ಕಾಯಕಲ್ಪವಿಲ್ಲದೆ ಸೊರಗಿರುವ ನುಗ್ಗೇಹಳ್ಳಿ ನೋಂದಣಾ ಕಚೇರಿ

ಸ್ವಾತಂತ್ರ್ಯಪೂರ್ವದ ಕಟ್ಟಡಕ್ಕೆ ಅಭಿವೃದ್ಧಿ ಭಾಗ್ಯವಿಲ್ಲ । ಸ್ವಂತ ಕಟ್ಟಡವಿದ್ದರೂ ಬಳಸದೆ ಬಾಡಿಗೆಗೆ ಹಣ ಪೋಲು । ಜನಪ್ರತಿನಿಧಿಗಳ ನಿರ್ಲಕ್ಷ್ಯ

ಕನ್ನಡಪ್ರಭ ವಾರ್ತೆ ಚನ್ನರಾಯಪಟ್ಟಣ

ಸಾರ್ವಜನಿಕರಿಗೆ ಅನುಕೂಲವಾಗಲಿ ಎಂದು ಅಪ್ಪೇಗೌಡರು ಅಂದು ಸರ್ಕಾರಿ ಕಚೇರಿಗಾಗಿ ಭೂಮಿ ದಾನ ಮಾಡಿ ಕಟ್ಟಡ ನಿರ್ಮಾಣವಾಗಲು ಕಾರಣವಾಗಿದ್ದರು. ಆದರೆ ಅವರು ನೀಡಿದ ದಾನದ ಆಸ್ತಿ ಈಗ ಹಾಳಾಗಿ ಹೋಗುತ್ತಿದೆ.

ಚನ್ನರಾಯಪಟ್ಟಣ ತಾಲೂಕಿನಲ್ಲಿ ಎರಡು ಉಪ ನೋಂದಣಾಧಿಕಾರಿಗಳ ಕಚೇರಿ ಇದ್ದು ಚನ್ನರಾಯಪಟ್ಟಣ ಉಪ ನೋಂದಣಾಧಿಕಾರಿಗಳ ಕಚೇರಿಗೆ ಸ್ವಂತ ಕಟ್ಟಡವೇ ಇಲ್ಲ, ನುಗ್ಗೇಹಳ್ಳಿ ಹೋಬಳಿ, ಹಿರೀಸಾವೆ ಹೋಬಳಿ, ಬಾಗೂರು ಹೋಬಳಿಗೆ ಸೇರಿದಂತೆ ನುಗ್ಗೇಹಳ್ಳಿಯಲ್ಲಿ ಸ್ವಂತ ಕಟ್ಟಡವಿದ್ದರೂ ಸಹ ಆ ಕಟ್ಟಡವನ್ನು ಕಾಪಾಡಿಕೊಳ್ಳಲು ಹಿಂದೇಟು ಹಾಕುತ್ತಿರುವುದು ನಾಚಿಕೆಯ ವಿಷಯ ಎಂದು ಸಾರ್ವಜನಿಕರು ಕಿಡಿಕಾರಿದ್ದಾರೆ.

ಜಿಲ್ಲಾ ಮತ್ತು ತಾಲ್ಲೂಕು ಮಟ್ಟದ ಜನಪ್ರತಿನಿಧಿಗಳಿಗೆ ಈ ಕಟ್ಟಡ ಕಾಣುವುದಿಲ್ಲವೇ ಅಥವಾ ಈ ಹೋಬಳಿ ನೆನಪು ಇಲ್ಲವೇ, ಒಟ್ಟಾರೆ ಈ ಹೋಬಳಿ ಕಟ್ಟಡಗಳು ತಬ್ಬಲಿಯಾಗಿವೆ ಎಂದು ನಾಗರಿಕರು ಬೇಸರ ವ್ಯಕ್ತಪಡಿಸಿದ್ದಾರೆ.

ಕೂಡಲೇ ಕಂದಾಯ ಸಚಿವರು, ಜಿಲ್ಲಾಧಿಕಾರಿ, ಜಿಲ್ಲಾ ನೋಂದಣಾಧಿಕಾರಿ ಅಥವಾ ಸಂಬಂಧಪಟ್ಟ ಅಧಿಕಾರಿಗಳು ಸ್ಥಳಕ್ಕೆ ಭೇಡಿ ನೀಡಿ ಇದಕ್ಕೆ ಶಾಶ್ವತ ಪರಿಹಾರ ನೀಡಲಿ ಎಂದು ಒತ್ತಾಯಿಸಲಾಗಿದೆ.

ರಾಮಚಂದ್ರು, ನುಗ್ಗೇಹಳ್ಳಿ, ರೈತ ಸಂಘದ ತಾಲೂಕು ಅಧ್ಯಕ್ಷ.