ಸಂಭ್ರಮದ ವರ ಮಹಾಲಕ್ಷ್ಮೀ ಪೂಜೆ

ಗಜೇಂದ್ರಗಡ: ಪಟ್ಟಣ ಸೇರಿದಂತೆ ತಾಲೂಕಿನ ವಿವಿಧ ಗ್ರಾಮಗಳಲ್ಲಿ ಮಹಿಳೆಯರು ಮನೆಯಲ್ಲಿ ಶುಕ್ರಗೌರಿ ವ್ರತ, ವರಮಹಾಲಕ್ಷ್ಮೀ ಪೂಜೆ ನೆರವೇರಿಸಿದರು.

ಈ ಪೂಜೆಯಿಂದ ಸುಖ,ಸಮೃದ್ಧಿ ಸೇರಿದಂತೆ ಇಷ್ಟಾರ್ಥಗಳು ನೆರವೇರುವುದೆಂಬ ನಂಬಿಕೆ. ವರಮಹಾಲಕ್ಷ್ಮೀ ವ್ರತವನ್ನು ಕನ್ಯೆಯರು ಮತ್ತು ವಿವಾಹಿತ ಮಹಿಳೆಯರು ಶ್ರದ್ಧೆಯಿಂದ ಆಚರಿಸುತ್ತಾರೆ. ಈ ವ್ರತಾಚರಣೆಗೆ ಒಂದು ವಾರ ಮೊದಲಿಂದಲೇ ಸಿದ್ಧತೆ ಮಾಡಿಕೊಂಡ ಮಹಿಳೆಯರು, ಬೆಳಗ್ಗೆ ಮಡಿಯುಟ್ಟು, ಮನೆ ಅಂಗಳ ಸಾರಿಸಿ, ರಂಗೋಲಿ ಹಾಕಿ ಬಾಗಿಲುಗಳನ್ನು ಹೂವು, ತಳಿರು ತೋರಣಗಳಿಂದ ಶೃಂಗರಿಸಿದ್ದರು. ಬಳಿಕ ಮನೆಗಳಲ್ಲಿ ಮಹಾಲಕ್ಷ್ಮೀ ಪ್ರತಿಷ್ಠಾಪಿಸಿ ಅರಿಶಿಣ ಕುಂಕುಮ, ಹೊಸ ಸೀರೆ ಕುಪ್ಪಸ, ನಾನಾ ಪುಷ್ಪ, ಚಿನ್ನದ ಒಡವೆಗಳಿಂದ ಅಲಂಕರಿಸಿ, ದೀಪ, ಧೂಪ ಹಾಕಿ ಪೂಜಿಸಿದರು. ಬಗೆ ಬಗೆಯ ಹಣ್ಣು, ಹೋಳಿಗೆ, ಕರ್ಜಿಕಾಯಿ, ಅಡುಗೆ ತಯಾರಿಸಿ ನೈವೇದ್ಯ ಅರ್ಪಿಸಿ ವರ ಮಹಾಲಕ್ಷ್ಮೀ ಪುಸ್ತಕ ಓದಿ ಮಂಗಳಾರತಿ ಮಾಡಿದರು.