ಕಾಂಗ್ರೆಸ್ ಕಚೇರಿ ಜಾಗದಲ್ಲಿದ್ದ ಅಂಗಡಿ ಮಳಿಗೆಗಳ ತೆರವು

ಹಿರಿಯೂರು: ನಗರದ ಶ್ರೀಶೈಲ ವೃತ್ತದ ಬಳಿಯಿರುವ ಕಾಂಗ್ರೆಸ್ ಪಕ್ಷದ ಹೆಸರಿನಲ್ಲಿದ್ದ ಜಾಗದಲ್ಲಿ ಕಳೆದ ನಲವತ್ತು ವರ್ಷಕ್ಕೂ ಹೆಚ್ಚಿನ ಕಾಲದಿಂದ ಅಂಗಡಿ ಮಳಿಗೆ ನಿರ್ಮಿಸಿಕೊಂಡು ವ್ಯಾಪಾರ ಮಾಡುತ್ತಿದ್ದವರನ್ನು ಬುಧವಾರ ತೆರವುಗೊಳಿಸಲಾಯಿತು.

ಬುಧವಾರ ಅಂಗಡಿ ಮಳಿಗೆಗಳನ್ನು ತೆರವುಗೊಳಿಸಿದ ನಗರಸಭೆಯವರು ವಾಸದ ಮನೆಗಳವರಿಗೆ ಖಾಲಿ ಮಾಡಲು ಸೂಚಿಸಿದ್ದಾರೆ ಎನ್ನಲಾಗಿದೆ. ವಾಸದ ಮನೆಗಳಲ್ಲಿ ಒಂದು ಮನೆಗೆ ಇದೇ ನಗರಸಭೆ ಹಿಂದೆ ಪುರಸಭೆಯಾಗಿದ್ದಾಗ ಖಾತೆ ಎಕ್ಸ್ ಟ್ರಾಕ್ಟ್ ಕೊಟ್ಟು ಕಂದಾಯ ಕಟ್ಟಿಸಿಕೊಂಡಿದೆ.

ಜಾಗ ಅವರದೇ ಎಂಬುದು ಗೊತ್ತು. ಆದರೆ ಅಂಗಡಿಗಳ ಒಳಗಿನ ವಸ್ತುಗಳನ್ನು ತೆಗೆದುಕೊಳ್ಳಲು ಸಹ ಬಿಡದೆ ಜೆಸಿಬಿಯಿಂದ ನೂಕತೊಡಗಿದರು. ಲಕ್ಷಾಂತರ ರು. ಬಂಡವಾಳ ಹಾಕಿ ಮಳಿಗೆ ನಿರ್ಮಿಸಿಕೊಂಡಿದ್ದೇವೆ. ತೆರವು ಮಾಡಿಕೊಳ್ಳಲು ಸಹ ಸಮಯ ಕೊಡದಿದ್ದರೆ ಹೇಗೆ ಹೇಳಿ ? ಎಲ್ಲಿಂದ ಎಲ್ಲಿಯವರೆಗೆ ಕಾಂಗ್ರೆಸ್ ಜಾಗವಿದೆ ಎಂಬುದು ಗೊತ್ತಿಲ್ಲ. ಇಲ್ಲಿನ ಯಾರಿಗೂ ಒಂದು ನೋಟಿಸ್ ನೀಡಿಲ್ಲ. ಎರಡು ದಿನದ ಹಿಂದೆ ಬಂದು ಹೇಳಿ ಹೋಗಿದ್ದೆ ಕೊನೆ. ಬುಧವಾರ ಬಂದು ಎಲ್ಲವನ್ನು ತೆರವು ಮಾಡಿದರು ಎಂದು ದೂರಿದರು.

ತಾಲೂಕು ಜೆಡಿಎಸ್ ಅಧ್ಯಕ್ಷ ಹನುಮಂತರಾಯಪ್ಪ ಪ್ರತಿಕ್ರಿಯೆ ನೀಡಿ, ಅಂಗಡಿಯ ಶೆಡ್ ಗಳನ್ನು ಜೆಸಿಬಿ ಯಂತ್ರ ಬಳಸಿ ಕಿತ್ತು ಮತ್ತೆ ಉಪಯೋಗಕ್ಕೆ ಬರದಂತೆ ಮಾಡಿದ್ದಾರೆ. ಅದು ಕಾಂಗ್ರೆಸ್ ಕಚೇರಿಯ ಹೆಸರಲ್ಲೇ ಜಾಗವಿರಲಿ. ಆದರೆ ತೆರವು ಮಾಡುವಾಗ ಅನುಸರಿಸಬೇಕಾದ ನಿಯಮಗಳನ್ನು ಗಾಳಿಗೆ ತೂರಿ ಅಧಿಕಾರ ದರ್ಪ ತೋರಿಸಿದ್ದಾರೆ ಎಂದು ದೂರಿದರು.