ಮುಡುಕುತೊರೆ ನದಿಯಲ್ಲಿ ಪುಣ್ಯಸ್ನಾನಕ್ಕೆಂದು ಬಂದ ಭಕ್ತರಿಗೆ ಮುಜಗರ

- ಮುಡುಕುತೊರೆ ಸೋಪಾನ ಕಟ್ಟೆಯ ನೀರಿನಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯಗಳ ರಾಶಿ

ಅಕ್ರಂಪಾಷ ತಲಕಾಡು

ಮುತ್ತೈದೆಯರ ಪೂಜೆಗೆ ಮುಡುಕುತೊರೆ ನದಿಯಲ್ಲಿ ಪುಣ್ಯಸ್ನಾನಕ್ಕೆಂದು ಚಾಮರಾಜನಗರ, ಮೈಸೂರು ಜಿಲ್ಲಾ ಭಾಗದಿಂದ ಸಹಸ್ರಾರು ಸಂಖ್ಯೆಯಲ್ಲಿ ಶುಕ್ರವಾರ ಆಗಮಿಸಿದ್ದ ಮಹಿಳಾ ಭಕ್ತರು, ನದಿ ನೀರಿಗಿಳಿಯುವ ಸ್ಥಳದಲ್ಲಿ ಸ್ವಚ್ಚತೆ ಇಲ್ಲದೆ ಮುಜುಗರ ಅನುಭವಿಸಿದರು.

ಗುರುವಾರ ಹುಣ್ಣಿಮೆಯ ದಿನ ಮುಕ್ತಾಯಗೊಂಡು ಶುಕ್ರವಾರದ ವಿಶೇಷ ಶುಭದಿನ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಮುಡುಕುತೊರೆಗೆ ಆಗಮಿಸಿದ್ದರು.

ಇಲ್ಲಿನ ನದಿಯಲ್ಲಿ ಭಕ್ತರು ಪುಣ್ಯಸ್ನಾನಕ್ಕೆ ನೆರವಾಗಲು ಸ್ನಾನಘಟ್ಡದ ಉದ್ದಕ್ಕೂ ನೂತನವಾಗಿ ಕಲ್ಲು ಚಪ್ಪಡಿ ಅಳವಡಿಸಿದ್ದು, ಸ್ಟೈನ್ ಲೆಸ್ ಸ್ಟೀಲ್ ಬ್ಯಾರಿಕೇಡ್ ಕೂಡ ನದಿಯಾಳದ ಕಡೆ ಭಕ್ತರು ಜಾರಿ ಹೋಗದಂತೆ ಸುರಕ್ಷತೆಗೆ ಅಳವಡಿಸಿದ್ದಾರೆ.

ಕಾಲಕಾಲಕ್ಕೆ ಇಲ್ಲಿನ ಸ್ನಾನಘಟ್ಟದ ಬಳಿ ಸೇರುವ ತ್ಯಾಜ್ಯದ ಸ್ವಚ್ಚತೆ ಮಾಡಲು ಸಂಬಂಧಪಟ್ಟವರು ನಿರ್ಲಕ್ಷ್ಯ ವಹಿಸಿದ್ದರಿಂದ, ರಾಜ್ಯದ ನಾನಾ ಭಾಗಗಳಿಂದ ಶ್ರೀಶೈಲ ಪುಣ್ಯಕ್ಷೇತ್ರವೆಂದು ಪ್ರಸಿದ್ದಿ ಪಡೆದ ಶ್ರೀಭ್ರಮರಾಂಬ ಮಲ್ಲಿಕಾರ್ಜುನ ಸನ್ನಿಧಿಗೆ ಆಗಮಿಸುವ ಭಕ್ತರ ಮುಜುಗರಕ್ಕೆ ಕಾರಣವಾಗಿದೆ. ಮುಂದಿನ ಅಮವಾಸ್ಯೆವರೆಗೆ ಎರಡು ವಾರ ಕಾಲ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಇಲ್ಲಿಗೆ ಆಗಮಿಸುವುದರಿಂದ ಸೋಪಾನಕಟ್ಟೆಯ ಸ್ವಚ್ಚತೆಗೆ ಆದ್ಯತೆ ನೀಡುವಂತೆ ಯಾತ್ರಾರ್ಥಿಗಳು ಒತ್ತಾಯಿಸಿದ್ದಾರೆ.

ಈ ವಾರ ಉತ್ತಮ ಮಳೆಯಾದ್ದರಿಂದ ನದಿಯಲ್ಲಿ ಹೆಚ್ಚಿನ ನೀರಿನ ಜತೆ ಜೊಂಡು ತ್ಯಾಜ್ಯ ಹರಿದು ಬಂದು ಸೋಪಾನ ಕಟ್ಟೆಯ ಬಳಿ ಆವರಿಸಿದೆ. ಕೂಡಲೆ ಸ್ವಚ್ಚತೆಗೆ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತದೆ.

-----

- ಶಿವಕುಮಾರ್, ಸರ್ವೋದಯ ಜನಜಾಗೃತಿ ಟ್ರಸ್ಟ್ ಅಧ್ಯಕ್ಷರು, ಕಣ್ಣೂರು ಮಂಗಲ, ಹನೂರು ತಾಲೂಕು.

ಇಲ್ಲಿ ಪುಣ್ಯಸ್ನಾನದ ಮಾತಿರಲಿ ತಟ್ಟೆ ನೀರಿನಲ್ಲಿ ಜಾಲಾಡಿಸಲು ಆಗದಂತೆ ಜೊಂಡು ಕಸ ಆವರಿಸಿದೆ. ಸಂಬಂಧ ಪಟ್ಟವರು ಇಲ್ಲಿನ ಸೋಪಾನ ಕಟ್ಟೆಯ ಸ್ವಚ್ಚತೆ ನೆರವೇರಿಸಿ ಮುಂದಿನ ಸೋಮವಾರ ಹಾಗು ಶುಕ್ರವಾರ ಆಗಮಿಸುವ ಭಕ್ತರ ಪುಣ್ಯಸ್ನಾನಕ್ಕೆ ಅನುಕೂಲ ಮಾಡಿಕೊಡಬೇಕು.

-------