ಮಲೆನಾಡಿನ ಬೆಳೆಗಳಿಗೆ ಚೈತನ್ಯ ತುಂಬಿದ ಹಿಂಗಾರು

ಕಾಫಿ, ಮೆಣಸು, ಏಲಕ್ಕಿ ಬೆಳೆಗಳಿಗೆ ಅಮೃತ ಸಿಂಚನ । ಎರಡು ದಿನ 1-3 ಇಂಚು ಉತ್ತಮ ಮಳೆ । ರೈತರಲ್ಲಿ ನೆಮ್ಮದಿಕನ್ನಡಪ್ರಭ ವಾರ್ತೆ ಸಕಲೇಶಪುರ

ಜುಲೈ ತಿಂಗಳ ೧೬ ರಿಂದ ೨೪ರ ವರಗೆ ಒಂದು ವಾರದ ಮಳೆ ಹೊರತುಪಡಿಸಿ ಈ ಬಾರಿ ಮುಂಗಾರು ಹಾಗೂ ಹಿಂಗಾರು ಮಳೆಯು ಸಹ ಸಕಾಲಕ್ಕೆ ಬಾರದ ಪರಿಣಾಮ ಬಹುತೇಕ ತಾಲೂಕಿನ ವಾಣಿಜ್ಯ ಬೆಳೆಗಳಾದ ಕಾಫಿ, ಏಲಕ್ಕಿ ಹಾಗೂ ಕಾಳು ಮೆಣಸು ಹಾಗೂ ಭತ್ತದ ಬೆಳೆಗಳು ನೀರಿನ ಕೊರತೆ ಎದುರಿಸುತ್ತಿದ್ದವು. ಸದ್ಯ ಕಳೆದ ಅ.೩೦ ಹಾಗೂ ೩೧ ರಂದು ತಾಲೂಕಿನ ಹಲವೆಡೆ 1 ರಿಂದ 3 ಇಂಚುವರಗೆ ಉತ್ತಮ ಪ್ರಮಾಣದ ಹಿಂಗಾರು ಮಳೆಯಾಗಿದೆ. ಪರಿಣಾಮ ಬೆಳೆಗಳಲ್ಲಿ ಹೊಸ ಚೇತನ ಉದ್ಭವಿಸಿದೆ.

ಮಳೆ ಎದುರು ನೋಡುತ್ತಿದ್ದ ಕಾಫಿ ಬೆಳೆಗಾರರಿಗೆ ಹಿಂಗಾರು ಮಳೆ ನೆಮ್ಮದಿ ನೀಡಿದ್ದು ತಾಲೂಕಿನಲ್ಲಿ ಪ್ರಸಕ್ತ ವರ್ಷ ೭೫ ಹೇಕ್ಟೇರ್‌ನಷ್ಟ ಹೊಸ ಕಾಫಿ ತೋಟಗಳ ನಿರ್ಮಾಣ ಮಾಡುತ್ತಿದ್ದರೆ, ಕಾಂಡಕೊರಕ ಸೇರಿದಂತೆ ವಿವಿಧ ರೋಗಗಳಿಂದ ತೆರವಾದ ಗಿಡಗಳಿಗೆ ಪರ್ಯಾಯವಾಗಿ ಹೊಸಗಿಡಗಳನ್ನು ನಾಟಿಮಾಡಲಾಗಿದ್ದು ಸದ್ಯ ಈ ಹೊಸಗಿಡಗಳಿಗೆ ನೀರಿನ ತೀರ ಅಗತ್ಯತೆ ಹೆಚ್ಚಿದ್ದು ಹೊಸಗಿಡಗಳ ಉಳಿವಿಗಾಗಿ ಈಗಿನಿಂದಲೇ ಹನಿ ನೀರಾವರಿ ವ್ಯವಸ್ಥೆಗೆ ಬೆಳೆಗಾರರು ಮುಂದಾಗಿದ್ದರು. ಸದ್ಯ ಹಿಂಗಾರು ಮಳೆ ಬೆಳೆಗಾರರ ಕೆಲಸಕ್ಕೆ ತಾತ್ಕಾಲಿಕ ವಿರಾಮ ನೀಡಿದೆ. ಅಲ್ಲದೆ ಮಳೆ ಕೊರತೆಯಿಂದ ಕೆಲವೆಡೆ ಕಾಫಿಕಾಯಿ ಓಟಿ (ಓವರ್ ಟನ್) ಸಮಸ್ಯೆ ಎದುರಿಸುತ್ತಿದ್ದು ಇಂತಹ ಸಮಸ್ಯೆಗೆ ಹಿಂಗಾರು ಮಳೆ ಪರಿಹಾರ ಒದಗಿಸಿದ್ದು ಮಳೆಯಿಂದಾಗಿ ಕಾಫಿಕಾಯಿಯಲ್ಲಿ ರಸ ತುಂಬುವುದರಿಂದ ಓಟಿ ಸಮಸ್ಯೆಗೆ ಮುಕ್ತಿ ದೊರೆಯಲಿದೆ. ವೇಗವಾಗಿ ಕಾಫಿ ಹಣ್ಣಾಗಲು ಈ ಮಳೆ ಉತ್ತಮವಾಗಿದೆ ಎಂಬುದು ಬೆಳೆಗಾರರ ವಲಯದ ಮಾತು.

