ರಾಜಕೀಯವಾಗಿ ಸಿಂಧನೂರು, ಮಸ್ಕಿ ಪುನರ್ ಜನ್ಮನೀಡಿವೆ

ಸಿಂಧನೂರು: ಸಿಂಧನೂರು ಹಾಗೂ ಮಸ್ಕಿ ತಾಲೂಕುಗಳು ಎರಡು ಬಾರಿ ಸಂಸದರಾಗಿ ಆಯ್ಕೆಯಾಗಲು ನಿರೀಕ್ಷೆಗಿಂತಲೂ ಮೀರಿ ಬಹುಮತ ನೀಡಿವೆ. ಹೀಗಾಗಿ ಎರಡು ಕ್ಷೇತ್ರಗಳು ರಾಜಕೀಯವಾಗಿ ಪುನರ್ಜನ್ಮ ನೀಡಿವೆ ಎಂದು ಕೊಪ್ಪಳ ಸಂಸದ ಸಂಗಣ್ಣ ಕರಡಿ ಹೇಳಿದರು.

ಜಗತ್ತಿನ 14 ರಾಷ್ಟ್ರಗಳು ಪ್ರಧಾನಿ ನರೇಂದ್ರ ಮೋದಿಯನ್ನು ಜಾಗತಿಕ ನಾಯಕನಾಗುವಂತೆ ಆಹ್ವಾನ ನೀಡುತ್ತಿವೆ. ಯಾರಿಗೆ ಆಗಲಿ ಅಧಿಕಾರ ಶಾಶ್ವತವಲ್ಲ. ಅಧಿಕಾರವಧಿಯಲ್ಲಿ ಮಾಡಿದ ಕೆಲಸಗಳು ಶಾಶ್ವತವಾಗಿ ಜನಮಾನಸದಲ್ಲಿ ಉಳಿಯುತ್ತವೆ. 1196-97 ರ ಸುಮಾರಿಗೆ ಈ ರೈಲ್ವೆ ಕಾಮಗಾರಿಗೆ ಚಾಲನೆ ನೀಡಲಾಗಿತ್ತು. ಸುಮಾರು ಮೂರು ದಶಕಗಳ ವರೆಗೆ ವಿವಿಧ ಹಂತಗಳಲ್ಲಿ ಕಾಮಗಾರಿಗಳು ನಡೆದಿವೆ. ರಾಜ್ಯ ಸರ್ಕಾರ ಸಮರ್ಪಕವಾಗಿ ಬಜೆಟ್‌ನಲ್ಲಿ ನಿಗದಿ ಪಡಿಸಿದ ಹಣವನ್ನು ಈ ಕಾಮಗಾರಿಗೆ ನೀಡಿದ್ದರೆ ಇನ್ನು ಎರಡ್ಮೂರು ವರ್ಷಗಳ ಮುಂಚೆಯೆ ಸಿಂಧನೂರಿನಿಂದ ರೈಲ್ವೆ ಸಂಚಾರ ಆರಂಭಗೊಳ್ಳುತ್ತಿತ್ತು ಎಂದು ಹೇಳಿದರು.

ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರ ಮನವೊಲಿಸಿ ಸಿಂಧನೂರಿಗೆ ಮೆಡಿಕಲ್ ಕಾಲೇಜನ್ನು ತೆಗೆದುಕೊಂಡು ಬನ್ನಿ, ಜನ ನಿಮ್ಮ ಭಾವಚಿತ್ರವನ್ನು ಹಾಕುತ್ತಾರೆ ಎಂದು ಸಂಗಣ್ಣ ವೇದಿಕೆ ಮೇಲಿದ್ದ ಶಾಸಕ ಹಂಪನಗೌಡ ಬಾದರ್ಲಿ ಅವರಿಗೆ ಸಲಹೆ ನೀಡಿದರು.

ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ ಅವರು ಮಾಡಿದ ಟೀಕೆಗಳು ತಮಗೆ ಆಶೀರ್ವಾದವಿದ್ದಂತೆ ಅವರ ಬಗ್ಗೆ ಟೀಕೆ ಮಾಡಲು ಹೋಗುವುದಿಲ್ಲ. ಆದರೆ ನೂತನವಾಗಿ ಪದಗ್ರಹಣ ಮಾಡಲು ಮುಂದಾಗಿದ್ದ ಅಧ್ಯಕ್ಷರುಗಳೇ ಪದಗ್ರಹಣ ಕಾರ್ಯಕ್ರಮಕ್ಕೆ ಆಹ್ವಾನಿಸಿಲ್ಲ. ಆಹ್ವಾನಿಸದ ಕಾರ್ಯಕ್ರಮಕ್ಕೆ ಹೇಗೆ ಬರಲಿ ಎಂದು ಟಾಂಗ್ ನೀಡಿದರು.

ಬಿಜೆಪಿ ಮುಖಂಡರಾದ ಅಮರೇಗೌಡ ವಿರೂಪಾಪುರ, ರಾಜೇಶ ಹಿರೇಮಠ, ಮಧ್ವರಾಜ ಆಚಾರ್ಯ, ನಿರುಪಾದೆಪ್ಪ ಜೋಳದರಾಶಿ, ಯಂಕೋಬ ನಾಯಕ, ಹನುಮೇಶ ಸಾಲಗುಂದಾ, ಮಲ್ಲಿಕಾರ್ಜುನ ಜೀನೂರು, ಹುಬ್ಬಳ್ಳಿಯ ರೈಲ್ವೆ ವಿಭಾಗಿಯ ಅಧಿಕಾರಿ ದೇವಯಾನಿ, ಎಇಇ ಉಮಾ ಮಹೇಶ್ವರ, ಭೂ ಸ್ವಾಧಿನಿ ಅಧಿಕಾರಿ ಶೃತಿ ಇದ್ದರು.