುದು ಸರಿಯಲ್ಲ. ಕಂದಾಯ ಇಲಾಖೆಯ ಸಚಿವರಿಗೆ ತಾಲೂಕು ತಹಸೀಲ್ದಾರ್ ವಿರುದ್ಧ ಪತ್ರ ಬರೆದಿದ್ದಾರೆ. ನಾನು ಸಹ ಈ ತಾಲೂಕಿನ ಶಾಸಕ ಎಂಬುದನ್ನು ಮರೆತಿದ್ದಾರೆ ಎಂದರು.