ನಿರಂತರ ಮಳೆಯಿಂದ ಬೆಳೆ ರಕ್ಷಣೆಗೆ ರೈತರ ಪರದಾಟ

ಮಹದೇವಪ್ಪ ಎಂ. ಸ್ವಾಮಿ

ಒಂದು ಕಾಲಕ್ಕೆ ಮಳೆ ಬರಲಿ ಎಂದು ಕಪ್ಪೆಗಳಿಗೆ ಮದುವೆ ಮಾಡಿಸುವುದು, ಕಂಡ ಕಂಡ ದೇವರಿಗೆ ಪ್ರಸ್ತಾ ಮಾಡುವುದು, ಭಜನೆ ಮಾಡಿದರೂ ಕರಗದ ಮಳೆರಾಯ ಈಗ ಸಾಕಪ್ಪ ಎಂದರೂ ಬಿಡುವು ಕೊಡುತ್ತಿಲ್ಲ. ಇದು ಸಧ್ಯ ತಾಲೂಕು ಮಾತ್ರವಲ್ಲ ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿಯ ಸ್ಥಿತಿಯಾಗಿದೆ. ಅಕಾಲಿಕ ಮಳೆಗೆ ರೈತರು ಕಂಗೆಟ್ಟು ಹೋಗಿದ್ದಾರೆ.

ಹತ್ತಿ, ತೊಗರಿ ಹೂ ಬಿಡುವ ಹಂತದಲ್ಲಿದ್ದು, ಕೆಲವೆಡೆ ಕಾಯಿ ಕಟ್ಟಿದ ಮಾಹಿತಿಯೂ ಇದೆ. ಸತತ ಮಳೆಯಿಂದ ಸಂಪೂರ್ಣ ಬೆಳೆ ನೆಲಕ್ಕೊರಗಿದೆ. ಇದರಿಂದ ರೈತರಿಗೆ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ. ತಾಲೂಕಿನಲ್ಲಿ ಮೆಕ್ಕೆಜೋಳ, ಶೇಂಗಾ ನಿರೀಕ್ಷೆ ಮೀರಿ ಬಿತ್ತನೆ ಮಾಡಲಾಗಿದ್ದು, ಎಷ್ಟರ ಮಟ್ಟಿಗೆ ಫಸಲು ರೈತರ ಕೈ ಸೇರುತ್ತದೆ ಎಂಬ ಆತಂಕ ಕಾಡುತ್ತಿದೆ.

ಅತೀವೃಷ್ಟಿ, ಅನಾವೃಷ್ಟಿ, ಬರಗಾಲ ಅಂತಲೇ ರೈತರು ವರ್ಷವಿಡಿ ಕಾಲ ಕಳೆಯುವಂತಾಗುತ್ತಿದ್ದು, ಮಳೆ ಬಂದರೆ ಸಾಕು ರೈತರ ಎದೆ ಢವ ಢವ ಎನ್ನಲು ಶುರುವಾಗುತ್ತದೆ. ಮಳೆಗೆ ತಾಲೂಕಿನಲ್ಲಿ ಸಾಕಷ್ಟು ಬೆಳೆ ಹಾನಿ ಸಂಭವಿಸುವ ಸಾಧ್ಯತೆ ಇದೆ. ಸುರಿಯುತ್ತಿರುವ ಮಳೆಯಲ್ಲಿಯೇ ಕೆಲ ರೈತರು ಕಂಠಿ ಶೇಂಗಾ ಒಕ್ಕಲಿ ಮಾಡಿದ್ದು, ಒಣಗಿಸಿ, ಸ್ವಚ್ಚಗೊಳಿಸಿ ಮಾರಾಟ ಮಾಡಬೇಕು ಎಂದರೆ ಬಿಸಿಲಿನ ದರ್ಶನವೇ ಆಗುತ್ತಿಲ್ಲ. ಬಂದ ಫಸಲಿಗೆ ಮಾರುಕಟ್ಟೆಯಲ್ಲಿ ಯೋಗ್ಯ ದರ ಕೂಡ ಸಿಗದೇ ಇರುವುದಕ್ಕೆ ಶೇಂಗಾ ಬೆಳೆದ ರೈತರು ಕಂಗೆಟ್ಟು ಹೋಗಿದ್ದಾರೆ.

ಮಾಲಪ್ಪ ಚವ್ಹಾಣ.