ಗೋಕರ್ಣ ಪಾವಿತ್ರ್ಯಕ್ಕೆ ಧಕ್ಕೆ ಬಾರದಂತೆ ಅಭಿವೃದ್ಧಿಯಾಗಲಿ: ರಾಮ ಕಾಮೇಶ್ವರ

ಗೋಕರ್ಣ: ಪರಿಸರ ಸ್ವಚ್ಛವಾಗಿ ಇಟ್ಟುಕೊಳ್ಳುವ ಜತೆಗೆ ಪುಣ್ಯಕ್ಷೇತ್ರದ ಪವಿತ್ರತೆಗೆ ಧಕ್ಕೆ ಬರದಂತೆ ಗೋಕರ್ಣ ಅಭಿವೃದ್ಧಿಯಾಗಬೇಕು. ಈ ನಿಟ್ಟಿನಲ್ಲಿ ಊರಿನ ಪ್ರತಿಯೊಬ್ಬರೂ ಸಹಕರಿಸಬೇಕು ಎಂದು ಹಾಲಿ ಮುಂಬೈ ನಿವಾಸಿಯಾಗಿರುವ ಇಲ್ಲಿನ ರಾಮ ಕಾಮೇಶ್ವರ ತಿಳಿಸಿದರು.

ಐದು ದಶಕಗಳ ಹಿಂದೆ ಜೀವನೋಪಾಯಕ್ಕಾಗಿ ಬೇರೆ ಊರಿಗೆ ಹೋಗುವ ಅನಿವಾರ್ಯತೆ ಎದುರಾಗಿತ್ತು. ಹೀಗೇ ಹೋದ ಇಲ್ಲಿನ ಹಲವರು ಬೇರೆ ಬೇರೆ ಕಡೆ ಉನ್ನತ ಉದ್ಯೋಗದಲ್ಲಿ ಇದ್ದೇವೆ. ಅಂದು ಕೇವಲ ಧಾರ್ಮಿಕತೆಯ ಉದ್ದೇಶದಿಂದ ಮಾತ್ರ ಯಾತ್ರಿಕರು ಆಗಮಿಸುತ್ತಿದ್ದರು. ಇದರಿಂದ ಪೂಜನೀಯ ಭಾವದೊಂದಿಗೆ ಪರಿಸರ ಸ್ವಚ್ಛವಾಗಿರುತ್ತಿತ್ತು. ಆದರೆ ಇಂದು ಪ್ರವಾಸೋದ್ಯಮ ಎಂಬ ಹಣೆಪಟ್ಟಿಯಿಂದ ಊರೇ ಸಂಪೂರ್ಣ ತ್ಯಾಜ್ಯಮಯವಾಗಿರುವುದು ವಿಷಾದಕರ ಸಂಗತಿ ಎಂದರು.

ಅಂಕೋಲಾ ತಾಲೂಕು ವೈದ್ಯಾಧಿಕಾರಿ ಡಾ. ಜಗದೀಶ್ ನಾಯ್ಕ ಮಾತನಾಡಿ, ಎಲ್ಲ ಜೀವಸಂಕುಲಗಳಲ್ಲಿ ಪರಿಸರಕ್ಕೆ ತೊಂದರೆ ನೀಡುತ್ತಿರುವವರು ಮನುಷ್ಯರು. ಪ್ರಕೃತಿ ನಮಗೆ ಸಕಲವನ್ನು ನೀಡಿದೆ. ಆದರೆ ಅದಕ್ಕೆ ನಾವು ಮಾರಕವಾಗಬಾರದು. ಈ ನಿಟ್ಟಿನಲ್ಲಿ ಎಲ್ಲರೂ ಜತೆಯಾಗಿ ಸ್ವಚ್ಛತೆಯ ಕೆಲಸ ಮಾಡಬೇಕೆಂದರು.

ಕಾರ್ಯಕ್ರಮದಲ್ಲಿ ಪಹರೆ ವೇದಿಕೆ ನಾಗೇಶ ಗೌಡ ಉಪಸ್ಥಿತರಿದ್ದರು. ಮಂದಿರದ ಮೇಲುಸ್ತುವಾರಿ ಸಮಿತಿ ಸದಸ್ಯರಾದ ವೇ. ಪರಮೇಶ್ವರ ಮಾರ್ಕಾಂಡೆ ಸ್ವಾಗತಿಸಿದರು. ವೇ. ದತ್ತಾತ್ರೇಯ ಹಿರೇಗಂಗೆ ವಂದಿಸಿದರು.