ಕ್ಷೀರೋದ್ಯಮಕ್ಕೆ ಹೊಡೆತ ನೀಡಿದ ಬರ, ಬಿಸಿಲು!

ಖಾಜು ಸಿಂಗೆಗೋಳ

ಬರಗಾಲ, ರಣ ಬಿಸಿಲಿನಿಂದ ಜಾನುವಾರುಗಳಿಗೆ ಸಮರ್ಪಕವಾಗಿ ಮೇವು ಸಿಗದ ಹಿನ್ನೆಲೆಯಲ್ಲಿ ಕ್ಷೀರೋದ್ಯಮ ಕೂಡ ಕುಸಿತಗೊಂಡಿದೆ. ಉಪ ಕಸುಬಾಗಿ ಹಾಲನ್ನೇ ನಂಬಿಕೊಂಡು ಬದುಕು ಸಾಗಿಸುತ್ತಿದ್ದ ಅನ್ನದಾರರಿಗೆ ತೀವ್ರ ಬರಗಾಲ ಕೂಡ ಪರೋಕ್ಷವಾಗಿ ಹೊಡೆತ ನೀಡಿದೆ.

ಹೈನುಗಾರಿಕೆಯಲ್ಲಿ ಸವಾಲುಗಳು ಜಾಸ್ತಿ, ಖರ್ಚು ಹೆಚ್ಚು. ಆದಾಯ ಕಡಿಮೆ. ಹಿಂದೆಂದೂ ಕಾಣದ ಬರಗಾಲ ತಾಲೂಕನ್ನು ಆವರಿಸಿದ್ದು, ಕುಡಿಯುವ ನೀರು, ಜಾನುವಾರುಗಳ ಮೇವಿಗೆ ಬರ ಆವರಿಸಿದೆ. ಬೇಸಿಗೆ ದಿನಗಳನ್ನು ನೆನೆದು ರೈತ ಆತಂಕದಲ್ಲಿ ದಿನ ದೂಡುತ್ತಿದ್ದಾನೆ.

ತಾಲೂಕಿನಾದ್ಯಂತ ಕೃಷಿ ಸಂಪೂರ್ಣ ಕುಸಿದಿರುವ ಪರಿಣಾಮ ಜಾನುವಾರುಗಳಿಗೆ ಬೇಕಾಗಿರುವ ಮೇವಿನ ಬೆಲೆ ಗಗನಕ್ಕೆ ಏರಿದೆ. ಮೇವು ಕೊಂಡುಕೊಳ್ಳಲು ಸಾಧ್ಯವಾಗದೆ ರೈತರು ಕಂಗಾಲಾಗಿದ್ದಾರೆ. ಅನಿವಾರ್ಯವಾಗಿ ಕೊಳ್ಳಲೇಬೇಕಾಗಿರುವ ಕಾರಣ ಸಾಲ ಮಾಡಿ ಮೇವನ್ನು ಕೊಂಡುಕೊಳ್ಳುತ್ತಿದ್ದಾರೆ. ಇದರಿಂದ ರೈತರಿಗೆ ರಾಸು, ಆಕಳು, ಎಮ್ಮೆಗಳಿಗೆ ಮೇವು ಹೊಂದಿಸುವುದೇ ದೊಡ್ಡ ಸಾಹಸದ ಕೆಲಸವಾಗಿ ಪರಿಣಮಿಸಿದೆ.

ತಾಲೂಕಿನಲ್ಲಿ ಮೇವು ಬೆಳೆಗಳಾದ ಜೋಳ, ಮೆಕ್ಕೆಜೋಳ ಸೇರಿದಂತೆ ಇತರೆ ಬೆಳೆಗಳು ಮಳೆಯ ಕೊರತೆಯಿಂದ ಬಿತ್ತನೆಯಾಗಿದ್ದರೂ ಮೇಲೆಳದೆ ಒಣಗಿವೆ. ವರ್ಷವಿಡಿ ಜಾನುವಾರುಗಳ ಆಹಾರಕ್ಕೆ ಸಿಗಬೇಕಾದ ಜೋಳದ ಕಣಕಿ ಸಿಗದೇ ಇರುವುದರಿಂದ ಜಾನುವಾರುಗಳಿಗೂ ಮೇವಿನ ಬರ ಎದುರಾಗಿದೆ. ಹಿಂಗಾರು ಬಿತ್ತನೆಯ ವಾರ್ಷಿಕ ಗುರಿಯನ್ನು ತಲುಪಲು ಸಾಧ್ಯವಾಗಿರುವುದಿಲ್ಲ. ಒಂದು ಸೂಡು ಒಣ ಕಣಕಿ(ಜೋಳದ ದಂಟು) ₹15 ರಿಂದ 20ಗಳನ್ನು ಮಾರಾಟವಾದರೆ, ಒಂದು ಟ್ರ್ಯಾಕ್ಟರ್ ಒಣ ಕಣಕಿಗೆ(ಮೇವಿಗೆ) 8 ರಿಂದ 10 ಸಾವಿರ ರು.ಗಳ ವರೆಗೆ ಮಾರಾಟವಾಗುತ್ತಿದೆ. ಹಸಿ ಮೇವಂತೂ ಹುಡುಕಿದರೂ ಸಿಗುತ್ತಿಲ್ಲ. ಹೈನುಗಾರಿಕೆ ಮಾಡುವ ರೈತರು ತೋಟದಲ್ಲಿ ಬೆಳೆದಿದ್ದರೂ, ನೀರಿನ ಕೊರತೆಯಿಂದ ಅದು ಅಷ್ಟಕಷ್ಟೇ ಆಗಿದೆ. ಹೀಗಾಗಿ ಒಣ,ಹಸಿ ಮೇವಿನ ಸಮಸ್ಯೆಯಿಂದ ಹಾಗೂ ಭೀಕರ ಸುಡು ಬಿಸಿಲಿನ ತಾಪಕ್ಕೆ ಜಾನುವಾರುಗಳು ಹಾಲು ನೀಡುವುದು ಕಡಿಮೆಯಾಗಿದೆ. ಒಟ್ಟಿನಲ್ಲಿ ಬರಗಾರ, ಸುಡು ಬಿಸಿಲು ಬದುಕನ್ನೇ ಬರ್ಬಾದ ಮಾಡಿದೆ.

ಕೋಟ್

-ಮಲ್ಲಿಕಾರ್ಜುನ ಗುಡ್ಲ, ಪ್ರಗತಿಪರ ರೈತ ಹಾಗೂ ಹೈನುಗಾರಿಕೆ ಕೃಷಿ ರೈತ.

ಬೇಸಿಗೆಯಲ್ಲಿ ಉಷ್ಣತೆ ಜಾಸ್ತಿ ಇರುವುದರಿಂದ ಹಾಲು ಉತ್ಪಾದನೆ ಕಡಿಮೆ ಆಗುತ್ತದೆ. ಒಂದು ಜಾನುವಾರುದಿಂದ ಒಂದು ಲೀಟರ್‌ ಹಾಲು ಉತ್ಪಾದನೆಯಲ್ಲಿ ಕಡಿಮೆಯಾಗುತ್ತದೆ. ಬೇಸಿಗೆಯಲ್ಲಿ ಉಷ್ಣತೆಯ ಸಮಸ್ಯೆಯ ಜೊತೆಗೆ ಜಾನುವಾರುಗಳಿಗೆ ಹಸಿ ಮೇವು ಸಿಗದೇ ಇರುವುದರಿಂದ ಹಾಲು ಉತ್ಪಾದನೆ ಕಡಿಮೆಯಾಗುತ್ತದೆ.