ಹನಿ ನೀರಾವರಿ ಸಹಾಯಧನ ಇಳಿಸಿ ರೈತರಿಗೆ ಸಂಕಷ್ಟ

- ಶೇ.75ರಿಂದ ಶೇ.45ಕ್ಕೆ ಸಹಾಯಧನ ಸೌಲಭ್ಯ ಇಳಿಸಿದರೆ ಕೃಷಿ ನಿರ್ವಹಣೆ ಹೇಗೆ: ಸರ್ಕಾರಕ್ಕೆ ಬಿ.ಎಂ.ಸತೀಶ ಪ್ರಶ್ನೆ

- ಹಾಲು ಖರೀದಿ ದರ ಕಡಿತ ರಾಜ್ಯ ಸರ್ಕಾರದ ದುರಾಡಳಿತ ಪರಮಾವಧಿ - - - ಕನ್ನಡಪ್ರಭ ವಾರ್ತೆ, ದಾವಣಗೆರೆ

ನಗರದಲ್ಲಿ ಶುಕ್ರವಾರ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಅವರು, ಪ್ರಧಾನಮಂತ್ರಿ ಕೃಷಿ ಸಿಂಚಾಯಿ ಯೋಜನೆಯಡಿ ಪ್ರತಿ ಹನಿಗೆ ಪರ್ ಡ್ರಾಪ್‌ ಮೋರ್‌ ಕ್ರಾಪ್ ಘೋಷ ವಾಕ್ಯದಡಿ ಕೃಷಿಯಲ್ಲಿ ನೀರಿನ ಬಳಕೆ ದಕ್ಷತೆ ಹೆಚ್ಚಿಸಲು ಹನಿ-ತುಂತುರು ನೀರಾವರಿಯಂತಹ ಸೂಕ್ಷ್ಮ ನೀರಾವರಿ ಪದ್ಧತಿ ಅಳವಡಿಸಿಕೊಳ್ಳಬೇಕು ಎಂಬುದು ಪ್ರಧಾನಿ ಆಶಯವಾಗಿದೆ ಎಂದರು.

ನೀರಿನ ಬಳಕೆ ಸಾಮರ್ಥ್ಯ ಮತ್ತು ಸೂಕ್ತ ನಿರ್ವಹಣೆಯಿಂದ ಉತ್ಪಾದನೆ ಹೆಚ್ಚಿಸಿ, ರೈತರ ಆದಾಯ ದ್ವಿಗುಣಗೊಳಿಸುವುದು ಯೋಜನೆ ಮುಖ್ಯ ಉದ್ದೇಶ. 2023-2024ನೇ ಸಾಲಿನಲ್ಲಿ ಜಿಲ್ಲೆಯಲ್ಲಿ ಒಟ್ಟು 5466 ರೈತರು ಯೋಜನೆ ಫಲಾನುಭವಿಯಾಗಿದ್ದು, ಇದಕ್ಕಾಗಿ ₹21.14 ಕೋಟಿ ಬಿಡುಗಡೆಯಾಗಿದೆ. ಆಗ ರೈತರಿಗೆ ಶೇ.75 ಸಬ್ಸಿಡಿ ಸಿಗುತ್ತಿತ್ತು. ಇದರಲ್ಲಿ ಕೇಂದ್ರದ ಶೇ.27, ರಾಜ್ಯದ ಶೇ.48 ಪಾಲು ಇತ್ತು. ಕೇಂದ್ರವು ಈ ಸಲವೂ ಶೇ.27 ಸಬ್ಸಿಡಿ, ಮುಂದುವರಿಸಿದೆ. ಆದರೆ, ರಾಜ್ಯದ ಕಾಂಗ್ರೆಸ್ ಸರ್ಕಾರ ಶೇ.48ರ ಬದಲಿಗೆ ಶೇ.18ಕ್ಕೆ ಸಹಾಯಧನ ಇಳಿಸಿ, ಆದೇಶ ಹೊರಡಿಸಿದೆ ಎಂದು ದೂರಿದರು.

