ಅರ್ಧಕ್ಕೆ ನಿಂತ ಏತ ನೀರಾವರಿಯಿಂದಲೇ ಸಮೃದ್ಧ ಬೆಳೆ!

ಸೋಮರಡ್ಡಿ ಅಳವಂಡಿ

ಬಯಲು ಸೀಮೆಯ ಮಳೆಯಾಶ್ರಿತ ಭೂಮಿಯಲ್ಲಿ ಇಂಥ ಭೀಕರ ಬರದಲ್ಲೂ ಬೆಳೆ ಕಂಗೊಳಿಸುತ್ತಿದೆ.

ಕೊಪ್ಪಳ ತಾಲೂಕಿನ ನವಲಕಲ್ ಬಹದ್ದೂರ್ ಬಂಡಿ ಏತ ನೀರಾವರಿ ಯೋಜನೆ ಅರ್ಧಕ್ಕೆ ನಿಂತಿತ್ತು. ಏಳೆಂಟು ಗ್ರಾಮಗಳ ರೈತರು ಅದರಿಂದಲೇ ನೀರಾವರಿ ಮಾಡಿಕೊಂಡು ರಾಜ್ಯಕ್ಕೆ ಮಾದರಿಯಾಗಿದ್ದಾರೆ. 3-4 ಸಾವಿರ ಎಕರೆ ಪ್ರದೇಶದಲ್ಲಿ ಕಬ್ಬು, ಮೆಕ್ಕೆಜೋಳ, ಮೆಣಸಿನ ಗಿಡ, ಸಜ್ಜೆ, ಶೇಂಗಾ ಮೊದಲಾದ ಬೆಳೆಗಳನ್ನು ಬೆಳೆದಿದ್ದಾರೆ.

ಇದಕ್ಕೆ ಕೆಲವು ಕಿಡಿಗೇಡಿಗಳು ವಿರೋಧ ಮಾಡಿ, ಅಡ್ಡಿಪಡಿಸಲು ಯತ್ನಿಸಿದರು. ಮಧ್ಯಪ್ರವೇಶ ಮಾಡಿದ ಶಾಸಕ ರಾಘವೇಂದ್ರ ಹಿಟ್ನಾಳ್, ಕಾಲುವೆ ನಿರ್ಮಾಣ ಆಗುವವರೆಗೂ ರೈತರು ಬಳಸಿಕೊಳ್ಳಲು ಅವಕಾಶ ಮಾಡಿಕೊಟ್ಟರು. ಇದರಿಂದ ಕುಣಿಕೇರಿ, ಕುಣಿಕೇರಿ ತಾಂಡಾ, ಮಳ್ಳಿಕೇರಿ, ಮುದ್ದಾಬಳ್ಳಿ, ಹ್ಯಾಟಿ, ಬಿ. ಹೊಸಳ್ಳಿ ಹಾಗೂ ಹೂವಿನಹಾಳ ಗ್ರಾಮದ ನೂರಾರು ರೈತರು 3-4 ಸಾವಿರ ಎಕರೆ ಪ್ರದೇಶದಲ್ಲಿನ ಬೆಳೆಯನ್ನು ರಕ್ಷಣೆ ಮಾಡಿಕೊಂಡಿದ್ದಾರೆ.

ಬಂಪರ್ ಬೆಳೆ: ಬಹದ್ದೂರ್ ಬಂಡಿ ಏತ ನೀರಾವರಿ ಯೋಜನೆ ಕಾಲುವೆ ನಿರ್ಮಾಣ ಮಾಡದೆ ಅರ್ಧಕ್ಕೆ ನಿಂತಿದ್ದರೂ ರೈತರ ಚಾಣಾಕ್ಷತನದಿಂದ ನೀರಾವರಿ ಮಾಡಿಕೊಂಡು ಭೀಕರ ಬರದಲ್ಲೂ ಬಂಪರ್ ಬೆಳೆ ಪಡೆಯುವ ನಿರೀಕ್ಷೆಯಲ್ಲಿದ್ದಾರೆ.

ರೈತರು ತೋರಿದ ಬುದ್ಧಿವಂತಿಕೆಯಿಂದ ಪೋಲಾಗುತ್ತಿದ್ದ ನೀರು ಸದ್ಬಳಕೆಯಾಗಿದೆ. 8-10 ಗ್ರಾಮಗಳ ರೈತರು ಭೀಕರ ಬರದಲ್ಲೂ ಬಂಪರ್ ಬೆಳೆ ತೆಗೆಯುವ ನಿರೀಕ್ಷೆಯಲ್ಲಿದ್ದಾರೆ ಎಂದು ಮುಖಂಡ ವಿರೂಪಾಕ್ಷಪ್ಪ ನವೋದಯ ಹೇಳಿದರು.ನವಲಕಲ್ ಏತ ನೀರಾವರಿ ಯೋಜನೆಗೆ ಇನ್ನೂ ಕಾಲುವೆ ಮಾಡಬೇಕಾಗಿದೆ. ಹೀಗಾಗಿ ಕಾಲುವೆ ನಿರ್ಮಾಣ ಮಾಡುವ ವರೆಗೂ ರೈತರಿಗೆ ಅನುಕೂಲ ಮಾಡಿಕೊಡಲಾಗಿದೆ. ಕಾಲುವೆ ನಿರ್ಮಾಣ ಮಾಡಿದ ಮೇಲೆ ಈ ರೈತರು ಸೇರಿದಂತೆ ಯೋಜನೆ ವ್ಯಾಪ್ತಿಯ ಎಲ್ಲ ರೈತರಿಗೂ ಅನುಕೂಲವಾಗಲಿದೆ ಎಂದು ಶಾಸಕ ರಾಘವೇಂದ್ರ ಹಿಟ್ನಾಳ ಹೇಳಿದರು.