ನೊಂದು-ಬೆಂದ ಜೀವಕ್ಕೆ ಪುಸ್ತಕ ಸ್ಫೂರ್ತಿಯಾಗಲಿ

ಕುಷ್ಟಗಿ: ಪಟ್ಟಣದ ಬಸವ ಭವನದಲ್ಲಿ ತಾಲೂಕು ಕಸಾಪ, ಕುಷ್ಟಗಿಯ ತಿರುಳ್ಗನ್ನಡ ಪ್ರಕಾಶನದ ಸಹಯೋಗದಲ್ಲಿ ಕವಿಗೋಷ್ಠಿ ಹಾಗೂ ಲೇಖಕ ರವೀಂದ್ರ ಬಾಕಳೆ ಅವರ ''''ಕೂಡಿಟ್ಟ ಕನಸು'''' ಕಥಾ ಸಂಕಲನವನ್ನು ಶಾಸಕ ದೊಡ್ಡನಗೌಡ ಪಾಟೀಲ ಹಾಗೂ ಮಾಜಿ ಸಚಿವ ಅಮರೇಗೌಡ ಪಾಟೀಲ ಬಯ್ಯಾಪುರ ಜಂಟಿಯಾಗಿ ಲೋಕಾರ್ಪಣೆಗೊಳಿಸಿದರು.

ಮಾಜಿ ಸಚಿವ ಅಮರೇಗೌಡ ಪಾಟೀಲ ಭಯ್ಯಾಪುರ ಮಾತನಾಡಿ, ಕವಿ ಕಲಾವಿದರಿಗೆ ಸಮಾಜದ ಪ್ರೋತ್ಸಾಹ ಅಗತ್ಯವಿದೆ. ಸಹೃದಯರು ಅವರನ್ನು ಸಮಾಜದ ಆಸ್ತಿಯಂತೆ ಪರಿಗಣಿಸಬೇಕು ಎಂದರು.ಜಾನಪದ ಕಲಾವಿದ ಡಾ.ಜೀವನಸಾಬ ಬಿನ್ನಾಳ ಕವಿಗೋಷ್ಠಿಯಲ್ಲಿ ಆಶಯ ನುಡಿಗಳನ್ನಾಡಿದರು. ಸಾಹಿತ್ಯ ಮನುಷ್ಯ ಬದುಕಿನ ಪ್ರತಿಬಿಂಬ, ಗತಿಬಿಂಬ. ಸಾಹಿತ್ಯ ಇಂದಿನ ಸಮಕಾಲಿನ ಸಂಕಷ್ಟಗಳಿಗೆ ಸವಾಲುಗಳಿಗೆ ಪರಿಹಾರವಾಗಬೇಕಾಗಿದೆ. ಸಾಹಿತ್ಯ ಧ್ವನಿ ಇಲ್ಲದವರ ಧ್ವನಿಯಾಗಬೇಕು. ಶೋಷಿತರ, ಬಡವರ, ನಿರ್ಗತಿಕರ ಸಮಾಜದ ಮುಖ್ಯವಾಹಿನಿಯಿಂದ ದೂರ ಇರುವ ಅನೇಕರಿಗೆ ಅದು ಚೈತನ್ಯ ತುಂಬಬೇಕಾಗಿದೆ ಎಂದರು.

ಗವಿಸಿದ್ದೇಶ್ವರ ಪ್ರೌಢಶಾಲೆ ವಿದ್ಯಾರ್ಥಿಗಳು ಕೂಡಿಟ್ಟ ಕನಸು ಕಥೆಯ ರೂಪಕವನ್ನು ಅಭಿವ್ಯಕ್ತಿಸಿದರು. ಕಸಾಪ ಅಧ್ಯಕ್ಷ ವೀರೇಶ ಬಂಗಾರಶೆಟ್ಟರ, ಡಾ. ರವಿಕುಮಾರ್ ದಾನಿ, ಶ್ರೀನಿವಾಸ್ ಜಹಗೀರದಾರ, ಶಾರದಾ ಶೆಟ್ಟರ್ ನಬಿಸಾಬ್ ಕುಷ್ಟಗಿ, ರವೀಂದ್ರ ಬಾಕಳೆ, ವಂದನಾ ಗೋಗಿ ಪಾಲ್ಗೊಂಡಿದ್ದರು. ಶರಣಪ್ಪ ವಡಿಗೇರಿ, ಡಾ. ಕೆ. ಶರಣಪ್ಪ ನೀಡಿಶೇಸಿ, ಹ.ಯ. ಈಟಿ, ತಾಜುದ್ದೀನ್ ದಳಪತಿ, ಚಂದಪ್ಪ ಹಕ್ಕಿ, ಅಮರೇಗೌಡ ಜಾಲಿಹಾಳ ಕವಿಗೋಷ್ಠಿಯಲ್ಲಿ ಭಾಗವಹಿಸಿದ್ದರು. ಕಾರ್ಯದರ್ಶಿ ಮಹೇಶ ಹಡಪದ ಕಾರ್ಯಕ್ರಮ ನಿರೂಪಿಸಿದರು. ಶರಣಪ್ಪ ಲೈನದ ಸ್ವಾಗತಿಸಿದರು.