ಜಾತಿ ಹೆಸರಲ್ಲಿ ಸಾಹಿತ್ಯ ವಿಮರ್ಶೆ ವಿಷಾದನೀಯ

ಕನ್ನಡಪ್ರಭ ವಾರ್ತೆ ಕಲಬುರಗಿ

ದಾಸ ಸಾಹಿತ್ಯ ಸಾಂಸ್ಕೃತಿಕ ಪ್ರತಿಷ್ಠಾನ ನಗರದ ಕನ್ನಡ ಭವನದಲ್ಲಿ ಆಯೋಜಿಸಿದ್ದ ಕನ್ನಡ ಸಾಹಿತ್ಯಕ್ಕೆ ಮಹಿಳಾ ಹರಿದಾಸರ ಕೊಡುಗೆ ವಿಶೇಷ ಉಪನ್ಯಾಸದಲ್ಲಿ ಪಾಲ್ಗೊಂಡು ವಿಷಯ ಮಂಡಿಸಿದ ಸಂಶೋಧಕರು ಸಾಹಿತ್ಯವನ್ನು ಜ್ಞಾನ, ಶಕ್ತಿ ಹಾಗೂ ಅನುಭಾವದ ಹಿನ್ನೆಲೆಯಲ್ಲಿ ಕಾಣದೆ, ಜಾತಿ ಕನ್ನಡಕ ಹಾಕ್ಕೊಂಡು ನೋಡಲಾಗುತ್ತಿದೆ, ಇದರಿಂದ ಮೌಲಿಕ ಸಾಹಿತ್ಯದ ಅವಗಣನೆ ಸಾಗಿದೆ ಎಂದು ಎಚ್ಚರಿಸಿದರು.

ಯಾರೇನೇ ಷಡ್ಯಂತ್ರ ಮಾಡಿದರೂ ಇಂತಹ ಮೌಲಿಕ ಸಾಹಿತ್ಯವನ್ನು ಅಲುಗಾಡಿಸಲಾಗದು, ಕಾಲಾಂತರದಿಂದ ಇಂತಹ ಸಾಹಿತ್ಯದ ಸೆಲೆ ಒರತೆಯಂತೆ ಸದಾ ಜಿನುಗುತ್ತ ಸಮಾಜದಲ್ಲಿ ಮೌಲ್ಯ, ಸಂಸ್ಕೃತಿ ಬಿತ್ತುವ ಕೆಲಸ ಮಾಡುತ್ತದೆ ಎಂದೂ ವಿಷಯ ಪರಿಣಿತರು ಅಭಿಪ್ರಾಯಪಟ್ಟರು.

ಹರಪನಹಳ್ಳಿ ಭೀಮವ್ವ, ಹೆಳವನಕಟ್ಟಿ ಗಿರಿಯಮ್ಮ, ಗುರುಬಾಯಿ ಲಕ್ಷ್ಮೀದೇವಿ, ಬಳ್ಳಾರಿ ಸುಧಾಬಾಯಿ ಸೇರಿದಂತೆ ನೂರಾರು ಮಹಿಳಾ ಹರಿದಾಸಾರ ತವರೂರು ಕಲ್ಯಾಣ ನಾಡು ಎಂದು, ಹರಿದಾಸರ ಹೆಸರು, ಅವರ ಕೃತಿಗಳನ್ನು ಸೋದಾಹರಣವಾಗಿ ವಿವರಿಸುತ್ತ ವಿಷಯ ಮಂಡಿಸಿದ ದಾಸ ಸಾಹಿತ್ಯ ವಿದ್ವಾಂಸ ಪವನಕಮಾರ್‌ ಗುಂಡೂರ್‌ ಗಂಗಾವತಿ ಇವರು ಕುಟುಂಬ ವ್ಯವಸ್ಥೆಯೇ ಅವನತಿ ಅಂಚಲ್ಲಿರುವ ಇಂದಿನ ಕಲದಲ್ಲಿ ಮಹಿಳಾ ಹರಿದಾಸರ ಪರಿಪೂರ್ಣ ಕುಟುಂಬ ಪರಿಕಲ್ಪನೆಯ ಮೇಲೆಯೇ ನಿಂತಿರುವ ಸಾಹಿತ್ಯ ಹೆಚ್ಚು ಅಧ್ಯಯನಕ್ಕೊಳಗಾಬೇಕಿದೆ ಎಂದರು.