ರೈತರಿಗೆ ಸಿಗುತ್ತಿದ್ದ ಸಬ್ಸಿಡಿ ಹಣದಲ್ಲಿ ಶೇ.75ರಿಂದ ಶೇ.45ಕ್ಕೆ ಇಳಿಕೆಯಾಗಿದೆ. ಇದರಿಂದ ರೈತರಿಗೆ ದೊಡ್ಡ ಪ್ರಮಾಣದಲ್ಲಿ ಆರ್ಥಿಕ ಹೊರೆ ಬೀಳಲಿದೆ. ಗ್ಯಾರಂಟಿ ಯೋಜನೆಗಳ ಪರಿಣಾಮ ಅವುಗಳಿಗೆ ಹಣ ಹೊಂದಿಸಲು ರಾಜ್ಯದ ಅಭಿವೃದ್ಧಿಯನ್ನೇ ಶೂನ್ಯ ಮಾಡಿ, ರೈತರಿಗೆ ಸಿಗಬೇಕಾದ ಸಹಾಯಧನ ಕಡಿಮೆ ಮಾಡುವಂತಹ ದುಸ್ಸಾಹಸಕ್ಕೆ ಕಾಂಗ್ರೆಸ್ ಸರ್ಕಾರ ಕೈ ಹಾಕಿದೆ. ರಾಜ್ಯ ಸರ್ಕಾರದಲ್ಲಿ ಆರ್ಥಿಕ ಶಿಸ್ತು ಇಲ್ಲವಾಗಿದ್ದು, ಆರ್ಥಿಕವಾಗಿ ದಿವಾಳಿಯಾಗಿದೆ ಎಂದು ಆರೋಪಿಸಿದರು.

ರೈತರು ಹೆಚ್ಚು ಹಾಲು ಉತ್ಪಾದಿಸುತ್ತಿದ್ದು, ಹಾಲಿನ ಉತ್ಪಾದನಾ ಸಾಮರ್ಥ್ಯವನ್ನು ಕುಗ್ಗಿಸುವ ಕುತಂತ್ರದಿಂದ ಹಾಲು ಖರೀದಿ ದರ ಕಡಿತ ಮಾಡಿರುವುದು ರಾಜ್ಯ ಕಾಂಗ್ರೆಸ್ ಸರ್ಕಾರದ ದುರಾಡಳಿತ ಪರಮಾವಧಿಯಾಗಿದೆ. ಇದು ರೈತರ ಸಾಮರ್ಥ್ಯದ ಕಗ್ಗೊಲೆಯಾಗಿದೆ. ಇಂತಹ ರೈತವಿರೋಧಿ, ಜನವಿರೋಧಿ ಸರ್ಕಾರ ಸ್ವಾತಂತ್ರ್ಯ ಭಾರತದ ಇತಿಹಾಸದಲ್ಲೇ ಇರಲಿಲ್ಲ. ಹಾಲಿನ ದರ ಹೆಚ್ಚಿಸಿಲ್ಲ. ಪ್ರತಿ ಪಾಕೆಟ್‌ನಲ್ಲಿ 50 ಎಂಎಲ್ ಹೆಚ್ಚು ನೀಡಿ, ₹2.10 ಬದಲು ₹2 ದರ ಹೆಚ್ಚಿಸಿರುವುದಾಗಿ ಆರ್ಥಿಕ ತಜ್ಞರೆಂದು, 15 ಬಜೆಟ್‌ ಮಂಡಿಸಿದ ಅನುಭವಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಲಿನ ಉತ್ಪಾದನೆ ಹೆಚ್ಚಳದ ಕಾರಣ ನೀಡಿ, ರೈತರಿಂದ ಖರೀದಿಸುವ ದರ ಕಡಿಮೆ ಮಾಡಿದ್ದು ಏಕೆ ಎಂಬ ಬಗ್ಗೆ ರಾಜ್ಯದ ಜನತೆಗೆ ಉತ್ತರಿಸಲಿ ಎಂದು ಬಿ.ಎಂ.ಸತೀಶ ಒತ್ತಾಯಿಸಿದರು.

- - - -5ಕೆಡಿವಿಜಿ1: