ಜಾಗತಿಕ ತಾಪ ಕಡಿಮೆಗೊಳಿಸಲು ಪರಿಸರ ಪೋಷಣೆ ಅಗತ್ಯ: ನಾಗರಾಜ್

ಕನ್ನಡಪ್ರಭ ವಾರ್ತೆ ಚಿಕ್ಕಬಳ್ಳಾಪುರ

ನಗರದ ಪೂರ್ಣ ಪ್ರಜ್ಞ ಶಾಲೆಯ ಮುಂಭಾಗದ ರಸ್ತೆಗೆ ಬುಧವಾರ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳ ಕಚೇರಿ, ಸಾಮಾಜಿಕ ಅರಣ್ಯ ವಿಭಾಗ,ಸಮಾನ ಮನಸ್ಕರ ಪ್ರಕೃತಿ ಸಂರಕ್ಷಣಾ ವೇದಿಕೆ, ಕೆನರಾ ಬ್ಯಾಂಕ್, ಎಫ್ ಎಲ್ ಸಿ, ಪೂರ್ಣ ಪ್ರಜ್ಞ ಶಾಲೆ ಹಾಗೂ ನಗರಸಭೆ ಸಂಯುಕ್ತಾಶ್ರಯದಲ್ಲಿ ಹಮ್ಮಿಕೊಂಡಿದ್ದ ವನಮಹೋತ್ಸವ - 2024 ಕಾರ್ಯಕ್ರಮದ ಅಂಗವಾಗಿ ರಸ್ತೆ ಪಕ್ಕ ಸಾಲು ಮರ- ಗಿಡ ನೆಡುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿ, ದೇಶದಾದ್ಯಂತ ಕೋಟ್ಯಾಂತರ ಗಿಡಗಳನ್ನು ನೆಡುತ್ತಿದ್ದೇವೆ, ಇದರಿಂದ ಜಾಗತಿಕ ತಾಪಮಾನ ಹಾಗೂ ಪರಿಸರ ಮಾಲಿನ್ಯ ತಡೆಯಲು ಸಹಾಯವಾಗುತ್ತದೆ. ಪ್ರಕೃತಿ ಮಧ್ಯೆ ನಾವೆಲ್ಲ ಖುಷಿಯನ್ನು ಹಂಚಕೊಳ್ಳುತ್ತಿದ್ದೇವೆ ಎಂದರು.

ಸಂಚಾರಿ ಪೊಲೀಸ್ ಠಾಣಾ ಪಿಎಸ್ಐ ಮಂಜುಳ ಮಾತನಾಡಿ, ಪ್ರತಿಯೊಬ್ಬರೂ ತಮ್ಮ ಹುಟ್ಟುಹಬ್ಬ, ಸಂತೋಷದ ಸಮಾರಂಭಗಳನ್ನು ಗಿಡ ನೆಡುವ ಮೂಲಕ ಮೂಲಕ ಆಚರಿಸಿಕೊಳ್ಳಬೇಕು. ರಸ್ತೆಯ ಅಕ್ಕ- ಪಕ್ಕ ಮರಗಿಡಗಳನ್ನು ಕತ್ತರಿಸುವ ಪರಿಪಾಠ ಬಿಡಬೇಕು, ರಸ್ತೆ ಸಂಚಾರಿ ನಿಯಮಗಳನ್ನು ಪಾಲಿಸಿ ಉತ್ತಮ ಸಂಚಾರಕ್ಕೆ ಅವಕಾಶ ಮಾಡಿಕೊಡೋಣ ಎಂದರು.

ಸುಮಾರು ಮೂರು ಲಕ್ಷ ಗಿಡಗಳನ್ನು ನೆಟ್ಟು ರಾಜ್ಯ ಪ್ರಶಸ್ತಿ ಪುರಸ್ಕಾರಕ್ಕೆ ಭಾಜನಾಗಿರುವ ಗುಂಪುಮರದ ಆನಂದ್ ಅವರಿಗೆ ಗೌರವ ಸನ್ಮಾನ ಮಾಡಲಾಯಿತು.

ನಗರಸಭೆ ಪರಿಸರ ಅಭಿಯಂತರೆ ಉಮಾ ಶಂಕರ್, ಕೆನರಾ ಬ್ಯಾಂಕ್ ಎಫ್ ಎಲ್ ಸಿ ಸಲಹೆಗಾರ್ತಿ ಕವಿತ, ಪೂರ್ಣ ಪ್ರಜ್ಞ ಶಾಲೆಯ ಅಧ್ಯಕ್ಷ ಎನ್.ವೆಂಕಟೇಶ್, ಸಮಾನ ಮನಸ್ಕರ ಸಂಘದ ಸದಸ್ಯ ಕೆ .ಎಸ್.ನಾರಾಯಣಸ್ವಾಮಿ, ಮತ್ತಿತರರು ಇದ್ದರು.