ಮಠದೊಳಗೆ ರಾಜಕೀಯ ಪಕ್ಷ ಬರಬಾರದು: ಸಿದ್ದಣ್ಣ ಲಂಗೋಟಿ

ಹಾವೇರಿ: ಅಂದು ಬಸವಣ್ಣನಿಂದ ಎಲ್ಲರೂ ಸತ್ಯ ಶುದ್ಧ ಕಾಯಕ ಮಾಡುತ್ತಿದ್ದರು. ಇಂದು ರಾಜಕಾರಣಿಗಳು, ರಾಜಕೀಯ ಪಕ್ಷವನ್ನು ಮಠದೊಳಗೆ ತರುತ್ತಿದ್ದಾರೆ. ಅವರು ಮಠದೊಳಗೆ ಹೋಗುವಾಗ ರಾಜಕೀಯ ಪಕ್ಷ ಮರೆಯಬೇಕು ಎಂದು ಸಾಹಿತಿ ಪ್ರೊ. ಸಿದ್ದಣ್ಣ ಲಂಗೋಟಿ ಹೇಳಿದರು.

ಮಾನವ ಕುಲ ಒಂದಾಗಿ ಬಾಳಬೇಕು ಎಂದು ಜಗತ್ತಿನ ಎಲ್ಲ ಧರ್ಮಗಳು ಹೇಳಿವೆ. ಆದರೆ, ನಾವು ಇಂದು ಧರ್ಮ, ಜಾತಿ ಹೆಸರಿನಲ್ಲಿ ಕಚ್ಚಾಡುತ್ತಿದ್ದೇವೆ. ಬಸವಣ್ಣ ಅವರು ಹೇಳಿದ ವಿಶ್ವ ಮಾನವ ಸಂದೇಶ ಆಚರಣೆ ಜಾರಿಗೆ ಬಂದಿಲ್ಲವೆಂದು ಕುವೆಂಪು ಸಹ ನೋವಿನಿಂದ ಹೇಳಿದ್ದರು. ಇಂದು ಸಹ ಬಸವಣ್ಣನವರ ತತ್ವ ಪಾಲಿಸುವ ಜನರು ಸಿಗುವುದು ವಿರಳವಾಗಿದೆ. ಲಿಂಗಾಯತರಲ್ಲಿಯೇ 104 ಜಾತಿ ವಿಚಾರದಲ್ಲಿ ಹರಿದು ಹಂಚಿ ಹೋಗಿದ್ದೇವೆ. ನಾವೆಲ್ಲರೂ ಆತ್ಮಾವಲೋಕ ಮಾಡಿಕೊಳ್ಳಬೇಕು. ಶರಣರು ಎಲ್ಲವನ್ನೂ ನಿಷ್ಠುರವಾಗಿ ಹೇಳಿದ್ದಾರೆ. ಆದರೂ ಲಿಂಗಾಯತದಲ್ಲಿ ಬಣಜಿಗ, ನೇಕಾರರ ಸಂಘ ಸೇರಿ 104 ಜಾತಿಗೊಂದು ಸಂಘ ಬಂದಿವೆ. ಇವರೆಲ್ಲ ಲಿಂಗಾಯತರು ಆಗುವುದು ಯಾವಾಗ ಎಂದು ಪ್ರಶ್ನಿಸಿದರು.

ಸಾಹಿತಿ ಕಲ್ಯಾಣಮ್ಮ ಲಂಗೋಟಿ ಮಾತನಾಡಿ, ಬಸವಣ್ಣನವರು ದೇವರ ಉಪಾಸನೆ ಕಂಡುಹಿಡಿದರು. ಅಕ್ಕ ನಾಗಮ್ಮಳಿಗೆ ಇಷ್ಟಲಿಂಗ ದೀಕ್ಷೆ ನೀಡಿದರು. ಇಷ್ಟಲಿಂಗ ಪೂಜೆ, ದಾಸೋಹ, ಕಾಯಕ ಮೈಗೂಡಿಸಿಕೊಂಡರು. ಸತ್ಯ ಶುದ್ಧವಾದ ಕಾಯಕ ತತ್ವ, ನಿತ್ಯ ಲಿಂಗಾರ್ಚನೆ, ನಿತ್ಯ ದಾಸೋಹದ ಪ್ರಾಮುಖ್ಯತೆ ತಿಳಿಸಿದರು ಎಂದರು.

ಸತ್ಯ ಶುದ್ಧ ಕಾಯಕದಿಂದ ಬಂದ ಹಣದಲ್ಲಿ ಪ್ರಸಾದ ಮಾಡಬೇಕು. ಪರ ಧನ ಬಳಸಬಾರದು. ಅಡ್ಡಮಾರ್ಗದಿಂದ ಇನ್ನೊಬ್ಬರ ಸಂಪತ್ತು ಕಬಳಿಸಬಾರದು. ತನ್ನ ಸತಿ ಇರುವಾಗ ಪರಸ್ತ್ರೀಯನ್ನು ವಿಕಾರ ದೃಷ್ಟಿಯಿಂದ ನೋಡುವುದು ಒಳ್ಳೆಯದಲ್ಲ. ನಮ್ಮೊಳಗಿನ ದೈವವನ್ನು ಕಾಣಸಬೇಕು. ಹೊರಗಡೆ ದೇವರನ್ನು ಹುಡುಕಿ, ಸಮಯ, ಶ್ರಮ, ಹಣ ವ್ಯರ್ಥ ಮಾಡಬಾರದು ಎಂದರು.