ಭಕ್ತಿ ಪರಂಪರೆಯ ಒಟ್ಟಾರೆ ಕನ್ನಡ ಸಾಹಿತ್ಯವನ್ನು ಮಹಿಳಾ ಹರಿದಾಸಾರ ಕೊಡುಗೆಗೆ ಹೋಲಿಸಿದಲ್ಲಿ ಇವರಷ್ಟು ಸಾಹಿತ್ಯ ಕನ್ನಡ ಸಾಹಿತ್ಯವನ್ನ ಸಿರಿವಂತಗೊಳಿಸಿದ ಕೃತಿಗಳು ಬೇರಾವುದು ಸಿಗೋದಿಲ್ಲ. ಮಹಿಲಾ ಹರಿದಾಸ ಪಂರಪರೆಯ ಸಂಪುಟ ರಚನೆಯಾದಲ್ಲಿ ಕನಿಷ್ಠ 100 ಸಂಪುಟಗಳಾದರೂ ಸಾಕಾಗೋದಿಲ್ಲ, ಅಷ್ಟೊಂದು ವಿಫುಲ ಜೀವನಾನುಭವದ ಸಾಹಿತ್ಯದ ಹೂರಣ ಇದ್ದರೂ ಜಾತಿ ಕಾರಣದಿಂದ, ಸಂಕುಚಿತ ಮನೋಭಾವದವರ ಅವಜ್ಞೆಯಿಂದಾಗಿ ಮಹಿಳಾ ಹರಿದಾಸರ ಕೊಡುಗೆ ಗುರುತಿಸಲಾಗುತ್ತಿಲ್ಲವೆಂದು ಪವನ ಕುಮಾರ್‌ ಗುಂಡೂರ ವಿಷಾದಿಸಿದರು.

ಮೌಲಿಕ ಸಾಹಿತ್ಯಗಳು ಅವಗಣನೆ: ಡಾ. ಸ್ವಾಮೀರಾವ

ಸಾಹಿತ್ಯಕ್ಕೆಲ್ಲಿದೆ ಜಾತಿ? ಉತ್ತಮ ವಿಷಯಗಳಿದ್ದಲ್ಲಿ ಅದನ್ನು ಯಾರೇ ಹೇಳಲಿ ಎಲ್ಲರೂ ಸ್ವೀಕರಿಸುವ ಉದಾರೀತನ ಇರಲಿ, ದಾಸರು ವ್ಯವಸ್ಥೆಯೊಳಗಿದ್ದೇ ಬಂಡಾಯ ಸಾರಿದರು. ಹೀಗಾಗಿ ದಾಸ ಸಾಹಿತ್ಯ, ಅದರಲ್ಲೂ ಮಹಿಳಾ ಹರಿದಾಸ ಸಾಹಿತ್ಯ ಈ ಹಿನ್ನೆಲೆಯಲ್ಲಿ ತುಂಬ ಮಹತ್ವದ್ದಾಗುತ್ತದೆ. ಮಹಿಳಾ ಹರಿದಾಸರ ಕೊಡುಗೆ ಸಾಹಿತ್ಯಕ್ಕೆ ಅಪಾರವಾಗಿದ್ದರೂ ಇಂದಿಗೂ ಡಬ್ಬಲ್‌ ಅವಜ್ಞೆಗೊಳಗಾಗಿದೆ ಎಂದು ಖೇದ ವ್ಯಕ್ತಪಡಿಸಿದರು.