ಬದುಕಿನ ಶಾಂತಿ, ನೆಮ್ಮದಿಗೆ ನಿರ್ಲಿಪ್ತತೆ ಅಭ್ಯಾಸ ಮಾಡಿಕೊಳ್ಳಿ: ಶ್ರೀ ಗಂಗಾಧರೇಂದ್ರ ಸರಸ್ವತೀ ಸ್ವಾಮೀಜಿ

ಶಿರಸಿ: ಜೀವನದಲ್ಲಿ ನಿರ್ಲಿಪ್ತತೆಯ ಅಭ್ಯಾಸದಿಂದ ಬದುಕಿನಲ್ಲಿ ಶಾಂತಿ, ನೆಮ್ಮದಿ, ಉತ್ಸಾಹ ಲಭಿಸುವಂತೆ ಆಗುತ್ತದೆ ಎಂದು ಸೋಂದಾ ಸ್ವರ್ಣವಲ್ಲೀಯ ಶ್ರೀ ಗಂಗಾಧರೇಂದ್ರ ಸರಸ್ವತೀ ಸ್ವಾಮೀಜಿ ನುಡಿದರು.

ಜೀವನದಲ್ಲಿ ನಿರ್ಲಿಪ್ತತೆಯನ್ನು ಅಭ್ಯಾಸ ಮಾಡಿಕೊಂಡವರು ಗೆಲ್ಲುತ್ತಾರೆ. ಆದರೆ ಜೀವನದ ಸುಖ-ದುಃಖಗಳಿಗೆ ಒಳಗಾಗುತ್ತಿರುವವರು ಕ್ರಮೇಣ ಸೋಲುತ್ತಾರೆ. ಜೀವನದಲ್ಲಿ ಸುಖ, ದುಃಖಗಳು ಅನಿವಾರ್ಯ. ಅವುಗಳಲ್ಲಿ ಮುಳುಗಿ ಬಿಟ್ಟರೆ ಬಹಳ ಕಷ್ಟ ಪಡಬೇಕಾಗುತ್ತದೆ, ಒಮ್ಮೊಮ್ಮೆ ಸೋಲುವ ಪ್ರಸಂಗವೂ ಬರುತ್ತದೆ. ಅವುಗಳಲ್ಲಿ ನಿರ್ಲಿಪ್ತತೆ ಅಭ್ಯಾಸ ಮಾಡಿಕೊಂಡರೆ ಅವರು ಗೆಲ್ಲುತ್ತಾರೆ. ನಿರ್ಲಿಪ್ತತೆಗೆ ಒಂದು ಶಾಸ್ತ್ರಕಾರರ ಉದಾಹರಣೆ ಕಮಲದ ಎಲೆ. ಕಮಲದ ಎಲೆಯು ನೀರಿನಲ್ಲಿಯೇ ಇದ್ದರೂ ಒದ್ದೆಯಾಗುವುದಿಲ್ಲ. ಹಾಗೆಯೇ ನಿರ್ಲಿಪ್ತರಾದ ವ್ಯಕ್ತಿಗಳು ಸಂಸಾರದಲ್ಲೇ ಇದ್ದರೂ ಸಂಸಾರದ ಸುಖ-ದುಃಖಗಗಳಿಂದ ಅವರು ಬಾಧಿತರಾಗುವುದಿಲ್ಲ ಎಂದು ಹೇಳಿದರು.ಈಗ ನಾವು ಇರುವ ಸ್ಥಿತಿ ಹೇಗಿದೆ ಎಂದರೆ ಯಾವಾಗಲೂ ಮನೆಯಲ್ಲಿಯೇ ಇದ್ದು ನೆನಪಾದಾಗ ದೇವಸ್ಥಾನಕ್ಕೆ ಹೋಗಿ ಬರುತ್ತೇವೆ. ಆದರೆ ನಮ್ಮ ಈ ಮನಸ್ಥಿತಿ ಬದಲಾಗಬೇಕು ಎಂದು ಡಿವಿಜಿ ಹೇಳುತ್ತಾರೆ. ಯಾವಾಗಲೂ ದೇವಸ್ಥಾನದಲ್ಲಿಯೇ ಇದ್ದು ನೆನಪಾದಾಗ ಮನೆಗೆ ಬರುವ ಹಾಗೆ ಆಗಬೇಕು. ದೇವಸ್ಥಾನದಲ್ಲಿ ಇದ್ದಾಗ ನಾವು ಇದು ನಮ್ಮ ಮನೆ ಅಲ್ಲ, ನಾವು ಬಂದಿರುವುದು ದೇವಸ್ಥಾನಕ್ಕೆ ಎಂದು ಅಂದುಕೊಳ್ಳುತ್ತೇವೆ. ಅದೇ ರೀತಿ ಮನೆಯಲ್ಲಿ ಇರುವಾಗಲೂ ಇದೇ ನನ್ನ ನಿಜ ಸ್ವರೂಪವಲ್ಲ, ನನ್ನ ಮೂಲ ಸ್ವರೂಪವೆಂಬ ಮನೆ ಬೇರೆ ಇದೆ ಎಂದು ನಮ್ಮ ಚಿಂತನೆ ಇರಬೇಕು. ದೀರ್ಘಕಾಲ ದೇವರ ಸನ್ನಿಧಿಯಲ್ಲಿಯೇ ಇದ್ದವರೂ ಇದ್ದಾರೆ. ಹಾಗೆ ನಿನ್ನ ದೈನಂದಿನ ಜೀವನ ಇರಬೇಕು ಎಂದು ಡಿವಿಜಿ ಹೇಳುತ್ತಾರೆ. ಇದೇ ನಿರ್ಲಿಪ್ತತೆ ಎಂದು ಹೇಳಿದರು.

ಬೆಳಗ್ಗೆಯಿಂದ ಮಾತೆಯರು ಶಂಕರ ಸ್ತೋತ್ರ ಪಠಣ, ಭಗವದ್ಗೀತಾ ಪಠಣ ಹಾಗೂ ಲಲಿತಾ ಸಹಸ್ರನಾಮದಿಂದ ಅರ್ಚನೆ ಮಾಡಿದರು. ಗಾಯತ್ರೀ ಅನುಷ್ಠಾನ ನಡೆಯಿತು.