ಸತ್ಕಾರ್ಯದಿಂದ ಭೌತಿಕ ಜೀವನಕ್ಕೆ ಮುಕ್ತಿ: ರಂಭಾಪುರಿ ಶ್ರೀಗಳು

ರೋಣ: ಭೌತಿಕ ಜೀವನಕ್ಕೆ ಶಾಂತಿ,ನೆಮ್ಮದಿ, ಮುಕ್ತಿ ಸಿಗಬೇಕಾದಲ್ಲಿ ದಾನ, ಧರ್ಮ, ಪರೋಪಕಾರ, ಸತ್ಕಾರ್ಯಗಳಲ್ಲಿ ಸದಾ ತೊಡಗಿಕೊಳ್ಳಬೇಕು. ಅಂದಾಗ ಮಾತ್ರ ಬದುಕಿಗೆ ನಿಜಾರ್ಥ ದೊರೆಯುತ್ತದೆ ಎಂದು ರಂಭಾಪುರಿ ಬಾಳೆಹೊನ್ನೂರ ಪ್ರಸನ್ನ ರೇಣುಕಾ ಡಾ.ವೀರಸೋಮೇಶ್ವರ ರಾಜದೇಶಿಕೇಂದ್ರ ಶಿವಾಚಾರ್ಯ ಶ್ರೀಗಳು ಹೇಳಿದರು‌.

ಜನರ ಹಿತಕ್ಕಾಗಿ ಒಳ್ಳೆಯ ವಿಚಾರಧಾರೆ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಧಾರ್ಮಿಕ ಸತ್ಕ್ರಾಂತಿ ಜತೆಗೆ ಸಾಮಾಜಿಕ ಸತ್ಕ್ರಾಂತಿ ಗೈಯಬೇಕು ಎಂದು ಜಗದ್ಗುರು ರೇಣುಕಾಚಾರ್ಯರು ಸಂದೇಶ ನೀಡಿದ್ದಾರೆ. ಅದರಂತೆ ನಾವೆಲ್ಲರೂ ನಡೆಯಬೇಕು. ವೀರಶೈವ ಧರ್ಮಕ್ಕೆ ಜಗದ್ಗುರು ರೇಣುಕಾಚಾರ್ಯರು ಅಪಾರ ಕೊಡುಗೆ ನೀಡಿದ್ದಾರೆ. ಶಿವಾದ್ವೈತ ಸಿದ್ಧಾಂತ ತಿಳಿದು ಜೀವನ ಪಾವನ ಮಾಡಿಕೊಳ್ಳಬೇಕು ಎಂದು ಜಗದ್ಗುರು ರೇಣುಕಾಚಾರ್ಯರು ತಪಸ್ಸು ಗೈದಿದ್ದಾರೆ. ತಾಯಿ ಮರದ ಬೇರಿಗೆ ನೀರು ಹಾಕಿ ಯಾವ ರೀತಿ ಪೋಷನೆ ಮಾಡಿ ಮರವಾಗಿ ಬೆಳೆಸಲಾಗುತ್ತದೆ. ಆ ಮರ ಯಾವ ರೀತಿಯಾಗಿ ಫಲ ಕೊಡುತ್ತದೆಯೋ, ಅದರಂತೆ ವೀರಶೈವ ಧರ್ಮ ಮರದ‌ ಪಾಲನೆ, ಪೋಷಣೆ ಅವಶ್ಯವಿದೆ. ಜನರು ಒಗ್ಗಟ್ಟಿನಿಂದ ಧರ್ಮ ಕಾರ್ಯಗಳಲ್ಲಿ ತೊಡಗಬೇಕು. ಪಂಚ ತತ್ವ, ಪಂಚ ಪೀಠಗಳ ಶ್ರಿಗಳನ್ನು ಗೌರವಿಸಿ ಪೂಜಿಸಿದಲ್ಲಿ ದೇವರ ಕೃಪೆಗೆ ಪಾತ್ರರಾಗಬಹುದು. ಪಂಚಪೀಠಗಳಿಗೆ ವೈಭವವೂ ಇದೆ, ವೈರಾಗ್ಯವು ಇದೆ. ಆದರೆ ಕೆಲ ಮಠಾಧೀಶರಿಗೆ ವೈಭವವಿದ್ದರೇ ವೈರಾಗ್ಯವಿಲ್ಲ, ವೈರಾಗ್ಯವಿದ್ದರೇ ವೈಭವ ಇರುವದಿಲ್ಲ. ಆದರೆ ಪಂಚ ಪೀಠಗಳಿಗೆ ಎರಡು ಇವೆ. ಅವುಗಳನ್ನು ಭಕ್ತರು ಕೊಟ್ಟಿದ್ದಾರೆ ಎಂದರು.

ಧರ್ಮ ಸಭೆ ಕಾರ್ಯಕ್ರಮವನ್ನು ಶಾಸಕ ಜಿ.ಎಸ್.ಪಾಟೀಲ ಉದ್ಘಾಟಿಸಿ ಮಾತನಾಡಿ, ಸನ್ಮಾರ್ಗದಲ್ಲಿ ಸಾಗಲು ಶರಣರ, ಸಂತ, ಶ್ರೀಗಳ ಹಿತೋಪದೇಶಗಳ ಮಾರ್ಗದರ್ಶಿಯಾಗಲಿವೆ. ಸಮಾಜದ ಏಳ್ಗೆಗಾಗಿ, ಯಾವುದೇ ಫಲಾಪೇಕ್ಷೆ ಬಯಸದೇ ಸೇವೆ ಮಾಡಿದಲ್ಲಿ ದೇವರ ಅನುಗ್ರಹ ಖಂಡಿತವಾಗಿಯೂ ದೊರೆಯುತ್ತದೆ ಎಂದರು.

ಕಾರ್ಯಕ್ರಮದಲ್ಲಿ ನರೇಗಲ್ಲ ಹಿರೇಮಠದ ಮಲ್ಲಿಕಾರ್ಜುನ ಸ್ವಾಮೀಜಿ, ಬದಾಮಿ ನವಗ್ರಹ ಹಿರೇಮಠದ ಶಿವಪೂಜಾ ಶಿವಾಚಾರ್ಯರು, ಸೂಡಿ ಜೂಕ್ತಿಹಿರೇಮಠದ ಡಾ.ಕೊಟ್ಟೂರೇಶ್ವರ ಶಿವಾಚಾರ್ಯ ಸ್ವಾಮೀಜಿ, ಎಪಿಎಎಂ ಮಾಜಿ ಅಧ್ಯಕ್ಷ ಪರಶುರಾಮ ಅಳಗವಾಡಿ, ವೀರಣ್ಣ ಶೆಟ್ಟರ್‌, ಧಶರಥ ಗಾಣಿಗೇರ ಸೇರಿದಂತೆ ಮುಂತಾದವರು ಉಪಸ್ಥಿತರಿದ್ದರು. ಶಿಕ್ಷಕ ಮುತ್ತಣ್ಣ ದೇಸಾಯಿ ಸ್ವಾಗತಿಸಿದರು.