ಕೆ.ಆರ್.ಪೇಟೆ ತಾಲೂಕಿನಲ್ಲಿ ಹೆಚ್ಚಿದ ಚಿರತೆ ಹಾವಳಿ; ಸಾಕು ನಾಯಿಗಳು, ಜಾನುವಾರುಗಳು ಬಲಿ

ಕನ್ನಡಪ್ರಭ ವಾರ್ತೆ ಕೆ.ಆರ್.ಪೇಟೆ

ಡಿ.1ರಂದು ತಾಲೂಕಿನ ಬಿ.ಕೋಡಿಹಳ್ಳಿಯಲ್ಲಿ ರೈತ ಮಹಿಳೆ ಗೌರಮ್ಮರ ಸುಮಾರು 50 ಸಾವಿರ ರು. ಬೆಲೆ ಬಾಳುವ ಹಾಲುಕೊಡುವ ಎಮ್ಮೆ ಚಿರತೆಗೆ ಬಲಿಯಾಗಿದೆ. ಹಾಲುಕೊಡುವ ಎಮ್ಮೆಯನ್ನು ಕಳೆದುಕೊಂಡ ರೈತ ಮಹಿಳೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅಗ್ರಹಾರಚಾಹಳ್ಳಿ ಸುತ್ತಮುತ್ತಲ ಗ್ರಾಮಗಳಲ್ಲಿ ಕಳೆದ ನಾಲ್ಕುತಿಂಗಳ ಅವಧಿಯಲ್ಲಿ ಜಾನುವಾರುಗಳ ಮೇಲೆ ಚಿರತೆ 5ನೇ ಬಾರಿ ದಾಳಿ ಮಾಡಿದೆ. ಕಳೆದ ನವಂಬರ್ 18ರಂದು ತಾಲೂಕಿನ ಹುಬ್ಬನಹಳ್ಳಿ ರೈತ ಸ್ವಾಮಿ ಅವರಿಗೆ ಸೇರಿದ ಸುಮಾರು 40 ಸಾವಿರ ರು. ಬೆಲೆ ಬಾಳುವ ಹಳ್ಳೀಕಾರ್ ತಳಿ ಹಸುವಿನ ಮೇಲೆ ದಾಳಿ ನಡೆಸಿ ಚಿರತೆ ಬಲಿಪಡೆದಿದೆ. ನವೆಂಬರ್ ಆರಂಭದಲ್ಲಿ ತಾಲೂಕಿನ ಹರಿಹರಪುರ ಗ್ರಾಮದ ರಾಮಕೃಷ್ಣೇಗೌಡರ ಕಬ್ಬಿನ ಗದ್ದೆಯಲ್ಲಿ ಮೂರು ಚಿರತೆ ಮರಿಗಳು ಕಂಡು ಬಂದಿವೆ. ಇದರಲ್ಲಿ ಒಂದು ಮರಿಯನ್ನು ಹಿಡಿದು ರೈತರು ಅರಣ್ಯ ಇಲಾಖೆಗೆ ಒಪ್ಪಿಸಿದ್ದರು. ಈ ಭಾಗದಲ್ಲಿ ಮರಿಗಳೊಂದಿಗೆ ಜೋಡಿ ಚಿರತೆಗಳು ಸಂಚರಿಸುತ್ತಿದ್ದು ಜನ ಕಬ್ಬಿನ ಗದ್ದೆಗಳನ್ನು ಕಂಡರೆ ಸಾಕು ಭಯಪಡುತ್ತಿದ್ದಾರೆ.

ತಾಲೂಕಿನಲ್ಲಿ ತೋಟದ ಮನೆ ವಾಸಿಗಳು ಸಾಕುತ್ತಿರುವ ಬೆಲೆ ಬಾಳುವ ನಾಯಿಗಳು ಚಿರತೆ ದಾಳಿಗೆ ಬಲಿಯಾಗುತ್ತಿವೆ. ತಾಲೂಕಿನ ರೈತರು ಹೆಚ್ಚು ಕಬ್ಬು ಬೆಳೆಯುತ್ತಿದ್ದು, ಈ ಗದ್ದೆಗಳು ಚಿರತೆಗಳ ವಾಸ ಸ್ಥಾನವಾಗುತ್ತಿದೆ. ರಾತ್ರಿ ವೇಳೆ ರೈತರು ನೀರು ಹಾಯಿಸಲು ಜೀವ ಕೈಯಲ್ಲಿ ಹಿಡಿದು ಹೋಗುವಂತಾಗಿದೆ.

ಇಲಾಖೆಯಲ್ಲಿ ಎಂಟು ಬೋನುಗಳಿದ್ದರೂ ಚಿರತೆ ಸೆರೆಹಿಡಿಯಲು ಬೋನಿನ ಕೊರತೆಯಿದೆ ಎಂದು ಹೇಳುವ ಅರಣ್ಯ ಇಲಾಖೆಯ ಅಧಿಕಾರಿಗಳು ಸ್ಥಳೀಯ ಶಾಸಕರ ಜೊತೆಯಲ್ಲಿ ಚರ್ಚಿಸಿ ಇದ್ಕಕೊಂದು ಶಾಶ್ವತವಾದ ಪರಿಹಾರವನ್ನು ಒದಗಿಸಲು ಮುಂದಾಗುತ್ತಿಲ್ಲ.