ಧರ್ಮದಿಂದ ನಡೆದು ಮಾನವರೆಲ್ಲರೂ ಒಂದು ಎನ್ನೋಣ: ವಿಜಯಮಹಾಂತ ಸ್ವಾಮೀಜಿ

ಗಜೇಂದ್ರಗಡ: ಜಾತಿ ವಿಷ ಇದ್ದಂತೆ, ಧರ್ಮ ಅಮೃತವಿದ್ದಂತೆ. ಹೀಗಾಗಿ ಜಾತಿ ಹಿಡಿದು ಬಡಿದಾಡುವ ಬದಲು ಧರ್ಮದಿಂದ ನಡೆದು ಜಾತ್ಯತೀತರಾಗಿ ಮಾನವರೆಲ್ಲರೂ ಒಂದು ಎನ್ನೋಣ ಎಂದು ಮೈಸೂರ ಮಠದ ವಿಜಯಮಹಾಂತ ಸ್ವಾಮೀಜಿ ಹೇಳಿದರು.ಮಹಾತ್ಮಗಾಂಧಿ ಹುತಾತ್ಮ ದಿನ ಅಂಗವಾಗಿ ರಾಜ್ಯವಾಪಿ ಸೌಹಾರ್ದತೆ ಪರಂಪರೆ ಉಳಿಸಿ ಬೆಳೆಸುವ ಅಭಿಯಾನ ಹಿನ್ನೆಲೆ ಸ್ಥಳೀಯ ಕಾಲಕಾಲೇಶ್ವರ ವೃತ್ತದಲ್ಲಿ ಸೌಹಾರ್ದ ಕರ್ನಾಟಕ, ವಿವಿಧ ಪ್ರಗತಿಪರ, ಸಮಾನ ಮನಸ್ಕರು ಹಾಗೂ ಜನಪರ ಸಂಘಟನೆಗಳಿಂದ ಮಂಗಳವಾರ ನಡೆದ ಸೌಹಾರ್ದತಾ ಮಾನವ ಸರಪಳಿ ನಿರ್ಮಾಣ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಟಕ್ಕೇದ ದರ್ಗಾದ ಹಜರತ್ ಸೈಯದ್ ನಿಜಾಮುದ್ದೀನ್ ಶಾ ಅಶ್ರಫಿ ಮಾತನಾಡಿ, ಜಾತಿ ಮನೆಗೆ ಸೀಮಿತವಾಗಿರಬೇಕು ಹೊರಗೆ ಬಂದರೆ ನಾವೆಲ್ಲ ಒಂದೇ ಎನ್ನುವ ಮನೋಭಾವ ಎಲ್ಲರಲ್ಲಿಯೂ ಮೂಡಬೇಕಿದೆ. ಮನುಷ್ಯನಿಗೆ ಬೆಲೆ ಇಲ್ಲ, ಮನುಷ್ಯತ್ವಕ್ಕೆ ಬೆಲೆ ಇದೆ. ಸರ್ವಜನಾಂಗದ ತೋಟದಲ್ಲಿ ಎಲ್ಲರೂ ಒಗಟ್ಟಿನಿಂದ ಬಾಳಿದರೆ ಹೂತೋಟ ಸುಂದರವಾಗಿ ಕಾಣಲಿದೆ ಎಂದರು.

ಫಾದರ್ ಜೊಶೇಪ್ ಮಾತನಾಡಿ, ನಾವು ಎಲ್ಲರೂ ಒಂದು ಎನ್ನುವ ಮನೋಭಾವನೆ ನಮ್ಮನ್ನು ಮತ್ತಷ್ಟು ಬಲಿಷ್ಠಗೊಳಿಸಲಿದೆ. ಹೀಗಾಗಿ ನಾವು ಒಂದು ಎಂದು ಸಾಗುವ ಮೂಲಕ ದೇಶದ ಅಭಿವೃದ್ಧಿಗೆ ಶ್ರಮಿಸೋಣ ಎಂದರು.

ಈ ವೇಳೆ ಮಾರುತಿ ಚಿಟಗಿ, ರಾಜು ಸಾಂಗ್ಲೀಕರ, ಬಾಲು ರಾಠೋಡ, ಶರಣು ಪೂಜಾರ, ಬಸವರಾಜ ಹೊಸಮನಿ, ಚಂದ್ರು ರಾಠೋಡ, ಗಣೇಶ ರಾಠೋಡ, ಹಸನಸಾಬ ತಟಗಾರ, ಕಳಕಯ್ಯ ಸಾಲಿಮಠ, ನಾಸಿರಅಲಿ ಸುರಪುರ, ಉಮೇಶ ರಾಠೋಡ ಸೇರಿ ಇತರರು ಇದ್ದರು.