ಏಲಕ್ಕಿ-ಭತ್ತ:

ಭತ್ತ: ಉತ್ತರೆ ಮಳೆ ಬಂದರೆ ರೋಗಗಳು ಕತ್ತರಿಸಿ ಹೋಗಲಿವೆ ಎಂಬ ಗಾದೆ ಈ ಬಾರಿ ಉತ್ತರೆ ಮಳೆಯ ಹನಿಯು ಭೂಮಿಗೆ ಬೀಳದ ಕಾರಣ ಇದು ಸುಳ್ಳಾಗಿದ್ದು ಮುಂಗಾರು ಮಳೆಯ ಕೊರತೆಯ ಕಾರಣದಿಂದ ತಾಲೂಕಿನಲ್ಲಿ ವಿಳಂಬವಾಗಿ ನಾಟಿ ಮಾಡಿರುವ ಭತ್ತದ ಗದ್ದೆಗಳು ಬೆಂಕಿರೋಗ ಸೇರಿದಂತೆ ವಿವಿಧ ರೋಗಗಳ ಗೂಡಾಗಿದ್ದು ಸದ್ಯ ಎರಡು ದಿನಗಳ ಮಳೆ ರೋಗ ನಿವಾರಣೆ ಹಾಗೂ ತೆನೆ ಮೂಡಲು ಸಹಾಯಕವಾಗಿದೆ.

ಮಳೆಕೊರತೆಯ ಕಾರಣ ತಾಲೂಕಿನಲ್ಲಿ ಉಷ್ಣಾಂಶ ಅಧಿಕವಾಗಿದ್ದು ನವೆಂಬರ್ ತಿಂಗಳ ಆರಂಭದಲ್ಲೆ ಏಪ್ರೀಲ್ ತಿಂಗಳು ನೆನಪಿಸುವಂತಹ ಬಿಸಿಲು ಧಗೆ ಅವರಿಸಿದ್ದು ಈಗಲೇ ಇಷ್ಟೊಂದು ಬಿಸಿಲು ಎಂಬ ಉದ್ಗಾರ ತಾಲೂಕಿನಲ್ಲಿ ಸಾಮಾನ್ಯವಾಗಿ ಕೇಳಿ ಬರುತಿತ್ತು. ಸದ್ಯ ಇಂತಹ ಮಾತಿಗೆ ಹಿಂಗಾರು ಮಳೆ ವಿರಾಮ ನೀಡಿದ್ದು ವಾತವಾರಣ ತಂಪು ತಂಪಾಗಿದೆ.

ತಾಲೂಕಿನಾದ್ಯಂತ ಮೋಡ ಮುಸುಕಿದ ವಾತಾವಾರಣ ಇರುವ ಕಾರಣ ಈಗಾಗಲೇ ಕೊಯ್ಲು ನಡೆಸಲಾಗಿರುವ ಅರೇಬಿಕ್‌ ಕಾಫಿ ಹಣ್ಣುಗಳನ್ನು ಒಣಗಿಸುವ ಸಮಸ್ಯೆ ಸೃಷ್ಟಿಯಾಗಿದ್ದು ಮಳೆ ಬರಲಿ ಹಾಗೆಯೇ ಬಿಸಿಲು ಇರಲಿ ಎಂಬ ಪ್ರಾರ್ಥನೆ ಬೆಳೆಗಾರರ ವಲಯದಿಂದ ಕೇಳಿ ಬರುತ್ತಿದೆ. ಕಳೆದ ಎರಡು ದಿನಗಳಲ್ಲಿ ಸುರಿದ ಹಿಂಗಾರು ಮಳೆ ಬೆಳೆಗಳಿಗೆ ಹೊಸಚೈತನ್ಯ ನೀಡಿದೆ. ಅಲ್ಲದೆ ಹನಿ ನೀರಾವರಿಗಾಗಿ ಮಾಡಬೇಕಿದ್ದ ಸಾಕಷ್ಟು ಮಾನವ ಶ್ರಮ ಹಾಗೂ ದನ ವ್ಯಯವನ್ನು ತಗ್ಗಿಸಿದೆ:

ಹಿಂಗಾರು ಮಳೆ ಎಲ್ಲ ಬೆಳೆಗಳಿಗೂ ಅತ್ಯಗತ್ಯ. ಈ ಬಾರಿ ಮುಂಗಾರು ಮಳೆ ವೈಪಲ್ಯದಿಂದ ಕಳೆಗುಂದಿದ ಬೆಳೆಗಳಿಗೆ ಹಿಂಗಾರು ಮಳೆ ಅತ್ಯಗತ್ಯವಾಗಿತ್ತು.