ಅಸ್ತಿತ್ವಕ್ಕಾಗಿ ವೀರಶೈವ-ಲಿಂಗಾಯತರು ಹೋರಾಡುವುದು ಅವಶ್ಯ

ಮುಂಡರಗಿ:ಒಂದು ಕೋಟಿಗೂ ಹೆಚ್ಚು ಇದ್ದ ವೀರಶೈವ-ಲಿಂಗಾಯತ ಸಮಾಜ ಇದಿಗ 70ರಿಂದ 80 ಲಕ್ಷ ಆಗಿರುವುದು ವಿಷಾದಕರ ಸಂಗತಿ. ನೈಜ ಜನಸಂಖ್ಯೆ ದಾಖಲಾಗದ ಹೊರತು ಸಮಾಜಕ್ಕೆ ನ್ಯಾಯ ಸಿಗುವುದಿಲ್ಲ. ಅದಕ್ಕಾಗಿ ನ್ಯಾಯ ಸಿಗುವವರೆಗೆ ಹೋರಾಡುವುದು ಅವಶ್ಯವಾಗಿದೆ ಎಂದು ಮುಂಡರಗಿ ಅನ್ನದಾನೀಶ್ವರ ಮಠದ ಪೀಠಾಧಿಪತಿ ಡಾ. ಅನ್ನದಾನೀಶ್ವರ ಮಹಾಸ್ವಾಮೀಜಿ ವೀರಶೈವ-ಲಿಂಗಾಯತರಿಗೆ ಕರೆ ನೀಡಿದ್ದಾರೆ.

ಲಿಂಗಾಯತ ಪದಕ್ಕೆ ಅದೇ ಧರ್ಮವಾಚಕವೆಂದೂ ಅದೇ ಸ್ವತಂತ್ರ ಧರ್ಮವೆಂದು ಪ್ರತಿಪಾದಿಸುವವರೂ ಅಧಿಕವಾಗಿದ್ದಾರೆ. ಈ ಸಂದರ್ಭದಲ್ಲಿ ಇವೆಲ್ಲ ಅನವಶ್ಯಕವಾಗಿವೆ. ಬಹುಸಂಖ್ಯೆಯ ಸಮಾಜವನ್ನು ತುಳಿದು ಹಾಕುವ ಕೆಲವರು ಈಗಾಗಲೇ ವೀರಶೈವ-ಲಿಂಗಾಯತರು ಅಲ್ಪಸಂಖ್ಯಾತರೆಂಬುದನ್ನು ತೋರಿಸಿ, ರಾಷ್ಟ್ರಮಟ್ಟದಲ್ಲಿ ಜನರಲ್ ವರ್ಗಕ್ಕೆ ಸೇರ್ಪಡೆಯಾದ ಕಾರಣ ಸಮಾಜಕ್ಕೆ ಯಾವ ಪ್ರಯೋಜನವೂ ಆಗುತ್ತಿಲ್ಲ. ಯಾವ ಸವಲತ್ತುಗಳು ದೊರೆಯುತ್ತಿಲ್ಲ ಎಂದು ಶ್ರೀಗಳು ಮನವರಿಕೆ ಮಾಡಿದ್ದಾರೆ.

ಜಾತಿಗಳನ್ನು ಬದಿಗಿರಿಸಿ, ಆರ್ಥಿಕವಾಗಿ ಹಿಂದುಳಿದ ಎಲ್ಲ ಸಮಾಜದ ವ್ಯಕ್ತಿಗಳನ್ನು ಗಣನೆ ಮಾಡಿದರೆ ಎಲ್ಲರಿಗೂ ಸಮಾನ ಅವಕಾಶ ಸಾಧ್ಯವಾಗುವುದು. ಹಾಗಾಗಿ ಜನಗಣತಿಯಲ್ಲಿ ಮುಖ್ಯ ಕಾಲಂನಲ್ಲಿ ವೀರಶೈವ -ಲಿಂಗಾಯತ ಎಂದು ನಮೂದಿಸಿ, ಉಪಕಾಲಂನಲ್ಲಿ ನಿಮ್ಮ ಉಪಜಾತಿಯನ್ನು ನಮೂದಿಸಬೇಕೆಂದು ಅನ್ನದಾನೀಶ್ವರ ಸ್ವಾಮೀಜಿ ಕರೆ ನೀಡಿದ್ದಾರೆ.