ಇಂದಿನಿಂದ ಜಾತ್ರಾ ಮಹೋತ್ಸವ ಲೋಕಾಪುರ ಶ್ರೀ ದುರ್ಗಾದೇವಿ

ಶ್ರೀನಿವಾಸ ಬಬಲಾದಿ

ಮುಧೋಳ ತಾಲೂಕಿನ ಸುಕ್ಷೇತ್ರ ಲೋಕಾಪುರ ಗ್ರಾಮ ಸೇರಿದಂತೆ ಅರಳಿಕಟ್ಟಿ, ಲಕ್ಷಾನಟ್ಟಿ, ಜಾಲಿಕಟ್ಟಿ, ಚೌಡಾಪುರ, ವೆಂಕಟಾಪುರ, ನಾಗಣಾಪುರ ಹೀಗೆ ಏಳು ಗ್ರಾಮಗಳ ಭಕ್ತರಿಗೆ ಶ್ರೀ ದುರ್ಗಾದೇವಿ ಆರಾಧ್ಯ ದೇವತೆಯೆಂದು ಪ್ರಸಿದ್ಧಿ ಪಡೆದಿದ್ದು, ಏಳು ವರ್ಷಕ್ಕೊಮ್ಮೆ ಜರುಗುವ ದೇವಿಯ ಜಾತ್ರೆ ಜೂ.14ರಿಂದ 18ರವರೆಗೆ ನಡೆಯಲಿದೆ.

ದೇವಿಗೆ ಪ್ರಥಮ ಪೂಜೆ: ಲೋಕಾಪುರ ಹಾಗೂ ಸುತ್ತಮುತ್ತಲಿನ ಗ್ರಾಮದಲ್ಲಿ ಪ್ರತಿ ಮನೆಗಳಲ್ಲಿ ಯಾವುದೇ ಸಭೆ-ಸಮಾರಂಭ ಜರುಗುವ ಮುನ್ನ ದೇವತೆಗೆ ಪ್ರಥಮ ಪೂಜೆ ಸಲ್ಲಿಸಲಾಗುತ್ತದೆ. ಮಗು ಜನಿಸಲಿ, ಮದುವೆ, ಜಮೀನು ಖರೀದಿ, ಬಿತ್ತನೆ, ಹೊಸ ಮನೆಗಳ ಶಾಂತಿ ಇತರ ಎಲ್ಲಾ ಸಮಾರಂಭಗಳಿಗೂ ಮುಂಚೆ ದೇವಿಯ ಆರಾಧನೆ ಮಾಡುವುದು ಸಂಪ್ರದಾಯವಾಗಿದೆ.

ಬೇರೆ ರಾಜ್ಯಗಳ ಭಕ್ತರ ಆಗಮನ: ದುರ್ಗಾದೇವಿ ಜಾತ್ರೆ ಈ ಭಾಗದ ಬಹುದೊಡ್ಡ ಜಾತ್ರೆಯಾಗಿದೆ. ರಾಜ್ಯದ ಮೂಲೆ-ಮೂಲೆಗಳಿಂದ ಹಾಗೂ ಗೋವಾ, ಮಹಾರಾಷ್ಟ್ರ ರಾಜ್ಯಗಳಿಂದಲೂ ಭಕ್ತರ ಮಹಾಪೂರವೇ ಹರಿದು ಬರುತ್ತದೆ.

ಅದೇ ದಿನ ನಾಗಣಾಪುರ ಗ್ರಾಮದವರಿಂದ ಉಡಿ ತುಂಬವ ಕಾರ್ಯಕ್ರಮ, ಸಂಜೆ ೭ ಕ್ಕೆ ಮದ್ದು ಸುಡುವ ಕಾರ್ಯಕ್ರಮ, ರಾತ್ರಿ ೧೦.೩೦ಕ್ಕೆ ವಿವಿಧ ಕಲಾ ಮೇಳದಿಂದ ಚೌಡಕಿ ಪದಗಳು ಜರುಗುವುವು.

ಜೂ.೧೪ರಂದು ನೂತನ ರಥಕ್ಕೆ ರಥಾಂಗ ಹೋಮ ಹಾಗೂ ರಥ ಸಂಸ್ಕಾರದೊಂದಿಗೆ ೧೧.೪೫ಕ್ಕೆ ವಾಡೇದ ಲಕ್ಷ್ಮೀದೇವಿ ದೇವಸ್ಥಾನದಿಂದ ಬಜಾರ್‌ ಮಾರ್ಗವಾಗಿ ವಿವಿಧ ಜಾನಪದ ವಾದ್ಯಮೇಳ, ಕೋಲಾಟ ಮುಂತಾದ ವಾದ್ಯತಂಡಗಳೊಂದಿಗೆ ರಥೋತ್ಸವ ನಡೆಯಲಿದೆ. ೧೫ರಂದು ಬೆಳಗ್ಗೆ ದುರ್ಗಾದೇವಿ ದೇವಸ್ಥಾನದಿಂದ ಮೇನ್ ಬಜಾರ್‌ ಮಾರ್ಗವಾಗಿ ಲಕ್ಷ್ಮೀದೇವಿ ದೇಗುಲಕ್ಕೆ ಮರಳಲಿದೆ. ೧೬ರಂದು ಸಂಗೀತ ರಸಮಂಜರಿ ಕಾರ್ಯಕ್ರಮ, ೧೭ರಂದು ರಾತ್ರಿ ೯ಕ್ಕೆ ನಾಟಕ ಪ್ರದರ್ಶನ. ೧೮ರಂದು ಸಂಜೆ ಪಲ್ಲಕ್ಕಿ ಉತ್ಸವ ಹಾಗೂ ಭಂಡಾರ ಓಕುಳಿ ಜರುಗುವುದು.