ಹರಿವು ಸ್ಥಗಿತ: ಕಾವೇರಿ ತವರಲ್ಲೇ ಜಲಕ್ಷಾಮ!

ವಿಶೇಷ ವರದಿ ಕನ್ನಡಪ್ರಭ ವಾರ್ತೆ ಕುಶಾಲನಗರ

ದುಬಾರೆ ಸಾಕಾನೆ ಶಿಬಿರದ ಬಳಿಯಿಂದ ಕುಶಾಲನಗರ ಕೂಡಿಗೆ ತನಕ ನದಿ ಸಂಪೂರ್ಣ ಬತ್ತಿ ಹೋಗಿ ಎಲ್ಲಿ ನೋಡಿದರೂ ಕಂಡು ಬರುವ ಕಲ್ಲು ಬಂಡೆಗಳು, ಅಲ್ಲಲ್ಲಿ ಅಲ್ಪಸ್ವಲ್ಪ ನಿಂತಿರುವ ನೀರು. ನದಿಯಲ್ಲಿ ಜಲಚರಗಳ ಮಾರಣ ಹೋಮದ ದೃಶ್ಯಗಳು ಗೋಚರಿಸತೊಡಗಿವೆ.

ಭಾಗಮಂಡಲದಿಂದ ಕುಶಾಲನಗರ ತನಕ ಹರಿಯುವ ಕಾವೇರಿಯಲ್ಲಿ ಎಲ್ಲಿಯೂ ನೀರಿನ ಸಂಗ್ರಹಣಾ ವ್ಯವಸ್ಥೆಗೆ ಯೋಜನೆಗಳನ್ನು ರೂಪಿಸಿಲ್ಲ. ನದಿಯ ಪೂಜೆ ನೆರವೇರಿಸಲು ಕೊಳವೆ ಬಾವಿಯ ನೀರನ್ನು ಆಶ್ರಯಿಸಬೇಕಾದ ಪರಿಸ್ಥಿತಿ ಉಂಟಾಗಿದೆ.

ನದಿಯ ತಟದ ಭಾಗಗಳ ಕೊಳವೆ ಬಾವಿಯಲ್ಲಿ ಕೂಡ ನೀರಿನ ಮಟ್ಟ ಸಂಪೂರ್ಣ ಕುಸಿದಿದ್ದು, ಜನತೆ ನೀರಿಗಾಗಿ ಭವಣೆ ಪಡುವ ಪರಿಸ್ಥಿತಿ ಎದುರಾಗಿದೆ.

ಕುಶಾಲನಗರದ ಬಹುತೇಕ ಕಚೇರಿಗಳಲ್ಲಿ ಶುದ್ಧ ಕುಡಿಯುವ ನೀರಿನ ಅಭಾವ ತಲೆದೋರಿದೆ. ಲಭ್ಯ ನೀರಿನ ಗುಣಮಟ್ಟ ಕೂಡ ಕುಸಿದಿದೆ. ಇದರಿಂದ ಬಹುತೇಕ ಮಂದಿ ತಮ್ಮ ಮನೆಯಿಂದಲೇ ಕಚೇರಿಗೆ ಶುದ್ಧ ಕುಡಿಯುವ ನೀರನ್ನು ಒಯ್ಯಬೇಕಾದ ಪರಿಸ್ಥಿತಿ ಉಂಟಾಗಿದೆ.