ಕುರುಗೋಡು ಸರ್ಕಾರಿ ಶಾಲೆ ಕಟ್ಟಡ ಕುಸಿತ

ಕುರುಗೋಡು: ಸೋಮವಾರ ತಡರಾತ್ರಿ ಸುರಿದ ಧಾರಾಕಾರ ಮಳೆಯಿಂದಾಗಿ ಪಟ್ಟಣದ ಹರಿಕೃಪ ಕಾಲೋನಿಯ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯ ಕಟ್ಟಡ ಕುಸಿದಿದೆ.

ಶಾಲೆಯಲ್ಲಿ ೧ರಿಂದ ೫ನೇ ತರಗತಿಯ ೧೦೪ ಮಕ್ಕಳು ಇದ್ದಾರೆ. ಮಕ್ಕಳು ಮಂಗಳವಾರ ವಿದ್ಯಾಭ್ಯಾಸ ಮಾಡಲು ಪರದಾಡಬೇಕಾಯಿತು. ಶಾಲೆಯ ೬ ಕೊಠಡಿಗಳ ಪೈಕಿ ೪ ಕೊಠಡಿಗಳು ಸಂಪೂರ್ಣ ಹಾನಿಗೆ ಒಳಗಾಗಿವೆ. ಅಲ್ಲದೆ, ಧ್ವನಿವರ್ಧಕ, ಇನ್ವರ್ಟರ್, ಎರಡು ಕಂಪ್ಯೂಟರ್ ಮಳೆನೀರಿನಿಂದ ಹಾನಿಗೊಳಗಾಗಿವೆ.

ಸುರಕ್ಷತೆಯ ದೃಷ್ಟಿಯಿಂದ ತಾತ್ಕಾಲಿಕವಾಗಿ ಶಾಲೆಯ ಕೊಠಡಿಯಲ್ಲಿ ಮಕ್ಕಳಿಗೆ ವಿದ್ಯಾಭ್ಯಾಸ ಮಾಡಬಾರದು. ಹಳೆಯ ಪಿಯು ಕಾಲೇಜಿನ ಕೊಠಡಿಗಳಲ್ಲಿಯೇ ಮಕ್ಕಳಿಗೆ ಕಲಿಕೆ ಮುಂದುವರಿಸಲು ಬಿಇಒ ಸಿದ್ದಲಿಂಗಮೂರ್ತಿ ಸೂಚಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಹಳೆಯ ಪಿಯು ಕಾಲೇಜಿನಲ್ಲಿ ವಿದ್ಯಾರ್ಥಿಗಳಿಗೆ ಪಾಠ ಮಾಡಲಾಗುತ್ತಿದೆ.