ಉಳವಿಯ ನೂರಾರು ಎಕರೆಯಲ್ಲಿ ಪ್ಲಾಸ್ಟಿಕ್‌ ತ್ಯಾಜ್ಯ

ಜೋಯಿಡಾ: ತಾಲೂಕಿನ ಸುಪ್ರಸಿದ್ಧ ಉಳವಿ ಚೆನ್ನಬಸವೇಶ್ವರ ಜಾತ್ರೆ ಮುಗಿದು ವಾರವೇ ಸಮೀಪಿಸಿದರೂ ಸ್ವಚ್ಛತೆ ಮರೀಚಿಕೆಯಾಗಿದೆ. ಹತ್ತಾರೂ ಕಿಲೋ ಮೀಟರ್‌ ವರೆಗೂ ಎಲ್ಲಂದರಲ್ಲಿ ಕಾಣಿಸುವ ಪಾಸ್ಟಿಕ್‌ ತ್ಯಾಜ್ಯ, ಕೊಳೆತು ನಾರುತ್ತಿರುವ ಚೆಲ್ಲಿದ ಆಹಾರ, ಚರಂಡಿಯಲ್ಲಿ ಕೊಳಚೆ ತುಂಬಿ ದುರ್ನಾತ ಬೀರುತ್ತಿದೆ. ಇದರಿಂದ ಈ ಭಾಗದಲ್ಲಿರುವ ಶಾಲೆಗಳಿಗೂ ಬೀಗ್‌ ಹಾಕಲಾಗಿದೆ.

ಶಾಲೆಗಳು ಬಂದ್‌: ಜಾತ್ರೆ ನಡೆದ ಸ್ಥಳದಲ್ಲಿ ಪ್ರಾಥಮಿಕ, ಪ್ರೌಢಶಾಲೆ, ಉರ್ದು ಶಾಲೆಗಳಿದ್ದರೂ ಎಲ್ಲವೂ ಬಂದಾಗಿವೆ. ಇವು ಆರಂಭವಾಗಲು ಸ್ವಚ್ಛತೆಯ ಸಮಸ್ಯೆ ಕಾಡುತ್ತಿದೆ. ಶಾಲೆ ಪ್ರೌಢಶಾಲೆಗಳಲ್ಲಿ ಭಕ್ತರು ವಾರಗಳ ಕಾಲ ವಾಸ ಮಾಡಿದ ಪರಿಣಾಮ ಗಬ್ಬೆದ್ದು ನಾರುತ್ತಿವೆ. ಹೀಗಾಗಿ ಯಾವ ವಿದ್ಯಾರ್ಥಿಗಳೂ 15 ದಿನಗಳ ಕಾಲ ಇತ್ತ ಸುಳಿಯುವುದಿಲ್ಲ. ಅವರ ಆರೋಗ್ಯದ ಹಿತದೃಷ್ಟಿಯಿಂದ ಇದು ಸರಿಯಾದರೂ ಶಾಲೆಗಳ ಅಭ್ಯಾಸದ ವ್ಯವಸ್ಥೆ ಆಗಬೇಕು.

ಅತ್ಯಂತ ತ್ವರಿತಗತಿಯಲ್ಲಿ ಇಲ್ಲಿ ಸ್ವಚ್ಛತಾ ಕಾರ್ಯ ನಡೆಯಬೇಕಿತ್ತು. ಆದರೆ ಕೇವಲ ಬೆರಳಣಿಕೆಯಷ್ಟಿರುವ ಕಾರ್ಮಿಕರಿಂದ ಈ ಕೆಲಸ ಸದ್ಯ ಮುಗಿಯುವ ಲಕ್ಷಣಗಳಿಲ್ಲ. ಹತ್ತಾರು ಕಿಮೀ ರಸ್ತೆ ಅಕ್ಕ-ಪಕ್ಕ ನೀರಿನ ತೊರೆ, ಹೊಳೆ, ಹಳ್ಳ ಎಲ್ಲಿ ನೋಡಿದರೂ ಪ್ಲಾಸ್ಟಿಕ್ ಇನ್ನಿತರ ತ್ಯಾಜ್ಯಗಳು ಕಾಣಿಸುತ್ತಿವೆ. ಅರಣ್ಯ ಇಲಾಖೆ ಕೂಡ ಈಗ ಸ್ವಚ್ಛತೆಗೆ ಮುಂದಾದರೆ ಮಾತ್ರ ಉಳವಿಯ ಪರಿಸರದ ಸುಂದರತೆ ಮತ್ತೆ ಮರುಕಳಿಸಬಹುದು.