ಹಿಂದುತ್ವ ಎಂದಿಗೂ ಬಹುತ್ವದ ವಿರೋಧಿಯಲ್ಲ: ಗೋಪಾಲ ಬಳ್ಳಾರಿ

ಭಟ್ಕಳ: ಎಲ್ಲರನ್ನೂ ಒಗ್ಗೂಡಿಸಿಕೊಂಡು ಹೋಗುವ ಅಖಂಡ ಭಾರತದ ಕಲ್ಪನೆ ರಾಷ್ಟ್ರೀಯ ಸ್ವಯಂಸಂಘದ್ದಾಗಿದೆ. ಸಂಘದ ಉದ್ದೇಶವೇ ಜಗತ್ತಿನಲ್ಲಿ ಶಾಂತಿ, ನೆಮ್ಮದಿಯನ್ನು ಬಯಸುವುದಾಗಿದೆ. ಸಂಘ ಯಾರ ವಿರೋಧಿಯೂ ಅಲ್ಲ ಎಂದು ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಉತ್ತರ ಪ್ರಾಂತ ಸಂಚಾಲಕ ಗೋಪಾಲ ಬಳ್ಳಾರಿ ತಿಳಿಸಿದರು.

ನಮ್ಮ ಹಿಂದುತ್ವ ಎಂದಿಗೂ ಬಹುತ್ವದ ವಿರೋಧಿಯಲ್ಲ, ನಮ್ಮದು ಬಹುತ್ವದ ಧರ್ಮವಾಗಿದೆ. ನಾವು ಯಾವತ್ತೂ ಮತಾಂತರವನ್ನು ಮಾಡಿಲ್ಲ. ಜಗತ್ತಿಗೆ ಭಯೋತ್ಪಾದಕರನ್ನು ಕೂಡಾ ಕೊಟ್ಟಿಲ್ಲ. ಜಗತ್ತಿಗೆ ಉತ್ತಮ ಶ್ರೇಷ್ಠ ಗ್ರಂಥಗಳನ್ನು ನೀಡಿದ ನಮ್ಮ ದೇಶ, ಹಿಮಾಲಯದ ರಚನೆಗೂ ಪೂರ್ವ ವೇದಗಳನ್ನು ರಚನೆ ಮಾಡಿದೆ ಎಂದರೆ ನಮ್ಮ ವೇದ ಎಷ್ಟು ಹಳೆಯದು ಎನ್ನುವುದನ್ನು ಊಹಿಸಲೂ ಅಸಾಧ್ಯ ಎಂದ ಅವರು, ಇಂದು ಜಗತ್ತಿನ ಅಶಾಂತಿಗೆ ಅಮೆರಿಕ ಸೇರಿದಂತೆ ವಿಶ್ವಸಂಸ್ಥೆಯ ಕಾಯಂ ಸದಸ್ಯತ್ವ ಹೊಂದಿದ ರಾಷ್ಟ್ರ ಕಾರಣವಾಗಿವೆ ಎಂದು ಆರೋಪಿಸಿದ ಅವರು, ಇಂದಿಗೂ ಭಾರತಕ್ಕೆ ಕಾಯಂ ಸದಸ್ಯತ್ವ ಪಡೆಯಲು ಸಾಧ್ಯವಾಗಿಲ್ಲ ಎನ್ನುವುದಕ್ಕೆ ಅವರ ಪಿತೂರಿಯೇ ಕಾರಣವಾಗಿದೆ.

ಚೌತನಿಯ ಭಾಸ್ಕರ ಆಚಾರ್ಯ ಮಾತನಾಡಿ, ಸಂಘದ ಶಾಖೆಗಳಿಗೆ ಹೋಗಿರುವುದರಿಂದ ಜೀವನದಲ್ಲಿ ಶಿಸ್ತನ್ನು ಅಳವಡಿಸಿಕೊಂಡು ಯಶಸ್ಸನ್ನು ಸಾಧಿಸಲು ಸಾಧ್ಯವಾಯಿತು. ಪಾಲಕರು ತಮ್ಮ ಮಕ್ಕಳಿಗೆ ಮೊಬೈಲ್ ಕೊಟ್ಟು ಅವರಲ್ಲಿ ಅಶಿಸ್ತನ್ನು ಕಲಿಸುವುದಕ್ಕಿಂತ ಕನಿಷ್ಠ ವಾರಕ್ಕೊಮ್ಮೆ ನಡೆಯುವ ಸಂಘದ ಶಾಖೆಗೆ ಕಳುಹಿಸಿ ಜೀವನದಲ್ಲಿ ಶಿಸ್ತನ್ನು ಕಲಿಸಲು ಮುಂದಾಗಬೇಕು. ಸಂಘದ ಶಾಖೆಗೆ ಹೋಗುವುದೆಂದರೆ ದೇಶಸೇವೆ ಮಾಡಿದಂತೆ ಎಂದ ಅವರು, ಇದೊಂದು ನಮಗೆ ದೇಶ ಸೇವೆಗೆ ಇರುವ ಅವಕಾಶವಾಗಿದೆ ಎಂದರು.