ಮೇಲೇಳದ ಮಲ್ಟಿ ಲೆವೆಲ್‌ ಕಾರು ಪಾರ್ಕಿಂಗ್‌ ಕಾಮಗಾರಿ!

ವಿಶೇಷ ವರದಿ

ನಗರದ ಹಂಪನಕಟ್ಟೆಯ ಹಳೆ ಖಾಸಗಿ ಬಸ್ ನಿಲ್ದಾಣದ ಜಾಗದಲ್ಲಿ ಸ್ಮಾರ್ಟ್‌ ಸಿಟಿ ಲಿಮಿಟೆಡ್‌ ನೇತೃತ್ವದಲ್ಲಿ ಎರಡೂವರೆ ವರ್ಷಗಳ ಹಿಂದೆ ಆರಂಭವಾದ ನಗರದ ಪ್ರಥಮ ಮಲ್ಟಿ ಲೆವೆಲ್ ಕಾರ್ ಪಾರ್ಕಿಂಗ್ ಯೋಜನೆಯ ಕಾಮಗಾರಿ ಆಮೆ ಗತಿಯಲ್ಲಿ ಸಾಗಿದೆ. ಸದ್ಯಕ್ಕಂತೂ ಕಾಮಗಾರಿ ಸಂಪೂರ್ಣ ಸ್ಥಗಿತವಾಗಿದೆ. ಆಳವಾಗಿ ಅಗೆದು ಹಾಕಿದ್ದರಿಂದ ರಸ್ತೆಯೊಂದು ಅರೆಕುಸಿದಿದ್ದು, ಇಡೀ ರಸ್ತೆ ಆಹುತಿಯಾಗುವ ಹಂತ ತಲುಪಿದೆ. ಅಕ್ಕಪಕ್ಕದ ಕಟ್ಟಡಗಳಿಗೂ ಮಳೆಗಾಲದಲ್ಲಿ ಸಮಸ್ಯೆ ಎದುರಾಗುವ ಆತಂಕ ಎದುರಾಗಿದೆ.

ಕಾಮಗಾರಿ ಆರಂಭವಾಗುವ ಮೊದಲು ಈ ಪ್ರದೇಶದಲ್ಲಿ ತಳ್ಳುಗಾಡಿಗಳು, ಸಣ್ಣಪುಟ್ಟ ವ್ಯಾಪಾರಿಗಳಿಗೆ ವ್ಯಾಪಾರ ಮಾಡಲು ಅನುಕೂಲವಾಗಿತ್ತು. ಉಳಿದ ಜಾಗದಲ್ಲಿ ವಾಹನಗಳು ಪಾರ್ಕ್‌ ಮಾಡುತ್ತಿದ್ದವು. ಇನ್ನು ಈ ಕಾಮಗಾರಿ ಮುಗಿಯಲು ಇನ್ನೆಷ್ಟು ವರ್ಷ ಕಾಯಬೇಕೋ? ಇತ್ತ ಹೊಸ ಯೋಜನೆಯ ಕನಸೂ ಸದ್ಯಕ್ಕೆ ಈಡೇರಲ್ಲ, ಅತ್ತ ಸಾಕಷ್ಟು ಜನರಿಗೆ ಉಪಯೋಗ ಆಗುತ್ತಿದ್ದ ಜಾಗ ವ್ಯರ್ಥವಾಗುತ್ತಿದೆ ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸುತ್ತಾರೆ.

ಅಪಾಯಕ್ಕೆ ಆಹ್ವಾನ: ಕಾಮಗಾರಿಗಾಗಿ ಇಡೀ ಜಾಗವನ್ನು 20 ಮೀ.ಗೂ ಹೆಚ್ಚು ಆಳ ಮಾಡಲಾಗಿದ್ದು, ಅಲ್ಲಿಂದ ಪಂಚಾಂಗ ಹಾಕುವ ಕಾರ್ಯ ಅರೆಬರೆ ಆಗಿದೆ. ಅಷ್ಟು ಆಳವಾಗಿ ಗುಂಡಿ ತೋಡಿದರೂ ಒಂದು ಬದಿಯಲ್ಲಿ ಮಾತ್ರ ತಡೆಗೋಡೆ ಕಟ್ಟಲಾಗಿದೆ. ಉಳಿದ ಮೂರೂ ಬದಿಗಳು ಅಪಾಯಕ್ಕೆ ಸಿಲುಕಿವೆ. ಒಂದು ಬದಿಯಲ್ಲಿರುವ ರಸ್ತೆ ಈಗಾಗಲೇ ಭಾಗಶಃ ಕುಸಿದಾಗಿದೆ. ಧರೆ ಕುಸಿದು ರಸ್ತೆ ನಡುವೆ ಇದ್ದ ಮ್ಯಾನ್‌ಹೋಲ್‌ ಕೂಡ ಕುಸಿಯುವ ಹಂತದಲ್ಲಿದೆ. ತಾತ್ಕಾಲಿಕವಾಗಿ ಮರಳಿನ ಗೋಣಿಗಳನ್ನು ಪೇರಿಸಿಡಲಾಗಿದ್ದರೂ ಈ ಮಳೆಗಾಲದಲ್ಲಿ ಈ ರಸ್ತೆ ಕುಸಿಯುವ ಎಲ್ಲ ಸಾಧ್ಯತೆಗಳಿವೆ.

ಮಲ್ಟಿ ಲೆವೆಲ್‌ ಕಾರು ಪಾರ್ಕಿಂಗ್‌ ಪರಿಕಲ್ಪನೆಯನ್ನು ಮೊದಲಿಗೆ (2008) ಪ್ರಸ್ತಾಪಿಸಿದ್ದು ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರ. ಆದರೆ ವಿವಿಧ ಕಾರಣಗಳಿಂದ ಅದರ ಅನುಷ್ಠಾನ ವಿಳಂಬವಾಗಿತ್ತು. ಬಳಿಕ ಮಂಗಳೂರು ಮಹಾನಗರ ಪಾಲಿಕೆಯು 2014ರಲ್ಲಿ ನಡೆದ ಕೌನ್ಸಿಲ್ ಸಭೆಯಲ್ಲಿ ಮುಡಾದಿಂದ ಪ್ರಸ್ತಾವನೆ ಹಿಂತೆಗೆದು ಸ್ವತಂತ್ರವಾಗಿ ಅಥವಾ ಸರ್ಕಾರಿ- ಖಾಸಗಿ ಮಾದರಿಯ ಮೂಲಕ ಯೋಜನೆ ಕಾರ್ಯಗತಗೊಳಿಸಲು ನಿರ್ಧರಿಸಿತ್ತು. ಸ್ಮಾರ್ಟ್ ಸಿಟಿ ಮಿಷನ್ ಅಡಿಯಲ್ಲಿ ಮಂಗಳೂರು ನಗರ ಆಯ್ಕೆ ಮಾಡಿದ ನಂತರ ಯೋಜನೆಯನ್ನು ಸ್ಮಾರ್ಟ್‌ ಸಿಟಿ ಲಿಮಿಟೆಡ್‌ಗೆ ಹಸ್ತಾಂತರಿಸಲಾಗಿತ್ತು.